21°C , Intermittent clouds | Kigali-Rwanda
Minisitiri w'Intebe Dr Ngirente agezwaho uburyo abatujwe mu mudugudu wa Nyundo babyaza umusaruro inka bahawe

Gakenke: Barashima Leta yabatuje mu mudugudu w’icyitegererezo

Yanditswe na Sezibera Anselme

Ku ya 13-08-2019 saa 19:00:24

Bamwe mu baturage bo mu Karere ka Gakenke barashima Leta uburyo yavanye mu manegeka ikabatuza mu mudugudu mwiza w’ikitegererezo, ndetse ikanatekereza uburyo bagomba gutangira ubuzima bushya ibagenera amatungo kuri buri muryango. Nyirabatemberezi na Bamurange ni bamwe muri abo baturage bimuwe babashije kugira icyo batangariza Imvaho Nshya.

Nyirabatemberezi Clemantine, ni umugore wubatse ufite abana 3 n’umugabo umaze imyaka ibiri avanywe mu manegeka yo mu kagali ka Rutenderi, umurenge wa Mugunga akarere ka Gakenke atuzwa mu mudugudu w’ikitegererezo uherereye mu mudugudu wa Nyundo, akagali ka Rutenderi mu murenge wa Mugunga mu karere ka Gakenke.

Nk’uko abitangariza Imvaho Nshya, Nyirabatemberezi avuga ko aho yari asanzwe atuye hari habi cyane kandi agahora afite impungenge z’uko ibiza byaza bikabangiriza ubuzima hanyuma ubuyobozi buza kuhabakura bubatuza muri uwo mudugudu mushya.

Nyirabatemberezi avuga ko nta mpinduka mbi zamubayeho kuko yimuwe aho yari atuye kuko iby’ibanze umuturage aba atunze n’ubu aho yimuriwe akibitunze kandi akibibonaho umusaruro ubasha gutuma abaho bisanzwe akaba abishimira ubuyobozi bwabatekereje.

Agira ati: “Nari mfite amasambu mato mato mpingamo imyaka bikambeshaho n’umuryango wange, mfite inka noroye ndetse n’inzu yange nk’umuturage uciriritse nari nyifite ariko iri ahantu hateye impungenge mu manegeka.

Ibyo byose rero n’ubu ndacyabifite ariko ikibazo kimbangamira ni ukujyayo kubifata kubera ko ntabyegereye simbona uko mbisarura bigatuma bimwe babinyiba nkazana utwo nshoboye. Mbese aha ngaha ndi mu mudugudu mfite inka gusa ariko nabyo ndabishimira Imana n’ubuyobozi bwiza bwabonye ko twahura n’ibigeragezo bukadutuza aha hantu heza hatekanye n’umuryano wange, ubu rwose ndanyuzwe”.

Nyirabatemberezi agaragaza zimwe mu mbogamizi avuga ko kubona mituweri bikibabereye inzitizi agasaba ko baterwa inkunga y’amatungo magufi (ihene, ingurube) borora kugira ngo babashe kuyabyazamo iyo mituweri kubera ko inka buri muryango wahawe ukigera muri uwo mudugudu batatinyuka kuyigurisha.

Uwitwa Bamurange Bernadetta avuga ko nta mukecuru ukigunze kuko Leta y’ubumwe yabagiriye neza ikabatuza ahatekanye hatarangwa amanegeka, ikabaha amatungo (inka) bororera aho batujwe, ndetse agaragaza impungenge aterwa n’abajura babiba amatara yo kubiraro bashaka kubiba amatungo yabo. Bamurange yaboneyeho gusaba ubuyobozi amatara y’umutekano ashinze hejuru ku mapoto kugira ngo babashe gucungira ayo matungo hafi umutekano wayo.

Agaragariza ubuyobozi kandi ko nyuma yo gutuzwa muri uwo mudugudu w’ikitegererezo babashije nabo gushinga ishyirahamwe kugira ngo bage baterana inkunga yo kubasha kuvuza amatungo yabo igihe yahuye n’uburwayi, ibyo bakaba babikesha inama bagiriwe n’umunyamabanga Nshingwabikorwa w’umurenge wa Mugunga.

Nk’uko na we abigarukaho, avuga ko mituweri ikiri imbogamizi kuri bamwe ariko ahamiriza abayobozi ko abenshi muri bo ari abayitanze bakayishyura.

Minisitiri w’Intebe Dr. Ngirente Edouard yamaze impungenge abo baturage kandi abemerera gukemura ibibazo bagaragaza uko ubushobozi bw’igihugu buzaba bubibashoboza kandi abahamiriza ko ibindi bagikeneyeho inama ubuyobozi bw’intara ndetse n’ubw’akarere ka Gakenke buzagenda bubegera bagafatanya kubishakira umuti.

Gusura abaturage batujwe muri uwo mudugudu wa Nyundo muri Gakenke, ni kimwe mu bikorwa bitandukanye byaranze uruzinduko rwa Minisitiri w’Intebe mu mpera z’iki cyyumweru gishize.

Minisitiri w’Intebe Dr Ngirente agezwaho uburyo abatujwe mu mudugudu wa Nyundo babyaza umusaruro inka bahawe

TANGA IGITEKEREZO

Leave a Reply

Your email address will not be published. Required fields are marked *