Gasogi United yiteguye  kwihimura kuri Mukura

Yanditswe na BUGINGO FIDELE

Ku ya 15-02-2020 saa 00:16:42
Perezida wa Gasogi United, KNC (ibumoso) n'umutoza mukuru Guy Bukasa (iburyo) bavuga ko biteguye kwihimura kuri Mukura

Tariki 15-02-2020

Gasogi United-Mukura (Regional-15h00)

Kuri uyu wa Gatandatu tariki 15 Gashyantare 2020, ikipe ya Gasogi United irakira Mukura mu mukino w’umunsi wa 20, umukino urabera kuri Sitade ya Kigali i Nyamirambo saa kenda  (15h00).

Uyu ni umukino wa shampiyona   wo kwishyura, umukino ubanza wabaye tariki 26 Ukwakira 2019, Mukura yatsindiye Gasogi United i Huye  ibitego 2-1 gusa mu ikipe ya Gasogi United bavuga ko  basifuriwe nabi.

Perezida w’ikipe ya Gasogi United, Kakooza Nkuriza Charles “KNC”  avuga ko  Mukura nta bwoba  ibateye ko biteguye kuyihimuraho kandi ko nabo baza biteguye ko bagiye guhura n’ikipe ikomeye. Yakomeje avuga ko ibyababayeho i Huye mu mukino ubanza bitangomba kongera.

Umunyamabanga mukuru w’ikipe ya Mukura, Siboyintore Theodate  avuga ko  nk’uko byagenze mu mukino ubanza biteguye gutsinda Gasogi United.

Umukino wa shampiyona uheruka  w’umunsi wa 18,  ikipe ya  Mukura yitwaye neza itsinda Gicumbi FC ibitego 3-0 mu gihe ikipe ya Gasogi United yatsinzwe na Police FC ibitego 2-0.

Guy Bukasa, umutoza mukuru wa Gasogi United yagize ati :“Ni byo umukino uheruka twaratsinzwe gusa twariteguye bihagije, abakinnyi bafite morari kandi intego ni imwe ni ugutsinda ikipe ya Mukura.”

Ku ruhande rwa Mukura, Niyonkuru Ramadhan usanzwe ari kapiteni wungirije  atangaza ko nabo biteguye neza  kandi ubu mu ikipe harimo umwuka mwiza  kuko bamaze iminsi bitwara neza. Yakomeje avuga ko nk’abakinnyi aya amanota 3 bayashaka.

Ibiciro byo kwinjira kuri uyu mukino ni ibihumbi 10 mu  cyubahiro, ibihumbi 5 iruhande rwaho, ibihumbi 2 ahatwikiriye ndetse na 1000 ahasigaye hose.

Uyu mukino urasifurwa n’umusifuzi mpuzamahanga, Ishimwe Claude  uza kuba yungirijwe na  Mutuyimana Dieudonne nawe usanzwe ari umusifuzi mpuzamahanga na Mugabo Eric  naho umusifuzi wa  kane akaba ari Irafasha Emmenuel.

Mbere y’uko izi kipe zihura, ikipe ya Mukura iri ku mwanya wa 4 n’amanota 31 naho Gasogi United ikaba ku mwanya  wa 11 n’amanota 22.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.