18°C , Intermittent clouds | Kigali-Rwanda

Gakenke: Abafite amashanyarazi bavuye kuri 1.8% bagera kuri 30 mu myaka 8

Yanditswe na Mugisha Benigne

Ku ya 12-07-2019 saa 15:08:06
Umuriro w'amashanyarazi uragenda ugera hose mu gihugu no mu Rwanda

Abaturage b’Akarere ka Gakenke bari bafite amashanyarazi bari ku kigero cya 1.8% mu mwaka wa 2010, ubu bageze kuri 30% mu mwaka hagendewe ku mibare ya 2018.

Nk’uko bisobanurwa na Niyonsenga Aimé Francois Umuyobozi wungirije w’akarere ka Gakenke ushinzwe ubukungu, ngo aka karere kari gafite abaturage bake bagerwaho n’umuriro w’amashanyarazi mu mwaka wa 2010, kuko bari ku kigero cya 1.8%, nyuma iterambere ryagiye ryegera aka karere ndetse na gahunda ya Leta yo kwegereza abaturage amashanyarazi yatumye ikigero cy’umuriro w’amashanyarazi kiva kuri 1.8% bigera kuri 30%, nk’uko bigaragazwa n’ubushakashatsi ku mibereho y’ingo (EICV5).

Niyonsenga avuga umuriro w’amashanyarazi wiyongereye mu Karere ka Gakenke batumye abaturage babona imirimo, bityo ubushomeri buragabanuka ndetse n’amafaranga agenda aoneka gake gake.

Ati “Nyuma y’uko umuriro w’amashanyarazi mu karere ka Gakenke uvuye kuri 1.8% ukagera kuri 30%, abaturage bashoboye kuwubyaza umusaruro, bagura ibyuma bisya ibigori, imyumbati, soya n’ubunyobwa. Hanabonetse abasudirizi, ni mu gihe abenshi bakeneraga gukoresha inzugi n’amadirisha by’ibyuma wasangaga babikoresha mu Karere ka Musanze.”

Avuga ko abaturage babyaje umusaruro umuriro w’amashanyarazi, aho bashinze ibyumba bogosheramo, gufoza inyandiko, gukonjesha ibinyobwa birimo amata, imitobe n’inzoga ngo bigurwe bimeze neza.

Niyonsenga avuga ko akarere ka Gekenke gafite amazi meza ku kigero cya 71%, nk’uko bigaragazwa n’ubushakashatsi ku mibereho y’ingo (EICV5) akaziyongera kuko harimo kubakwa indi miyoboro izongera ikigero cy’amazi gisanzweho.

Ati “Harimo kubakwa imiyoboro ituruka Rwisoko, Busengo na Mugunga igana ku bitaro bya Gatonde, harimo kubakwa kandi umuyoboro w’amazi uturuka i Janja ugana Rushaki.”

Avuga ko nyuma yo kubaka iyi miyoboro, abaturage 3000 baziyongera ku basanzwe bagerwaho n’amazi meza.

Niyonsenga kandi avuga ko hari undi muyoboro uzubakwa uturuka muri Kamubuga ugana mu Kivuruga, ukazaba ufite ibirometero 16.

Avuga ko mu myaka 4 iri imbere abaturage b’Akarere ka Gakenke bazaba bamaze kubona amazi ku kigero kisumbuyeho urebye ibikorwaremezo birimo gutunganywa n’umuvuduko biriho.

Umuyobozi w’akarere wungirije ushinzjwe ubukungu kandi avuga ko kugeza ibikorwa remezo ku baturage bitazagorana n’ubwo aka karere kabarizwa mu bice by’imisozi miremire. Avuga ko nyuma y’ibiza bikomoka ku mvura byibasiye aka karere mu mwaka wa 2016, ngo hakozwe site 324 zitari mu manegeka akabije zishobora kubakwamo n’abaturage.

Ati “Kuva twahura n’ibiza muri 2016 bikadutwara ubuzima bw’abantu, twahise dushaka site zitari mu manegeka akabije abantu bakwimurirwamo, kuri ubu abantu batangiye kuzubakamo bava mu manegeka akabije bari batuyemo, birangenda bifata umurongo.”

Niyonsenga asaba abaturage b’akarere ka Gakenke kwitabira kubaka muri izi site kugira ngo bave mu manegeka akabije batuyemo, bityo birinde kongera guhura n’ibiza ndetse n’ibikorwaremezo by’amazi, amashanyarazi, amashuri n’amavuriro bibagereho.

Umuriro w’amashanyarazi uragenda ugera hose mu gihugu no mu Rwanda

Tanga Igitekerezo

Email yanyu ntigaragazwa ku rubuga. Amazina na Email ni ngombwa.