18°C , Mostly cloudy | Kigali-Rwanda

Gen Bosco Ntaganda yakatiwe gufungwa imyaka 30

Yanditswe na Imvaho Nshya

Ku ya 07-11-2019 saa 10:37:07
Gen Bosco Ntaganda

Urukiko Mpuzamahanga Mpanabyaha (ICC) kuri uyu wa 7 Ugushyingo 2019 rwakatiye Gen Bosco Ntaganda igifungo cy’imyaka 30 nyuma yo kumuhamya ibyaha 18.

Gen Ntaganda yahamijwe ibyaha by’intambara n’ibyibasiye inyokomuntu birimo ubwicanyi, gukoresha abantu ubucakara bw’imibonano mpuzabitsina no kwinjiza abana mu gisirikari.

Urukiko rwavuze ko Ntaganda wishyikirije ubutabera mu mwaka wa 2013, imyaka itandatu ishize afunzwe izagabanywa ku gihano yakatiwe. Bisobanuye ko asigaje gufungwa imyaka 24.

Ibyaha Ntagandwa yahamijwe byasomwe hakurikijwe uburemere bwabyo, byose bikaba byagombaga gutuma afungwa imyaka isaga 200 nk’uko bitangazwa na DW.

Gusa iyo umuntu yakoze ibyaha byinshi kandi akaba adashobora guhabwa igifungo cya burundu, ahabwa igifungo giteganyirijwe icyaha gikomeye kurusha ibindi mu byo yahamijwe, ari yo mpamvu yakatiwe gufungwa imyaka 30.

Ntaganda w’imyaka 45 yahamijwe ibyaha byakozwe ubwo yari umuyobozi w’ibikorwa bya gisirikari by’umutwe wa UPC (Union of Congolese Patriots) byakorewe mu Burasirazuba bwa Repubulika Iharanira Demokarasi ya Congo hagati ya 2002-2003.

Mu bushyamirane bwakorewemo ibyaha yahamijwe, ishyaka rya UPC ryiganjemo abo mu bwoko bw’Abahema ryishe abo mu bwoko bwari bahanganye b’Abalendu mu mugambi wo kubakura mu gace ka Ituri gakungahaye ku mabuye y’agaciro.

Ibihumbi n’ibihumbi by’Abalendu byarishwe abandi bakurwa mu byabo.

Impapuro zo guta muri yombi Ntaganda zasohowe na ICC mu mwaka wa 2006. Uyu mujenerali yishyikirije Ambasade y’Amerika mu Rwanda muri 2013, nyuma y’aho umutwe yabagamo wa M23 wari umaze gucikamo ibice.

Ntaganda yiyongereye ku bandi Banyafurika bahamijwe ibyaha n’Urukiko Mpuzamahanga Mpanabyaha rw’i La Haye runengwa kwibasira Abanyafurika kuko kuva rwashingwa mu mwaka wa 2002 nta muntu wo hanze y’Afurika rurahamya ibyaha.

Ntaganda afite iminsi 30 yo kujuririra igifungo yakatiwe.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.