24°C , Partly sunny | Kigali-Rwanda

Gatsibo: Green Party yijeje ko nitorwa izashyira imbaraga mu gukemura ikibazo cy’amazi

Yanditswe na HITIMANA SERVAND

Ku ya 27-08-2018 saa 08:54:45

Ubwo ishyaka Green Party ryiyamamarizaga mu karere ka Gatsibo, ubuyobozi bwaryo bwijeje abaturage ko nibaritora rizashyira imbaraga mu guhangana n’ikibazo k’ibura ry’amazi gikunze kugaragara muri iki gice.

Dr Habineza Frank yasezeranyije abatuye Gatsibo na Nyagatare ko natorwa azibanda ku gukemura ikibazo cy’amazi (Foto Hitimana S)

Dr Frank Habineza, umuyobozi w’iri shyaka, avuga ko mu gihe baba bahawe amahirwe n’abaturage bakabatorera kujya mu Nteko Ishinga Amategeko, bazakora ubuvugizi bugamije gutuma ikibazo cy’amazi make kirangira mu gice cyahoze kitwa Umutara.

Avuga ko ibi bazabigeraho bagaragaza ingamba zikwiye gufatwa ndetse n’uburyo byakorwamo iki kibazo kikarangira. Ibi ngo birimo uburyo bwo kubungabunga amasooko, kurwanya isuri, no kungera ibikorwa remezo bijyanye no kugeza amazi ku baturage.

Yagize ati: “Hano ikintu twibanzeho cyane ni ikibazo cy’amazi. Amazi yo gukoresha mu ngo, amazi yo kuvomerera imyaka, amazi yo guha amatungo, tubabwiye ko mu gihe twaba dutowe twazashyiraho ingamba zigamije kugeza amazi ku baturage mu ngo zabo cyangwa hafi y’ingo zabo.

Tuzakoresha uburyo bwo gukurura amazi yo munsi y’ubutaka, dukoreshe uburyo bwo gufata amazi y’imvura, ndetse hakarebwa n’ubundi buryo hatunganywa amazi atemba n’amazi y’umuvumba n’andi.”

Umuyobozi wa Green Party kandi avuga ko ibi bizajyana no kurengera ibidukikikje hatunganywa imisozi, inarindwaho isuri kuko bifasha mu kudakama kw’amasooko y’amazi.

Ikindi uyu muyobozi yagarutseho ni uko ngo mu gihe baba batowe bazafasha mu gutora amategeko cyangwa kuvugurura amategeko agenga ubutaka. Aha ngo ikigamijwe ni ukugira ngo umuturage agire uburenganzira ku butaka atabukodesheje Leta.

Ati: “Tuzaharanira ko itegeko ry’ubutaka rivugururwa umuturage akagira icyangombwa cy’ubutaka cya burundu, aho kuvuga ko abukodesha Leta mu myaka runaka.

Tuzanafasha abaturage kongera uburyo bwo kubyaza umusaruro ubwo butaka bwabo, kuko bazaba babushoraho imbaraga bazi ko ari ubwabo mu gihe cya burundu. Tuzaharanira ko hajyaho umukozi ushinzwe ubuhinzi mu kagari, uzafasha abaturage kubyaza umusaruro ubutaka bwabo.”

Bamwe mu bitabiriye ibikorwa byo kwamamaza bya Green Party, babwiye Imvaho Nshya ko bashimye ibitekerezo n’ingamba bagejejweho, igisigaye ngo kikaba ari ukugaragaza uguhitamo kwabo mu matora yo ku italiki 3 Nzeri.

Kamuhanda Jean Paul yagize ati: “Twumvise ibitekerezo byiza bya Green Party, kimwe n’uko n’abandi bagenda baza bakatubwira ibyabo, igisigaye ni uko uguhitamo k’umuntu kuri ku mutima aho tuzabigaragaza ku munsi w’itora.”

Ikindi uyu muturage asaba ni uko ibiba bivugwa mu gihe nk’iki cyo kwiyamamaza byazanashyirwa mu bikorwa nyuma y’amatora.

Ati: “Icyo twifuza cyane ariko ni uko imigambi nk’iyi badusezeranya bazanayikomeza igihe baba bagize amahirwe yo gutorwa. Bafite imigambi myiza igamije kuzamura imibereho y’abaturage.

Badusezeranyije kuzakemura ikibazo cy’amazi, konoza ubuhinzi n’ibindi. Ibi rero bige binakomeza na nyuma y’amatora kugira ngo icyo umuturage yasezeranyijwe akibone, kuko ni nabwo ubutaha twakongera kubagirira ikizere.”

TANGA IGITEKEREZO

Leave a Reply

Be the First to Comment!

avatar