17°C , Partly cloudy with thunderstorms | Kigali-Rwanda
Ubushakashatsi bwagaragaje ko Abanyarwanda basaga 80% bagaragariza CNUR ko gahunda za Leta zigamije gukura abaturage mu bukene, zifite akamaro mu guteza imbere ubumwe n'ubwiyunge

Gahunda zo kuzamura abatishoboye, igisubizo ku bumwe n’ubwiyunge

Yanditswe na MUKAGAHIZI ROSE

Ku ya 04-01-2018 saa 09:05:26

Abanyarwanda basaga 80% bagaragariza Komisiyo y’Igihugu y’Ubumwe n’Ubwiyunge (NURC) ko gahunda za Leta zigamije gukura abaturage mu bukene zifite akamaro mu guteza imbere ubumwe n’ubwiyunge, nk’uko bigaragazwa n’Ubushakashatsi “Rwanda Reconciliation Barometer” bw’iyi Komisiyo.

Ubu bushakashatsi bwakozwe mu mwaka wa 2015, bugaragaza ko gahunda za Leta zirimo Ubudehe, Vision Umurenge Program (VUP), Girinka n’izindi;  ziha amahirwe angana Abanyarwanda bose kuko zifasha abadafite amikoro gutera imbere, kandi zikabafasha kwishyira hamwe no kwiyunga ubwabo.

Ubushakashatsi bwagaragaje ko Abanyarwanda basaga 80% bagaragariza CNUR ko gahunda za Leta zigamije gukura abaturage mu bukene, zifite akamaro mu guteza imbere ubumwe n’ubwiyunge

Muteteri Claudine, umukozi ushinzwe imibereho myiza mu murenge wa Rusiga, mu karere ka Rulindo, avuga ko gahunda ya VUP igizwe n’inkunga y’ingoboka ihabwa abantu bashaje badafite umuntu n’umwe mu miryango ushoboye gukora, hakaba n’igice kindi cyo gutanga imirimo ku bashoboye gukora bagize imiryango iri mu kiciro cya mbere cy’ubudehe, kugira ngo umushahara bahembwa ubashe kubatungana n’abatishoboye bo muri iyo miryango.

Muteteri akomeza asobanura ko VUP inafite ishami ry’ubufasha bukomatanyije, aho imiryango imwe n’imwe ihabwa inkunga y’ingoboka n’umushahara w’imirimo y’amaboko ndetse n’amatungo magufi atatu wihitiyemo;  cyangwa zimwe muri izo nkunga.

Asobanura kandi gahunda y’Ubudehe, ko muri buri mudugudu hatoranywamo umuturage utishoboye buri mwaka,  agahabwa amafaranga ibihumbi mirongo itandatu yakwifashisha mu kwiteza imbere.

Indi gahunda akomeza asobanura ni iy’Ikigega FARG gifasha abarokotse Jenoside yakorewe Abatutsi batishoboye, bamwe bakaba bahabwa inkunga y’ingoboka gusa ariko abageze mu za bukuru b’inshike bakitabwaho mu buryo bwihariye.

Indi gahunda ifasha  abatishoboye  ni Girinka, aho muri buri mudugudu batoranya abaturage bakabatondekanya hashingiwe ku bakennye kurusha abandi, buri muryango utahiwe ukajya uhabwa inka; yaba ibyaye inyana ya mbere uwo muryango ukayigabira undi muryango utishoboye.

Muteteri akomeza agira ati “Ibi bikorwa byo gutoranya abaturage batishoboye no kubafasha bishimangira urukundo kuko bibera mu mudugudu, abaturage ubwabo bakihitiramo  abagomba gufashwa kandi abo bafashijwe bishyira hamwe bagakora amatsinda yo kwigishanya no gufashanya. Byongeye kandi, abantu bari bazi ko batatunga inka na bo barazifite”.

Umuturage utuye i Rusiga ashima Leta y’Ubumwe iyobowe na Perezida wa Paul Kagame kuba yarabanje kubigisha ‘Ndi Umunyarwanda’, ibasobanurira ko abaturage bose ari bamwe, izina Umuhutu, Umututsi cyangwa Umutwa ritagihabwa intebe.

Agira ati “Amatsinda duhuriramo turi ingeri zitandukanye, nta muntu uvuga ngo uriya ni Umututsi, Umuhutu, cyangwa Umutwa; turahura tukaganira, abantu banasabanamo imbabazi. Nabaye Perezida w’urukiko Gacaca, nyuma y’aho rurangirije imirimo hari umuntu turi kumwe mu itsinda wavugaga ko azanyica kuko ngo natumye acibwa amafaranga menshi, ariko twarahuye ansaba imbabazi”.

Mugenzi we warokotse Jenoside ashimangira ko imibereho ye yazamuwe n’inkunga yahawe yo  kubakirwa inzu na FARG,  akaba afashwa na VUP; ndetse akaba ahamya ko abanye neza n’abo bari kumwe mu itsinda bamusabye imbabazi nyuma yo kumwicira abantu muri Jenoside yakorewe Abatutsi mu 1994.

Abaturage bahabwa inkunga zitandukanye barimo abarokotse Jenoside, abahungutse bavuye mu mahanga n’abakoze Jenoside barangije ibihano ndetse bakabisabira imbabazi;  bashimangira ko ibikorwa byo kuremera abatishoboye nta vangura ribigaragaramo rishingiye ku mateka ya buri wese.

Baba abayobozi mu nzego z’ibanze  n’abaturage bahabwa izi nkunga bashimangira ko uretse kuzamura imibereho yabo, gahunda zigamije kubakura mu bukene zishimangira urukundo zikanateza imbere ubumwe n’ubwiyunge.

TANGA IGITEKEREZO

Leave a Reply

Be the First to Comment!

avatar