23°C , Mostly cloudy | Kigali-Rwanda
Umuhanda unyura Rwimbogo, Munini, Gikobwa ugakomereza muri Kayonza watangiye gukorwa (Foto Kayitare J. P)

Gatsibo: Hatangiye gukorwa umuhanda uzatwara miliyari zirenga 6

Yanditswe na KAYITARE JEAN PAUL

Ku ya 29-03-2018 saa 07:51:24

Ubuyobozi bw’Akarere ka Gatsibo mu Ntara y’Iburasirazuba buratangaza ko bwatangiye gukora umuhanda ufite uburebure bwa kilometero 29 na metero  586 ukaba unyura Rwimbogo, Munini, Gikobwa ugahuza Gatsibo n’Akarere ka Kayonza.

Umuhanda unyura Rwimbogo, Munini, Gikobwa ugakomereza muri Kayonza watangiye gukorwa (Foto Kayitare J. P)

Hari kandi undi muhanda ufite uburebure bwa kilometero 30 unyura mu byapa bya Ngarama ukagera muri santeri ya Ngarama ugakomeza Nyagahita aho Akarere ka Gatsibo gahana imbibi n’aka Nyagatare. Uburebure bw’umuhanda ungana n’ibilometero 59 na metero 586 uzatwara amafaranga 6 085 439 058 zizava mu ngengo y’imari ya 2017/2018.

Meya Gasana Richard asobanura ko iyi mihanda ijya gukorwa abaturage ari bo babanje kuyisaba, ikindi kandi inyura ahasanzwe hari ibikorwa by’ubuhinzi n’ubworozi, ikazafasha abaturage kugeza ku isoko umusaruro w’ibikomoka ku buhinzi ndetse ngo n’aborozi na bo bakazageza umukamo wabo ku ruganda ku buryo bworoshye.

Ati “Iyi mihanda ikorwa twayisabwe n’abaturage, iyo urebye iriya mihanda ni ijya ahantu hari ibikorwa by’ubuhinzi n’ubworozi. Nk’umuhanda ujya Rwimbogo, ni ahantu dufite ibikorwa by’ubuhinzi buhujwe hari ibikorwa by’ubworozi. Ni ho dufite amafamu menshi borororeramo kandi aborozi bakeneye uko bageza umukamo wabo ku makusanyirizo, ku bahinzi b’umuceri na bo bagomba kugemura umusaruro wabo bakawujyana ku ruganda.”

Gasana akomeza avuga ko umuhanda wa Ngarama unyura Rwangingo hari igishanga gihingwamo umuceri, ahahingwa ibigori n’ibitoki, bityo ngo abahinzi b’ibi bihingwa bakaba bazungukira kuri uyu muhanda urimo gukorwa.

Iyi mihanda nimara gukorwa izazanira byinshi by’umwihariko aborozi n’abahinzi cyane cyane mu bijyanye no kugabanya igiciro k’ingendo bakoraga bajya cyangwa bava ku isoko. Imihanda nirangira bizongera ubukungu bw’abaturage.

Kabanda John utuye mu murenge wa Rwimbogo avuga ko uyu muhanda numara gukorwa bizaborohera kugeza imyaka ku isoko rya Rwagitima n’amafaranga bakoreshaga batega ipikipiki azagabanuka.

Ati “Kugera Fayinansi no ku isoko rya Rwagitima byajyaga bituvuna kuko kugeza imyaka twejeje ku isoko byaduhendaga cyane. Turashimira ubuyobozi bwacu bwabonye ko dukeneye umuhanda ukaba waratangiye gukorwa. Ku bwacu ni ibintu byiza kuko amafaranga twajyaga dutegesha ipikipiki azagabanuka.”

Bazambanza Theophile utuye mu murenge wa Ngarama na we ashimangira ko uyu muhanda uzababera igisubizo kuko ngo barushywaga no kugera muri santeri ya Kabarore. Ati “Ndashimira ko twasubijwe ikibazo twari tumaranye igihe kirekire. Kugira ngo uve inaha i Ngarama ujya Kabarore byatwaraga amafaranga atari munsi y’ibihumbi birindwi kugenda no kugaruka, byaturushyaga. Icyo nakongeraho ni uko uyu muhanda uzatuma dushobora guhahirana n’abandi.”

Umuyobozi w’Akarere ka Gatsibo, Gasana Richard, avuga ko nta bibazo by’ingurane bihari kuko bamaze kubarira abaturage bagera kuri 38 ndetse Inama Njyanama yemeje ko bagomba kwishyurwa, bamwe amafaranga bakaba bamaze kuyabona n’abatarayabona bakaba bazayahabwa vuba kuko akarere karayafite.

Asaba abaturage kwita ku mihanda bakayirinda kwangirika babireba. Nubwo ngo atari kaburimbo ariko bizeye ko iyi mihanda yombi bazayimarana igihe kinini. Amasezerano yo gukora uyu muhanda avuga ko umuhanda ugomba gukorwa mu gihe cy’amezi 18, ku rundi ruhande rwiyemezamirimo yizeza ko uzarangira mbere y’icyo gihe.

 

TANGA IGITEKEREZO

Leave a Reply

Your email address will not be published. Required fields are marked *