20°C , Partly cloudy | Kigali-Rwanda

Gatsibo: Haravugururwa urutoki rw’abari mu kiciro cya 1 n’icya 2

Yanditswe na Kayitare Jean Paul

Ku ya 07-11-2019 saa 06:46:31
Mu karere ka Gatsibo inzego zitandukanye zateye intsina 158 mu rwego rwo kuvugururira urutoki abari mu kiciro cya 1 n'icya 2 (Foto Butare J.)

Ubuyobozi bw’Akarere ka Gatsibo mu Ntara y’Iburasirazuba bwatangije igikorwa cyo kuvugurura urutoki rw’abaturage bari mu kiciro cya 1 n’icya 2.

Ni igikorwa cyatangirijwe mu murenge wa Nyagihanga kuwa Gatatu tariki ya 6 Ugushyingo 2019.

Nk’uko Umuyobozi w’Akarere ka Gatsibo wungirije ushinzwe iterambere ry’ubukungu Manzi Théogène yabihamirije Imvaho Nshya, iki gikorwa kigamije gufasha abaturage bari mu kiciro cya 1 n’icya 2 cy’ubudehe bafite urutoki kuzamura iterambere n’imibereho myiza yabo.

Manzi avuga ko hatewe insina zirenga 100 kandi ko ari igikorwa kizakomeza ku buryo ngo abaturage bari mu kiciro cya 1 n’icya 2 bose bazavugururirwa urutoki.

Yagize ati “Muri iki gikorwa, hatewe imibyare 158 hakoreshejwe ifumbire y’imborera. Dufite gahunda ko abaturage bacu bose bari mu kiciro cya 1 n’icya 2 cy’ubudehe bose tuzabavugururira urutoki.”

Manzi Theogene, Umuyobozi w’Akarere ka Gatsibo wungirije ushinzwe iterambere ry’Ubukungu yavuze ko akarere kiyemeje gufasha abaturage bari mu kiciro cya 1 n’icya 2 cy’ubudehe ariko hakiyongeraho no kubafasha kuvugurura urutoki ku barufite kugira ngo ubukungu bwabo buzamuke kurushaho.

Ati “Gahunda zizakomeza hirya no hino mu karere abari muri ibyo byiciro 1 na 2 nyuma y’umwaka bakazaba batangiye gusarura intoki. Umuturage tumutereye insina 200 turizera ko bazahita bava muri biriya byiciro bityo bagire imibereho myiza”.

Asaba abaturage baterewe insina kuzifata neza no kugira uruhare mu mibereho yabo no mu byo barimo gukora kugira ngo guhinduka kw’imibereho yabo kwihute kandi ngo birashoboka cyane.

Nyirahabimana Vanisa utuye mu kagari ka Nyagitabire mu murenge wa Nyagihanga, ashimira ubuyobozi bw’akarere bwatekereje kumuvugururira urutoki bityo akaba yizeye ko mu minsi iri imbere azaba abayeho neza kubera urutoki. Ashimangira kandi ko azaharanira gufata neza urutoki.

Yagize ati “Ndashimira abayobozi b’akarere bamfashije kuvugurura urutoki rwange. Nizeye ko imibereho y’umuryango wange igiye guhinduka bityo nange nkazagira imibereho myiza. Icyo ngiye gukora ni ukwita kuri izi nsina zikazakura neza kuko ibishoboka byose nabikorewe ahasigaye ni ahange.”

Igikorwa cyo kuvugurura urutoki kitabiriwe n’inzego zitandukanye zirimo Ingabo na Polisi, abakozi b’imirenge bashinzwe ubuhinzi n’abaturage muri rusange.

Biteganyijwe ko iki gikorwa kizakomereza mu mirenge yose igize Akarere ka Gatsibo. Mu murenge wa Nyagihanga hatewe imibyare 158 yo mu bwoko bw’injagi na nka zikamwa izasimbura urutoki abaturage bari basanganywe.

Umwanditsi:

Kayitare Jean Paul

Tanga Igitekerezo

Email yanyu ntigaragazwa ku rubuga. Amazina na Email ni ngombwa.