20°C , Partly sunny | Kigali-Rwanda

Gen. Kabarebe yasobanuye inzira yo guhagarika Jenoside muri Kigali

Yanditswe na KAYITARE JEAN PAUL

Ku ya 13-04-2018 saa 09:30:39

Minisitiri w’Ingabo z’u Rwanda Gen. James Kabarebe agaragaza ko inzira yo guhagarika Jenoside yakorerwaga Abatutsi mu 1994 mu mujyi wa Kigali yari ikomeye kubera ko ngo rwari urugamba utamenya uko ugomba kurutegura n’igihe rwarangirira.

Gen. Kabarebe asobanura uko ingabo za RPA zamenye ihanurwa ry’indege y’uwahoze ari Umukuru w’Igihugu, Habyarimana Yuvenali, nuko yihutiye guhita abimenyesha Umugaba Mukuru w’ingabo wari ku Mulindi wa Byumba, ubu ni mu karere ka Gicumbi mu ntara y’Amajyaruguru.

Ati “Tariki 6 Mata 1994 nka saa mbiri n’igice indege ya Habyarimana imaze kugwa, itumanaho ry’igisirikare cya Leta twararyumvaga nkuko na bo bumvaga iryacu kuko abafaransa barabafashaga bakumva iryacu ariko na bo iryabo tukaryumva […] Twagiye kumva twumva ku itumanaho ryabo bavuga ko indege ya Habyarimana yahanutse, hakimara iminota itanu babivuze, RTLM iba irabivuze mu gihe uwari uyoboye urugamba yireberaga umupira wa CAN ahantu mu cyumba kinini hariya ku Mulindi ari kumwe n’abandi bakada ba RPF, ni na nge wabimubwiye.”

Avuga ko mu gihe gito hahise humvikana amabariyeri mu mujyi wa Kigali, n’ahantu hose. Aho abasirikare bari bari bumvaga ngo batangiye no gutera amazu amwe n’amwe. Ati “Abasirikare bari muri CND baratubwiraga ariko no ku Mulindi hari telefoni, ibyinshi babaga babyumva.”

Minisitiri w’Ingabo, Gen. James Kabarebe, avuga ko icyo gihe ari bwo uwari uyoboye urugamba, Maj. Gen. Paul Kagame,  yahise atumiza abayobozi bose b’ingabo bari mu Mutara kugera mu Ruhengeri abasaba kwitegura kuko ubwicanyi bwari bwatangiye kuvugwa.

Avuga ko ku itariki 07 Mata 1994 abantu batangiye kwicwa ndetse n’ingabo zari muri CND abajepe bari bashinzwe umutekano wa Habyarimana barazataka biba ngombwa ko Maj. Gen. Kagame atanga amabwiriza. Minisitiri w’Ingabo avuga ko icyo gihe uwayoboraga urugamba yasabye abasirikare bari muri CND gusohokamo bakajya aho bashobora kurengera abantu no kugota umwanzi kugira ngo atabatanga imbere.

Agaragaza ko ubwo ingabo za RPA zageraga kuri sitade Amahoro gutabara abari bari yo, basanze interahamwe na Ex FAR (ingabo zatsinzwe) bamaze kwambura intwaro abasirikare ba Bangladesh bari baharinze. Ati “Ni ukuvuga ko abantu bari bahungiye muri Sitade, haburaga iminota mike cyane bagashira.”

Gen. Kabarebe avuga ko bimaze kwemezwa ko Jenoside yakorerwaga abatutsi itangiye tariki 07 Mata, tariki 8 Mata 1994, Maj. Gen. Kagame yatanze amabwiriza yuko abasirikare bose guhera mu Mutara kugera Ruhengeri batangira guhagarika Jenoside.

Akomeza avuga ko ingabo za RPA zahagurutse tariki 08 Mata, ku itariki 10 Mata 1994 mu minsi ibiri gusa ngo zari zigeze i Kigali. Ashimangira ko mu guhagarika Jenoside yakorewe Abatutsi atari ikintu cyari cyoroshye kuko ngo si intambara ushobora kuvuga uti umwanzi ari aha n’aha.

Ati “Nta musozi n’umwe utari uriho interahamwe nta n’interahamwe zitari zifite imbunda ndetse na Polisi ya komini (Police communale). Ni yo mpamvu navugaga ko gutsinda kwa RPA kwahinduye ibintu byinshi cyane kuko iyo hatabaho RPA ikomeye gutsindwa byari byoroshye Jenoside ikaba yakomeza kurushaho.”

Urugamba rwo kurokora Abatutsi i Nyamirambo rwaragoranye

Minisitiri w’Ingabo Gen. Kabarebe avuga ko kurokora Abatutsi bari bigabijwe n’abicanyi i Nyamirambo mu Mujyi wa Kigali byari bigoye ariko akanavuga ko ingabo za RPA zari zifite ishyaka ryo guhagarika Jenoside yakorerwaga abatutsi bikagera ku kigero cyo kumva ko buri musirikare agomba gukora icyo ashoboye nta we umuhaye amabwiriza ngo yabaga ari nka komanda (commander) ku giti ke.

Ati “Ingabo zari CND kugira ngo zizage kwambuka zice i Gikondo, mu bipangu byose buri nzu yose ya etaje irimo interahamwe, ngo uce mu Gatenga wambuke Rebero uge i Nyamirambo, ukure abantu i Nyamirambo ubazane ubasubize Rebero wongere ubacishe Gatenga, ubacishe i Gikondo uzamuke umuhanda w’abajepe bakurasa, wongere ubageze kuri CND ngo uzahabakure ubajyane ubageze i Byumba cyangwa se i Kabuga nta bwo igikorwa cyari cyoroshye.”

Akomeza agira ati “Ariko ikiza ni umurongo ngenderwaho wa RPA kuko mu guhagarika Jenoside buri musirikare wese wa RPA yari nka komanda, nta bwo ari nka ba basirikare ugomba gusunika, […] mu guhagarika Jenoside ni bwo bwa mbere tubona buri musirikare wa RPA yitwara ku giti ke ukamubwira ngo genda akagenda.”

Ku rundi ruhande, Gen. James Kabarebe avuga ko ingufu zakoreshejwe mu guhagarika Jenoside yakorewe Abatutsi ari nyinshi cyane kuva tariki 07/04/1994 kugeza tariki 04/07/1994 aho muri iryo joro abicanyi babonye ko bikomeye cyane bagakizwa n’amaguru. Yongeyeho ko ngo wenda iyo abafaransa bataza, guhagarika Jenoside byari koroha.

Iyi Jenoside yakorewe Abatutsi mu 1994 yabaye mu gihe cy’amezi atatu, ihitana abasaga miliyoni. Yabaye amahanga arebera, kandi n’Umuryango w’Abibumbye wari ubizi kuva mu itegurwa ryayo kugeza ikozwe, ntacyo wakoze.

TANGA IGITEKEREZO

Leave a Reply

Be the First to Comment!

avatar