26°C , Partly sunny | Kigali-Rwanda

Gatsibo: Huzuye umuyoboro w’amazi uzatwara miriyari zisaga 3

Yanditswe na Kayitare Jean Paul

Ku ya 30-04-2019 saa 07:10:11
Amatiyo ari Gihengeri byitezwe ko azageza amazi meza mu mirenge irimo Gatsibo, Gitoki, Kabarore n'ahandi muri Gatsibo (Foto Butare J.)

Umuyoboro w’Amazi wa km 51.4, uva Gihengeri ukanyura mu mirenge ya Nyagihanga, Ngarama, Gatsibo, Kageyo, Gitoki na Kabarore mu karere ka Gatsibo wuzuye utwaye 3,267,691,306.

Ubuyobozi bw’Akarere ka Gatsibo buvuga ko amazi meza hari aho yatangiye gukoreshwa bityo akaba ari igisubizo ku baturage. Biteganijwe ko abaturage bazatangira gukoresha amazi meza ku itariki 15 Gicurasi 2019.

Manzi Theogene, umuyobozi w’akarere wungirije ushinzwe iterambere ry’ubukungu, mu kiganiro yagiranye n’Imvaho Nshya, yavuze ko ikibazo cyari gihari ari uko amatiyo yakoreshwaga yari ashaje n’amazi bakoreshaga akaba atahazaga umubare w’abaturage batuye mu mirenge ya Nyagihanga, Ngarama, Gatsibo, Kageyo, Gitoki na Kabarore.

Yagize ati “Twari dufite ikibazo cy’amazi ikindi kandi imiyoboro yari ishaje n’amazi akiri make kuko iriya miyoboro yagiye ikorwa, abaturage bakiri bake ariko ubu bariyongere ku buryo wabonaga ko amazi ntacyo yari akimariye abaturage”.

Akomeza avuga ati “Uriya muyoboro tuzajya dufatiraho indi miyoboro mito kugira ngo amazi agezwe n’ahandi hatari muri iyo mirenge. Turimo kubara ko uyu muyoboro munini uzaha amazi abaturage barenga ibihumbi mirongo itandatu (60,000)”.

Ku rundi ruhande, Manzi asobanura ko imiyoboro yari ishaje abaturage bakaba bari bariyongereye badashobora kubona amazi meza yo kunywa no gukoresha, akaba yabafasha mu buzima bwa buri munsi.

Yemeza ko hari aho batangiye kuvoma. Ati “Aho twarangije hari amavomo yatangiye kuvomwaho ariko bitarenze itariki 15 Gicurasi 2019, abaturage bose baraba bavoma amazi meza nta kibazo.”

Abaturage barasabwa kubungabunga ibi bikorwa remezo ntibabyangize, ntibangize za robine, ntibangize n’amatiyo. Manzi avuga ko ababikora byaba ari ingeso mbi kandi ko abaturage bafite uwo muco bakwiye gucikaho.

Ubuyobozi bw’Akarere ka Gatsibo bwizeye ko abana batindaga kujya ku ishuri kubera kujya kuvoma kure y’aho batuye, ubu ngo amazi agiye kubegera bityo bakaba bagiye kujya bayavoma hakiri kare, ntibitume bakererwa kandi bakagerere ku ishuri ku gihe.

Uwiduhaye Marceline utuye mu murenge wa Gatsibo avuga ko bajyaga barushywa no kubona amazi meza ibyo bikagira ingaruka ku bana baba bagomba kujya ku ishuri badakerewe. Avuga ko kuba babonye amazi ikibazo bari bafite kigiye gukemuka ariko bakanywa n’amazi meza.

Ati “Abana bacu bajyaga bakererwa kubera kujya kuvoma aho bashobora kubona amazi meza. Icyatugoraga cyane ni ukutabona amazi ariko ubu twatangiye kuyabona biratuma abana bacu batongera gukererwa.”

Kasande Agnes utuye mu Murenge wa Kabarore na we yishimira ko bagiye kubona amazi meza, ikibazo k’indwara zituruka ku isuku nke zikaba zigiye gucika burundu. Yongeraho kandi ko bakoraga urugendo rurerure kugira ngo bashobore kuvoma amazi meza.”

Ati “Twishimiye ko mu gihe gito dutangira kuvoma amazi meza. Urugendo twakoraga tujya kuyashaka no kuba amazi ubwayo yahendaga bigatuma hari abahitamo kuvoma amazi atari meza, ubu twizeye ko ikibazo cy’amazi kigiye kuba amateka mu karere kacu ka Gatsibo, kandi twiyemeje gusigasira ibikorwa remezo tugezwaho kuko ari twe tubigiriramo inyungu.”

Ubuyobozi bw’akarere bwizeza ko ijerekani izajya igurishirizwa ku giciro kiza kandi kijyanye n’ubushobozi bw’umuturage, hakurikijwe uko ibiciro bya RURA bigenwe.

Manzi, Umuyobozi w’akarere wungirije ushinzwe iterambere ry’ubukungu, agaragaza ijerekani izajya igura amafaranga umunani (8Frw), naho ahakoreshejwe amashanyarazi na mazutu izajya igura amafaranga makumyabiri na tanu (25Frw).

Amatiyo ari Gihengeri byitezwe ko azageza amazi meza mu mirenge irimo Gatsibo, Gitoki, Kabarore n’ahandi muri Gatsibo (Foto Butare J.)

Umwanditsi:

Kayitare Jean Paul

Tanga Igitekerezo

Email yanyu ntigaragazwa ku rubuga. Amazina na Email ni ngombwa.