19°C , Mostly cloudy | Kigali-Rwanda

Gakenke: Ikiraro cyadindizaga ubuhahirane hagati ya Cyabingo na Rwaza kiruzura mu mezi 2

Yanditswe na NGABOYABAHIZI PROTAIS

Ku ya 26-02-2018 saa 11:04:34

Abaturage bo mu mirenge ya Cyabingo na Rwaza, barishimira ko imirimo yo gusana ikiraro cyari cyaradindije ubuhahirane igiye kurangira, bakaba biteguye kukibyaza umusaruro biteza imbere.

Iki kiraro kizafungura ubuhahirane mu turere tubiri (Foto Ngaboyabahizi P)

Iki kiraro gihuza abaturage bo mu mirenge ya Rwaza wo mu karere ka Musanze, na Cyabingo yo mu karere ka Gakenke, kuba cyari cyarasenyutse bikaba byadindizaga iterambere ry’ubukungu, bikanabangamira abana bakinyuragaho bajya kwiga.

Ntuyahaga Denis wo mu murenge wa Cyabingo yagize ati:“Iki kiraro kiri kubakwa hano ni kimwe mu bizatuma abana bacu bambuka bajya ku ishuri twizeye  ko bagaruka amahoro, mu gihe bamwe bahoraga bagwamo, abandi bagaherekezwa n’ababyeyi babo kugira ngo babambutse.

Ikindi kandi umusaruro wacu nk’ibitoki kubyohereza mu isoko rya Mukinga byari ikibazo gikomeye, mu gihe na bo twajyaga gufatayo ibisheke n’ibijumba tukagomba kuzenguruka umunsi wose, bamwe mu isoko rya Mukinga bari barafunze ibyumba byabo kubera kubura abakiliya.”

Yakomeje agira ati:“Turishimye rero ko ubuyobozi bwazirikanye ingorane twahuraga nazo zo guhera mu bwigunge”.

Umuyobozi w’Akarere ka Gakenke wungirije ushinzwe iterambere ry’ubukungu, Niyonsenga Aimé François, avuga ko koko iki kiraro cyari kibangamiye cyane abaturage, agahamya ko mu mezi abiri gusa kizaba cyuzuye ubuhahirane bugacumbukurwa.

Yagize ati:“Ni byo koko kiriya kiraro gihuza Umurenge wa Rwaza  wo muri Musanze na Cyabingo cyari ikibazo kuko wasangaga kicara gisenyuka, kandi ni mu gihe cyari kimaze imyaka myinshi kandi cyubatse mu buryo butarambye, ubu rero akarere kiyemeje kucyubaka  mu rwego rwo kubungabunga umutekano ndetse no guteza imbere ubukungu no guha agaciro umusaruro w’abahinzi, no korohereza  abaturage kugera kwa Muganga.

Mu gihe nibura cy’amezi abiri kizaba kiri nyabagendwa, kuko imirimo yo kucyubaka igeze kuri 80%, urumva ko kiri mu nzira zo kuzura, kikaba rero kizuzura gitwaye miliyoni 40 z’amafaranga y’u Rwanda”.

Uyu muyobozi akomeza avuga ko abaturage bakwiye kugifata neza birinda kucyangiza, kandi bakibyaza umusaruro, kikazababera intandaro yo kuba abakire.

TANGA IGITEKEREZO

Leave a Reply

Your email address will not be published. Required fields are marked *