23°C , Mostly cloudy | Kigali-Rwanda

Gasore Serge Foundation bunamiye abazize Jenoside bashyinguye mu rwibutso rw’i Ntarama

Yanditswe na NKOMEJE GUILLAUME

Ku ya 13-04-2018 saa 09:22:13

Umuryango Gasore Serge Foundation “GSF”, wunamiye Abazize Jenoside yakorewe Abatutsi muri Mata 1994 bashyinguye mu rwibutso rwa Jenoside rw’i Ntarama, mu karere ka Bugesera mu Ntara y’i Burasirazuba.

Iki gikorwa cyabaye ejo hashize tariki 12 Mata 2018, cyabimburiwe n’urugendo rwo kwibuka, uyu muryango wa GSF wari wifatanyije n’abaturage b’i Ntarama, beretswe ibice bitandukanye bigize Urwibutso rwa Ntarama aho basobanuriwe amateka y’ibyabereye i Ntarama muri Jenoside yakorewe Abatutsi.

Ubwo abaturutse muri Gasore Serge Foundation bari kumwe n’abaturage basobanurirwaga amateka ya Jenoside yakorewe Abatutsi i Ntarama

Muri uyu mwaka 2018 ubwo hibukwaga ku nshuro ya 24 Jenoside yakorewe Abatutsi mu Rwanda, Gasore Serge uyobora uyu muryango, wateguye iki gikorwa yagize ati:  “Igikorwa cy’uyu munsi, nk’uko mubizi, mu Rwanda turi mu gihe cyo kwibuka inzirakarengane z’Abatutsi zishwe muri Jenoside, tukaba twibutse nk’umuryango ukorera hano mu Bugesera, by’umwihariko mu murenge wa Ntarama, twibutse abavandimwe n’abaturanyi biciwe muri Ntarama ari naho natwe ba nyiri ubwite twari turi mu gihe cya Jenoside yakorewe Abatutsi”.

Gasore na we warokokeye i Ntarama, yasabye abatuye muri aka gace n’Abanyarwanda muri rusange ko badakwiye guheranwa n’amateka mabi yabayeho mu gihugu ahubwo ko bakwiye kwibuka biyubaka baharanira ko bitazongera kubaho.

Ati “Ubutumwa natanga ku Banyarwanda bose, ni uko ibyabaye byarabaye, dukwiye kwibuka abacu bazize Jenoside, ariko bikaba ikintu kidutera imbaraga kugira ngo tucyuririreho twiyubaka tureke guheranwa n’amateka ahubwo ayo mateka mabi yabaye tuyahindure ntazongere kubaho”.

Mukantwari Berthilde, Umunyamabanga Nshingwabikorwa w’Umurenge wa Ntarama wari witabiriye iki gikorwa, yibukije abaturage batuye i Ntarama n’Abanyarwanda muri rusange ko ibyo bakora n’ibyo batekereza byose bagomba guharanira kubaho kandi bakabaho neza.

Yabasabye ko muri iki gihe cyo kwibuka, bakwiye gufatana mu mugongo kandi bakibuka biyubaka nk’uko biri mu nsanganyamatsiko y’uyu mwaka. Ati “Dukwiye kumenya igihe turimo kiruhije ku barokotse Jenoside, ngasaba y’uko aho buri wese ari urushije imbaraga uwundi yamufata mu mugongo, ari nabyo bikubiye mu nsanganyamatsiko y’uyu mwaka ari yo “Kwibuka twiyubaka”.

Nyuma y’iki gikorwa cyo kwibuka, uyu muryango wa Gasore Serge Foundation baremeye ndetse banataha inzu basaniye Uwamahoro Letithia, warokotse Jenoside yakorewe Abatutsi muri Mata 1994.

Uyu muryango wa “Gasore Serge Foundation” washinzwe na Gasore Serge usanzwe ukorera mu karare ka Bugesera, Umurenge wa Ntarama, basanzwe bagira ibikorwa birimo ibya siporo n’imyidagaduro, iby’ubujyanama ku ihungabana, ubuvuzi, ubworozi n’ibindi, byose bikaba bigamije kurengera abafite ibibazo bitandukanye.

TANGA IGITEKEREZO

Leave a Reply

Your email address will not be published. Required fields are marked *