17°C , Partly cloudy | Kigali-Rwanda

Gerayo Amahoro: Polisi iraburira abagenda mu muhanda bambaye ‘ekuteri’

Yanditswe na Mutungirehe Samuel

Ku ya 21-01-2020 saa 10:01:05
Umuvugizi wa Polisi y'u Rwanda, CP Kabera Jean Bosco (Foto Samuel M)

Umuvugizi wa Polisi avuga ko muri gahunda ya Gerayo Amahoro hateganyijwemo ibyiciro byinshi bishoboka, birimo no kubuza abantu kugenda mu muhanda bafite utwumvisho twa terefone (ecouteurs) n’ababikora batwaye ibinyabiziga cyangwa bagenda n’amaguru kuko bituma umuntu arangara bigateza impanuka zakwirindwa.

Yabitangaje ubwo yaganiraga n’abanyamakuru, muri gahunda ya Gerayo Amahoro, mu cyumweru cya 36 kibanze ku kwibutsa abatwara ibinyabiziga kumenya ko mu Rwanda bagendera mu gisate k’iburyo cy’umuhanda ufite ibyerekezo bibiri bigana hamwe, hakaba n’ubukangurambaga bwibanze mu matorero ya Giporotesitanti mu Rwanda arimo na ADEPR.

Ati “Gahunda ya Gerayo Amahoro mu kiciro cya mbere izamara ibyumweru 52, kugira ngo turebe mu by’ukuri aho tuzaba tugeze. Turabizi ko nyuma y’ibyumweru 52 hari ibizaba bitarumvikana cyangwa se hari ahazaba hataragerwa. Hari ukugendera mu muhanda kw’abanyamaguru, hari ukwambukiranya umuhanda, hari ukuvugira kuri telefone, hari ukwandika ubutumwa bugufi SMS, hari ugushyira utwumvisho twa terefone (Ecouteur) mu matwi n’ibindi byinshi tugomba kwigisha abantu bakoresha umuhanda kugira ngo ubwo burangare bugabanuke cyangwa bucike n’impanuka ziba mu muhanda zicike.

Yakomeje agira ati: “Turacyakomeza, tugeze mu cyumweru cya 36, ndetse n’ibyo twakoze mbere tuzabisubiramo kubera ko iyo wigishije rimwe abantu nta bwo bafata cyane cyane abakoresha umuhanda kuko bijyanye n’imyumvire n’imigenzereze ku buryo umuntu yitwara buri gihe”.

CP Kabera avuga ko gushyira utuntu mu matwi bitemewe kuko bituma habaho kurangara kandi ari yo mpamvu ikomeye ituma impanuka ziyongera mu muhanda.

Nta bwo byemewe; biriya bintu birakurangaza, erega gutwara imodoka ugomba kuba ubwonko bwawe n’umutima wawe wose ureba imodoka n’aho ugenda mu muhanda n’abandi bawukoresha.

Iyo watangiye gushyiramo utu  tuntu wumvisha muri terefone, ukavuga cyangwa ukumva umuziki urumva ko uba warangaye, watangiye kurangara byarangiye. warangaye kuko ubwonko bwawe burimo kumva ibindi, burimo kuvugana n’umuntu, urimo kumva indirimbo, hari n’abumvira firime kuri terefone bazumva n’amagambo, uba warangaye kandi tuzi ko 80% by’impanuka ziba mu muhanda zigahitana abantu biterwa no kurangara, izo mpamvu zakwirindwa.

Yakomeje agira ati “Ni yo mpamvu rero ikintu icyo ari cyo cyose gishobora kuba cyarangaza umuntu, umutima we, ubwonko bwe kigomba kwirindwa.”

Umumotari Gashema Olivier, avuga ko abamotari benshi usanga bafite terefone mu ngofero irinda umutwe (Casque) bari kuri terefone bavugana n’abandi kandi batwaye, nabyo bikaba biri mu byateza umumotari kurangara kuko ubwenge igice kimwe kiba kiri kuri terefone.

Abanyamaguru na bo basabwa kandi kumenya ko igihe bagendera mu muhanda baca mu nzira yabugenewe ku banyamaguru, baciye ku ruhande rw’ibumoso aho ikinyabiziga kiza bakireba imbere mu gihe utwaye ikinyabiziga mu Rwanda atwarira iburyo.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.