21°C , Mostly cloudy | Kigali-Rwanda

Gatera Moussa watoje Rayon Sports yagizwe umutoza wa Espoir FC

Yanditswe na BUGINGO FIDELE

Ku ya 10-06-2020 saa 22:33:07
Gatera Moussa (ibumoso) ubwo yasinyaga amasezerano y'imyaka 2 yo gutoza ikipe ya Espoir FC

Nyuma yo gutandukana n’abatoza bayo, ikipe ya Espoir FC  yamaze gusinyisha amasezerano y’imyaka 2 umutoza Gatera Moussa wigeze kua umutoza wungirije mu  ikipe ya Rayon Sports ndetse akaba n’umutoza mukuru w’Isonga FC.

Uyu mutoza yasinye aya masezerano kuri uyu wa Gatatu  tariki 10 Kamena 2020.  Kubera  icyorezo cya COVID-19, akarere ka Rusizi kakaba kari mu kato   uyu mutoza yasinyiye  amasezerano i Nyamasheke  ahari Perezida w’ikipe ya Espoir FC, Kamuzinzi Godfrey n’abandi bayobozi b’iyi kipe.

Mu by’ingenzi uyu mutoza yasabwe ni ukubaka ikipe  kandi ikazitwara neza mu mwaka w’imikino wa 2020-2021 ku buryo yazaza mu makipe 8 ya mbere cyangwa ikaza imbere.

Biravugwa ko Gatera Moussa azungirizwa na Kalisa Francois  wigeze kuba muri iyi kipe ubwo yari yungirije umutoza mukuru Ndayizeye Jimmy muri 2017

Ikipe ya Espoir FC mu mwaka w’imikino uheruka wa 2019-2020 yasoreje ku mwanya wa 14 n’amanota 17 aho  yari mu makipe ashobora gusubira mu kiciro cya kabiri. Uku kwitwara nabi kwatewe ahanini n’abari abatoza b’iyi kipe, Rukundo Jean de Dieu na Said Abed Makasi  batumvikanaga n’abakinnyi.

Uretse kuba iyi kipe yaratandukanye n’abari abatoza bayo yanarekuye na bamwe mu bakinnyi bayo ikaba ifite gahunda yo kubakira mu bakinnyi bakiri bato.

Umutoza Gatera Moussa nyuma yo gusinya amasezerano

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.