21°C , Partly cloudy | Kigali-Rwanda
Dr. Gashumba Diane asaba ababyeyi kubyara abo bashoboye kurera (Foto Ngaboyabahizi P)

Gashumba: Umugore ubyara buri mwaka aba yiyongerera ibyago byo gupfa

Yanditswe na NGABOYABAHIZI PROTAIS

Ku ya 14-10-2018 saa 19:23:45

Minisitiri w’Ubuzima Dr. Gashumba Diane yabwiye ababyeyi ko umugore ubyara indahekana aba yiyongerera ibyago, akaba ashobora kubura ubuzima.

Yabigarutseho ubwo hasozwaga ku mugaragaro icyumweru cyahariwe ubuzima bw’umwana n’umubyeyi mu karere ka Burera.

Minisitiri w’Ubuzima, Dr Diane Gashumba, yabwiye ababyeyi ko kubyara indahekana ari inzira iganisha ku rupfu ndetse n’ubukene.

Yagize ati: “Umugore ubyara buri mwaka, aba yiyongerera ibyago byo gupfa kuko ababyeyi benshi dupfusha, bapfa rimwe na rimwe bazize kuva mu gihe babyara; baba bagiye kubyara inda guhera ku mbyaro ya kane gusubiza hejuru.

Dr. Gashumba Diane asaba ababyeyi kubyara abo bashoboye kurera (Foto Ngaboyabahizi P)

Ikindi kandi kubyara abo udashoboye kurera uba uhaye umutwaro ukomeye umuryango n’igihugu, kuko bigorana mu kubateganyiriza ndetse no mu igenamigambi, kandi bituma abana baba inzererezi, bikabagiraho ingaruka zirimo guterwa inda zitateguwe, guta ishuri n’izindi”.

Minisitiri Dr. Gashumba yavuze ko umubyeyi utwite akwiye kwipimisha inshuro 4 kugira ngo abaganga bamukurikirane azabyare neza, kandi yabasabye kurwanya igwingira ry’abana, biciye mu kuboneza urubyaro.

Nyiramukiza Alvera wo mu Murenge wa Kagogo ni umubyeyi w’imyaka 35, avuga ko kugeza ubu agize imbyaro 8, yemeza ko kubyara indahekana bituma umubyeyi atagira imibereho myiza.

Yagize ati: “Mfite imbyaro 8, nabyaraga umwana nkamukurikiza ntaramara umwaka, ibi byatumaga ntakora indi mirimo, ngahora mpetse abana, mbategurira amafunguro, umugabo na we yaza agasanga nta cyo ndakora. Byanteye ubumuga, guhora mpetse ubundi nkikiye ni umurimo ukomeye.

Iyo umugore abyara indahekana, ndakubwira ko nta mutekano uba mu rugo ni amakimbirane gusa, nyuma y’aho rero naje kuboneza urubyaro ariko bingoye. Ubu twateye imbere umutekano ni wose urabona ko meze neza ubu mfite ibiro 70, nyamara nta bwo narenzaga ibiro 50, utaboneza urubyaro aba na we yinaniza”.

Igenzura ryakozwe mu 2015 ku mibereho y’abaturage mu Rwanda riba inshuro imwe mu myaka itanu, ryerekanye ko ababyeyi bapfa mu gihe cyo kubyara bageze kuri 210 ku bihumbi 100 mu 2015.

Minisiteri y’Ubuzima itangaza ko Abanyarwanda bakoresha uburyo bwo kuboneza urubyaro biyongereyeho 4% mu 2000, na 45% mu 2010 na ho mu 2015 biyongerera 48%. Kugeza ubu mu karere ka Burera; kuboneza urubyaro bihagaze ku gipimo cya 34%.

TANGA IGITEKEREZO

Leave a Reply

Your email address will not be published. Required fields are marked *