22°C , Mostly cloudy | Kigali-Rwanda

Gahunda ya ‘Smartclass’ yafashije abana gukunda ishuri

Yanditswe na MUGISHA BENIGNE

Ku ya 13-02-2018 saa 06:46:36

Gahunda ya ‘Smartclass’ ni imwe muri gahunda ifasha kwigisha abana bo mu mashuri abanza n’ayisumbuye amasomo y’ikoranabuhanga, iri mu bikundisha abana ishuri.

Rimwe mu mashuri Imvaho Nshya yashoboye gusura ni ishuri ribanza rya Rambo, riherereye mu murenge wa Nyamyumba, Akarere ka Rubavu, aho abana biga isomo ry’ikoranabuhanga wanababaza ugasanga bafite ibyo bazi kandi bitari bike.

Umunyamabanga wa Leta muri MINEDUC yasuye abanyeshuri areba n’ukuntu bakoresha mudasobwa muri gahunda ya Smartclass

Imanishimwe Nadine ni umunyeshuri  wo mu mwaka wa 3 w’amashuri abanza, abasha gufungura mudasobwa ye, akinjira aho asabwe gukorera, akinjizamo imibare cyangwa amagambo asabwe, abasha kuyabika neza ngo azayasangemo nagaruka, akabasha no kuyizimya akanayifunga.

Bahati Steve nawe wiga mu mwaka wa 3 w’amashuri abanza, aganira n’Imvaho Nshya yayitangarije ko yigeze guta ishuri akaza kurigarurwamo ku bufatanye bw’ababyeyi n’ubuyobozi, ngo ariko mu byamushimishije agarutse mu ishuri, ni isomo ry’ikoranabuhanga biga kuko abasha kwegera mudasobwa, akayifungura, akandika akanayifunga.

Avuga kandi ko abasha kubonamo mudukino tumwe na tumwe dufasha abana gutyaza ubwenge, natwo tukamufasha kurushaho gufunguka no gutekereza.

Ku bijyanye n’isomo ry’Ikoranabuhanga, abarezi nabo bemeza ko riri mu byafashije abana  gukunda ishuri n’ubwo barivanamo ubumenyi bwisumbuyeho, cyane cyane ku bana bo mu mashuri abanza.

Irahoza Samuel ni umurezi, aganira n’Imvaho Nshya yayitangarije ko abana bo mu mashuri abanza bashimishwa cyane n’isomo ry’ikoranabuhanga, kuko babasha kubona mudasobwa, bakitegereza, bakayikoraho kandi bakayikoresha ibyo bababwiye gukora birimo kwandika amagambo, imibare n’udukino twagenewe abana.

Ati “Hari abana bishimira isomo ry’ikoranabuhanga ku buryo mwene abo bana batabasha kuva mu ishuri kuko babona izo mashini bigiraho bakarushaho kunezerwa. N’ubwo Minisiteri yazihaye amashuri ngo abana bagire ubumenyi mu ikoranabuhanga, ariko tumaze kuvumbura ko byanatumye hari abana bishimira kuba mu ishuri kubera gukoresha mudasobwa.”

Gahunda ya ‘Smartclass’ uyisanga no mu mashuri yisumbuye, nko mu Rwunge rw’amashuri rwitiriwe Umwamikazi w’intumwa rwa Rwaza, ruherereye mu Karere ka Musanze, Umurenge wa Rwaza.

Icyumba kigishirizwamo ikoranabuhanga ugisangamo mudasobwa nyinshi zihuye n’umubare w’abanyeshuri baza kuyigiramo, aho buri wese yigira kuri mudasobwa ye yihariye.

Nk’uko bisobanurwa na Sr Icyimanimpaye Leonie, ngo mu bintu byamushimishije ndetse bigashimisha n’abanyeshuri ngo ni ukubona mudasobwa mu cyumba kigirwamo ikoranabuhanga, aho umunyeshuri wese agira iye yigiraho, mu gihe mbere bigiraga kuri mudasobwa imwe ari 5.

Ati “Nishimiye ko REB yaduhaye mudasobwa zihuye n’umubare w’abana bigira mu ishuri rimwe, kuko buri wese abasha kubona iyo yigiraho atayifatanyije n’undi. Mbere  byarambabazaga iyo nabonaga abana bigira kuri mudasobwa imwe ari batanu, ariko ubu bimeze neza  bariga neza bakanakora n’ubushakashatsi bwabo.”

Iri shuri ribumbatiye uburezi bwa siyansi ribasha rifite amashami 4 ariyo Imibare, ubutabire n’ibinyabuzima (MCB), Imibare Ubugenge n’ikorabuhanga (MPC), Ubugenge, ubutabire n’ibinyabuzima (PCB), Ubugenge, ubutabire n’imibare (PCM).

Ababyeyi nabo bishimira uburyo abana babo bageze ku ikorabuhanga, aho babasha gukora kuri mudasobwa bakayifungura, bakandika bakanayizimya, bavuga ko ari iterambere rikomeye mu burezi kuko abize kera batigeze baryiga, ni mu gihe muri iki gihe umwana atangira kwiga isomo ry’ikoranabuhanga ari mu mashuri abanza.

Ku bijyanye n’ikoranabuhanga ryigishwa mu mashuri na gahunda ya Smartclass, Umunyamabanga wa Leta muri Minisiteri y’Uburezi ushinzwe amashuri y’inshuke, abanza n’ayisumbuye, Munyakazi Isaac, nawe wasuye abana biga ikoranabuhanga mu ishuri ribanza rya Rambo, yabashije kubegera bamubwira ibyo barimo gukora.

Nawe yishimiye ubumenyi bw’ikoranabuhanga abana bahabwa bakiri mu mashuri abanza, avuga ko isomo ry’ikoranabuhanga ari ngombwa ko abana batangira kuryiga bakiri bato, muri gahunda ya mudasobwa imwe ku mwana yaje guhinduka gahunda ya Smartclass.

TANGA IGITEKEREZO

Leave a Reply

Be the First to Comment!

avatar