Gahunda ya Miss Rwanda 2020: ahantu n’amatariki

Yanditswe na Ndamyirokoye François

Ku ya 02-12-2019 saa 15:18:31
Nyampinga w’u Rwanda 2019, Nimwiza Meghan

Rwanda Inspiration Back Up itegura irushanwa rya Miss Rwanda  yatangaje ahantu n’amatariki ajyanye n’igikorwa cy’amajonjora mu irushanwa rya Miss Rwanda 2020.

Hatangajwe ko iyi gahunda izatangira ku ya 21 Ukuboza 2019 ikarangira ku ya 18 Mutarama 2020.

Aya majonjora azatangirira mu Ntara y’Uburengerazuba mu Karere ka Rubavu kuri Western Mountain Hotel ku  itariki  ya   21 Ukuboza 2019 buke igikorwa gikomereze mu Ntara y’Amajyaruguru muri La Palme Hotel mu Karere ka Musanze.

Ku itariki ya 4 Mutarama 2020 amajonjora azakomereza mu Ntara y’Amajyepfo mu Karere ka Huye muri Hotel Credo. Ku ya  11 Mutarama 2020 hazatoranywa abakobwa bazahagararira Intara y’Uburasirazuba bibere i Kayonza muri Silent Hill Hotel, asozwe ku  itariki ya 18 Mutarama 2020 hatoranywa abazahagararira Umujyi wa Kigali bikazabera kuri Hill Top Hotel.

Amajonjora yose azajya atangira guhera i saa saba z’amanywa. Iki kiciro nikirangira hazakurikiraho gutoranya abazajya mu mwiherero ari na bo bazatorwamo Nyampinga w’u Rwanda 2020.

Nyampinga w’u Rwanda uzatorwa mu 2020 azasimbura Nimwiza Meghan kuri ubu uhagarariye u Rwanda mu irushanwa rya Miss World 2019 ririmo kubera mu Bwongereza i London mu murwa mukuru w’icyo gihugu.

Mu  cyumweru gishize hafunguwe urubuga ku bakobwa bose bifuza kwitabira irushanwa rya Nyampinga w’u Rwanda 2020 aho abujuje ibisabwa biyandikisha banyuze ku rubuga rwa interineti rw’irushanwa.

Ibyo ugomba guhatanira ikamba agomba kuba yujuje

Ku ya  20 Ugushyingo 2019 hasohotse  itangazo rihamagarira abakobwa kwiyandikisha mu irushanwa rya Miss Rwanda 2020 ndetse rinabamenyesha ibyo umukobwa wifuza kuba nyampinga w’u Rwanda agomba kuba yujuje.

Muri iryo tangazo abakobwa bashaka guhatanira iri kamba bibukijwe ko uburanga, ubwenge ndetse n’umuco ari iby’ibanze  bituma   umukobwa yakwegukana ikamba rya Miss Rwanda.

Kwiyandikisha byatangiye ku ya 20 Ugushyingo 2019 binyuze ku rubuga rwa Miss Rwanda.

Umukobwa wiyandikisha agomba kuba ari Umunyarwandakazi afite ibyangombwa, afite imyaka hagati ya 18-24, nibuza yararangije amashuri yisumbuye, azi neza Ikinyarwanda ndetse na rumwe mu ndimi eshatu zemewe mu Rwanda (Igifaransa, Icyongereza n’Igiswahili), kuba afite  uburebure bwa metero 1.70, apima ibiro bijyanye n’uburebure bwe ‘Body mass index’ (18.5-24.9), atarigeze abyara, yiteguye kuba mu Rwanda umwaka wose yamara yambaye  ikamba, yiteguye kudakora ubukwe mu gihe cy’umwaka yambaye  ikamba, yiteguye guhagararira u Rwanda aho ari ho hose bikenewe no kuba yiteguye gukurikiza amategeko n’amabwiriza  agenga irushanwa rya Miss Rwanda.

Nyuma ya Jenoside yakorewe Abatutsi mu 1994, ba nyampinga b’u Rwanda  batowe ni Bahati Grace,   Mutesi Aurore, Akiwacu Colombe, Kundwa Doriane, Mutesi Jolly,  Iradukunda Elsa, Iradukunda Liliane na Nimwiza Meghan ufite ikamba rya nyampinga w’u Rwanda 2019.

 

Umwanditsi:

Ndamyirokoye François

Tanga Igitekerezo

Email yanyu ntigaragazwa ku rubuga. Amazina na Email ni ngombwa.