21°C , Partly sunny | Kigali-Rwanda
Gasore Serge , Umuyobozi wa Gasore Serge Foundation, n’umugore we bashyira indabo ku mva rusange iri mu rwibutso rwa Jenoside rwa Ntarama

Gasore Serge Foundation na MTN baremeye abarokotse Jenoside

Yanditswe na Nkomeje Guillaume

Ku ya 15-04-2019 saa 14:05:55

Umuryango Gasore Serge Foundation ‘GSF’, ku bufatanye na Sosiyete y’itumanaho MTN Rwanda bunamiye inzirakarengane zishyinguye mu rwibutso rwa Jenoside rwa Ntarama, mu Karere ka Bugesera banafasha abatishoboye barenga 70 barokotse Jenoside yakorewe Abatutsi mu 1994.

Iki gikorwa cyabimburiwe n’urugendo rwo kwibuka ‘Walk to remember’, rwakozwe n’abagize Umuryango Gasore Serge Foundation ndetse n’ubuyobozi bukuru n’abakozi ba MTN Rwanda.

Urwibutso rwa Jenoside rwa Ntarama, ahahoze ari Kiliziya Gatolika, Central ya Ntarama, rubitse amateka akomeye y’ubwicanyi ndengakamere bwahabereye kuko Abatutsi bahungiye i Ntarama bizeye kurokoka, si ko byagenze kuko bishwe urw’agashinyaguro, nk’uko byasobanuwe n’umukozi w’urwibutso, Umuganwa Marie Chantal.

Nyuma yo kwerekwa ibice bitandukanye bigize urwibutso rwa Jenoside rwa Ntarama, bagize umwanya wo kwibuka no kunamira inzirakarengane zirenga ibihumbi 5, zihashyinguye ari nako bashyira indabo ku mva rusange y’uru rwibutso.

Iki gikorwa cyo kwibuka cyasojwe no kuremera abatishoboye barokotse Jenoside yakorewe Abatutsi mu 1994, aho MTN Rwanda yatanze inka ebyiri z’inzungu, abandi bahabwa amatungo magufi n’ imyambaro.

Ndahimana Vincent uhagarariye MTN Rwanda, mu Ntara y’Uburasirazuba, na we yashyikirije Umunyamabanga Nshingwabikorwa w’Umurenge wa Ntarama, Uwamugira Marthe, inkunga y’amafaranga miliyoni imwe ikazakoreshwa mu gusana inzu uwarokotse Jenoside.

Bart Hofker, Umuyobozi mukuru wa MTN Rwanda yasabye Abanyarwanda kudaheranwa n’agahinda, ahubwo ko bakwiye kwibuka baharanira ko ibyabaye bitazongera kubaho mu Rwanda n’ahandi ku isi. Yanijeje Abanyarwanda ko biteguye gufatanya mu kurwanya Jenoside n’ingengabitekerezo yayo.

Umuyobozi w’Akarere ka Bugesera, Mutabazi Richard, yavuze ko kwibuka no kunamira Abazize Jenoside ari igikorwa kiza. Yashimiye ubufatanye bwa Gasore Serge Foundation na MTN Rwanda, kuba batekereje kuremera abatishoboye kuko biri mu murongo wo gushyigikira abarokotse Jenoside.

Gasore Serge wamenyekanye mu gukina imikino ngororamubiri, warokokeye i Ntarama, akaba ari we washinze akanayobora Gasore Serge Foundation, isanzwe ikora ibikorwa bitandukanye byo gufasha abatishoboye yasabye abarokotse Jenoside kudaheranwa n’agahinda ahubwo bagaharanira kwiyubakamo ikizere cy’ubuzima.

Nyirambabazi Sezariya umwe mu bahawe inka, atuye mu Kagari Cyugaro, Umurenge wa Ntarama ufite abana 3 yatangaje ko guhabwa inka ari ibintu yishimiye, akemeza bizamufasha kugira ubuzima bwiza no kwiteza imbere.

Sosiyete ya MTN Rwanda yatangiye nyuma y’imyaka ine Jenoside yakorewe Abatutsi ibayeho (1998), yatanze miliyoni 2 z’amafaranga y’u Rwanda azafasha mu bikorwa byo gutunganya urwibutso rwa Jenoside rwa Ntarama.

Bart, Umuyobozi wa MTN n’umugore we ndetse na Mutabazi Richard umuyobozi w’Akarere ka Bugesra bashyira indabo ku mva rusange mu rwibutso rwa Jenoside rwa Ntarama

Umukozi w’urwibutso, Umuganwa Marie Chantal asobanura amateka y’ubwicanyi bwakorewe i Ntarama

Umuganwa Marie Chantal, Umukozi w’urwibutso asobanura amateka y’ubwicanyi bwakorewe i Ntarama

Gasore Serge , Umuyobozi wa Gasore Serge Foundation, n’umugore we bashyira indabo ku mva rusange iri mu rwibutso rwa Jenoside rwa Ntarama

Abagize Umuryango Gasore Serge Foundation mu rugendo rwo kwibuka rwahereye ku Kigo ukoreramo

Abagize Umuryango Gasore Serge Foundation mu rugendo rwo kwibuka

Abahawe inka bifotozanyije n’abayobozi batandukanye bari bitabiriye igikorwa cyo kwibuka

Abatishoboye barokotse Jenoside yakorewe Abatutsi mu 1994 bahawe amatungo magufi

Amashati n’ibitenge ni imwe mu myambaro yahawe abatishoboye abarokotse Jenoside yakorewe Abatutsi mu 1994

Bart Hofker, Umuyobozi mukuru wa MTN Rwanda

Gasore Serge, umuyobozi wa Gasore Serge Foundation

TANGA IGITEKEREZO

Leave a Reply

Your email address will not be published. Required fields are marked *