19°C , Mostly cloudy | Kigali-Rwanda
Gashugi Andre, Umuyobozi mukuru w'Ikigo RNIT mu kiganiro n'umunyamakuru (Foto Gisubizo G)

Gashugi: Nta mukozi wa Leta utakwizigamira ayo yaba ahembwa yose

Yanditswe na MUTUNGIREHE SAMUEL

Ku ya 08-10-2018 saa 16:41:09

Umuyobozi mukuru w’Ikigo k’Ibigega by’Imari mu Rwanda (RNIT) asanga nta mukozi wa Leta utakwizigamira mu mafaranga ahembwa uko yaba angana kose.

Gashugi André avuga ko hari uburyo bwinshi umukozi wa Leta ashobora kwifashisha burimo n’ubwatuma adakora ku mushahara asanzwe abona buri kwezi.

Gashugi asobanura ko akenshi nta na rimwe umukozi azigera asagura amafaranga ku mushahara we ngo abone gutekereza kwizigamira ahubwo kwizigamira bikorwa mbere.

Ati “Kwizigamira ni ugufata mu yo wabonye ukavanamo ubwizigame bwawe, bijyanye n’intego yawe ushaka kuzageraho, noneho ayasigaye akaba ari yo ukoresha mu buzima bwa buri munsi.

Niba uri umukozi wa Leta, ugafata nka 10% y’amafaranga uhembwa ukaba wayashyira ku ruhande, ukavuga ngo umwaka uzajya kurangira nibura mfite angana cyangwa arutaho umushahara wange umwe w’ukwezi nshobora kuba narizigamiye. Kandi ibyo bikaba ari ku nyungu yawe kuko mu gihe icyo ari cyo cyose wazakenera ya mafaranga wayabona”.

Gashugi Andre, Umuyobozi mukuru w’Ikigo RNIT mu kiganiro n’umunyamakuru (Foto Gisubizo G)

Akomeza avuga ko hari n’ubundi buryo umukozi ashobora gukoresha yizigamira kandi adakoze ku mushahara we mu gihe bishoboka ko byamubangamira mu byo yari asanzwe akoresha umushahara we.

Ati “Ikindi ku bakozi ba Leta kandi, iyo umwaka urangiye hari ubwasisi babona (bonus), ayo ni amafaranga baba batateganyije kandi bashobora kuyakoresha mu buryo bwo kwizigamira bateganya ejo habo heza. Hari abandi babona ibyo bita ‘Horizontal Promotion’, kuzamurwa mu ntera.

Iyo umuntu yazamuwe, ku mushahara we naho hari ikiyongeraho ariko ugasanga uwo mukozi akomeje kuba muri bwa buzima yari afite, na ya mafaranga abonye mu kuzamurwa mu ntera ntushobore kumenya aho yagiye kandi ashobora kuyafata akaba ari yo akoresha mu bwizigame bwe kugira ngo azagire umushinga azakora, icyo ageraho kuko atari asanzwe ayabona.”

Mu buryo bwo gufasha abo bakozi bahembwa umushahara uhoraho, Leta yashyizeho ikigega ‘RNIT Iterambere Fund’, gifasha abakozi kwizigamira hagamijwe ishoramari aho umukozi aha uburenganzira banki ahemberwamo cyangwa umukoresha we buri kwezi akajya afata umubare w’amafaranga runaka akayashyira mu kigega mu buryo bwo kuzigamira umukozi.

Ku bikorera, abacuruzi n’abantu ku giti cyabo bashobora kubona amafaranga ahoraho cyangwa adahoraho, abahinga ibihingwa byera mu gihe runaka n’abandi, nabo bashyiriweho uburyo bwo kwizigamira muri icyo kigega.

Gashugi ati “Amafaranga abantu baba bayafite; tuvuge hari nk’abantu batwerera abandi bakoze ubukwe ariko nk’ikigega Iterambere Fund twababwira kwizigamira mu buryo bwo kwitwerera ku giti cyabo bakayabura kandi bashobora kubona ayo baha abandi.

Kwa kundi wigomwa utwerera abandi na we wakwigomwa witwerera ku ruhande kugira ngo witeganyirize ejo hazaza kuko ibibazo duhura nabyo mu buzima ni byinshi umuntu ntiyabimenya ariko na none iyo ufite icyo wibikiye biba bishobora kugira icyo byakumarira.”

Muri gahunda y’imyaka irindwi ya Guverinoma (NST1) 2017-2024, mu buryo bwo kwizigamira, hazashyirwa mu bikorwa gahunda yemejwe yo kwizigamira mu gihe kirekire aho Abanyarwanda bo mu ngeri zose, cyane cyane abakora mu rwego rw’imirimo itanditse (informal sector) bazashishikarizwa kwitabira ubu bwizigamire kugira ngo bashobore kubona ibibafasha mu masaziro kugeza ubu byahabwaga gusa abakozi bakorera imishahara.

Ubu buryo kandi buzafasha abizigamiye igihe kirekire kwigurira amacumbi no kwiyishyurira amashuri y’abana babo ndetse ayo mafaranga yose azigamwe afashe no kongera ishoramari mu gihugu.

TANGA IGITEKEREZO

Leave a Reply

Your email address will not be published. Required fields are marked *