17°C , Partly sunny | Kigali-Rwanda

Gahunda za Koperative Umwalimu SACCO zahinduye ubuzima bwa mwarimu

Yanditswe na Amani Claude

Ku ya Jul 11, 2018 saa 5:58

Koperative Umwalimu SACCO ni Koperative yo kuzigama no kuguriza abarimu  n’abandi batanga serivisi  zishamikiye ku burezi yashyizweho ku gitekerezo cya Nyakubahwa Perezida wa Repubulika Paul Kagame. Kuri ubu,  ikomeje gufasha abarimu gukataza mu iterambere.

Umwalimu SACCO

Muri iyi myaka 24 ishize u Rwanda rwibohoye, gahunda za Koperative Umwalimu SACCO zahinduye ubuzima bw’umwarimu. Hakozwe byinshi mu iterambere rya mwarimu bivuye muri gahunda nshya zashyizweho zo kuzamura imibereho n’ubukungu bya mwarimu, bituma umwarimu agira aho ava ubu afite aho ageze mu iterambere.

Mu kiganiro n’Imvaho Nshya,   Uwambaje Laurence, Umuyobozi Mukuru w’Umwalimu SACCO yagarutse ku mpamvu Umwalimu SACCO yatekerejwe.

Yagize ati, “Impamvu Umwalimu SACCO yatekerejwe,  kwari ukugira ngo abarimu bishyire hamwe batange ubwizigame bwabo  bushyirwe hamwe hanyuma ikigo kibafashe guhabwa inguzanyo ku nyungu nto ugereranyije  n’iyo  bahabwagaho mu yandi mabanki ndetse bagire na  koperative  yabo bisangamo.”

Bamwe mu barimu bafite ubuhamya bukomeye bw’ukuntu gukorana n’umwalimu SACCO byabateje imbere

Uwambaje avuga ko iyo  urebye inyungu  yatangwaga mu yandi mabanki aho igeze ubu ku mpuzandengo ya 17% ariko abanyamuryango babo bo bakaba babasha guhabwa inguzanyo  ku nyungu ya 11% na 14% ku barimu  ba Leta ndetse  no ku barimu bo mu mashuri  yigenga ,usanga ari ikinyuranyo  cyo kwishimira dore ko bifitanye isano no kwesa imihigo bari biyemeje  yo gukora nk’ikigo  k’imari, harimo kwakira ubwizigame bw’abanyamuryango na bo bagafashwa  kubona inguzanyo zibafasha gukemura ibibazo bitandukanye ndetse n’izibafasha mu mishinga itandukanye bakora  yabafasha kugira ikindi biyongereraho nyuma y’umushahara bahabwa.

Ni na yo mpamvu Leta y’u Rwanda itahwemye gutera inkunga Umwalimu SACCO kugira ngo abarimu babashe kubona inguzanyo ku nyungu ntoya ugereranyije n’ahandi.

Kugeza ubu, abenshi mu banyamuryango  ba Koperative babashije kwiteza imbere mu buryo butandukanye: bamwe basezereye ubukode bubaka amazu yabo, abandi ntibagicungira ku mushahara wabo gusa kugira ngo ubuzima bwabo bukomeze ahubwo bafite indi mishinga ku ruhande ibyara amafaranga.

Imwe mu nzu ijyanye n’ikerekezo yuzujwe n’umunyamuryango w’Umwalimu Sacco

Byongeye kandi  abarimu  bashyiriweho uburyo bworoshye  ku bijyanye n’inguzanyo bafata mu buryo bwihuse ziswe ‘over draft’ na ‘emergence’ bashobora kuyihabwa  mu minota 5 gusa bageze kuri SACCO ndetse no ku Murenge SACCO kubera amasezerano y’ubufatanye. Ni mu gihe inguzanyo ku mushahara  uyu munsi itangwa kugeza ku myaka itatu (salary advance) bayihabwa kuva ku munsi umwe kugera kuri 2, habamo ikibazo bikageza kuri itatu.

Inguzanyo  zo kubaka cyangwa kugura inzu  n’iz’imishinga y’ubucuruzi,ubuhinzi cyangwa ubworozi ndetse n’ubundi bwoko bwose  zo zitindaho gato kuko zo zisaba ko hakorwa ubusesenguzi bwimbitse hagamijwe kubafasha kuyibaha  mu buryo butazabaremerera ariko na zo iyo ibisabwa byose bihari ntizirenza igihe kiri hagati y’ibyumweru bitatu na bine .

Abarimu bishyura neza

Ibijyanye no kwishyura inguzanyo,   abarimu bashimwa kwishyura neza kuko hari uburyo bwo gukurikirana  uko umushinga ushyirwa mu bikorwa dore ko  ubusanzwe umushinga upfira mu kuwushyira mu bikorwa nabi.Kugeza ubu ibipimo by’inguzanyo zitishyurwa neza ntibikanganye.

Uwambaje atanga urugero “Nk’urugero uje akeneye  inguzanyo y’umushinga wo korora inkoko turawiga, tukawukorera ubusesenguzi, tukayamuha ariko noneho tukayamuha mu byiciro, tukajya tugenda dukurikirana uko ashyira mu bikorwa wa mushinga  ari nako dukora raporo y’ibimaze gukorwa tukabona gutanga ikiciro gikurikiyeho.”

Ibi kandi abanyamuryango bakaba babyishimira kuko babona bibafasha gukoresha amafaranga bahabwa mu nguzanyo icyo yagenewe .

Kugeza ubu, muri rusange ni nkaho  abarimu  bose bamaze gufata inguzanyo zijyanye no gukemura ibibazo bya buri munsi.

Hagamijwe gukomeza kuborohereza kubona serivisi nziza kandi hafi, uburyo bwo gukoresha ikoranabuhanga bwahawe agaciro .

By’akarusho, nyuma yo kubona ko ubwizigame  buhoraho budahagije,  abanyamuryango bakangurirwa umuco wo kwizigamira  ku bushake kugira ngo na koperative yabo izarambe kandi na bo barusheho guteganyiriza ibyo bateganya gukora mu gihe kiri imbere.

Koperative umwalimu SACCO  irifuriza Abanyarwanda bose isabukuru nziza yo kwibohora.

Ubuyobozi bwa Koperative Umwalimu SACCO burifuriza Perezida wa Repubulika, Abanyarwanda bose, Ingabo z’Igihugu (RDF) na Polisi y’Igihugu umunsi mukuru mwiza wo kwibohora ku nshuro ya 24.

Muri iki gihe u Rwanda rwizihiza umunsi mukuru wo kwibohora,  abarimu barasabwa kugira umuco wo kwizigamira bakomeza kwibohora no ku bukene. Baributswa ko Umwalimu SACCO ihari kugira ngo ibafashe  kwiteza imbere ari nako hanatezwa imbere segiteri y’uburezi muri rusange.