21°C , Intermittent clouds | Kigali-Rwanda
Abanyeshuri biga mu Rwunge rw'amashuri rwa Mutagatifu Yozefu rw'I Kabgayi bagira igihe cyo gusurwa na bakuru babo baharangije bakabaha impanuro

Gahunda ya Garuka Ushime ikwiye kuba umuco mu mashuri yose

Yanditswe na Mugisha Benigne

Ku ya 15-08-2019 saa 15:55:00

Bamwe mu barangije amashuri bakunze kugaruka aho bize bagafasha mu iterambere ry’uburezi bw’ibyo bigo na barumuna babo baba bakiri ku ntebe y’ishuri mu biganiro bibafasha kubaka umutimanama wabo n’imyitwarire ibereye urubyiruko rwa none, basanga iyi gahunda ikwiye kugezwa mu mashuri yose kuko ifasha mu iterambere ry’uburezi.

Ni muri urwo rwego abize mu Rwunge rw’amashuri rwitiriwe Mutagatifu Yozefu rw’i Kabgayi bishyiriyeho ihuriro rihuza abarangije muri iryo shuri mu myaka yose yabanje bashyiraho urubuga rubahuza mu rwego rwo gufasha mu iterambere ry’uburezi bw’iri shuri no gufasha barumuna babo gukunda kwiga no kwiga bagamije kwihangira umurimo ndetse no gushaka ubumenyi buzagirira iki gihugu akamaro mu gihe kizaza.

Nk’uko bisobanurwa n’Umuyobozi w’Urwunge rw’amashuri rwitiriwe Mutagatifu Yozefu rwa Kabgayi, Frere Akimana Innocent, ngo ihuriro ry’abize muri iri shuri ryabafashije kurera abana bakiri ku ntebe y’ishuri muri iki gihe kuko ngo byonyine ubumwe bagirana nk’abize muri uru rwunge rubera barumuna babo urugero.

Yagize ati: “Iri huriro riradufasha cyane mu kurera abana bari ku ntebe y’ishuri, byonyine ubumwe abagize ihuriro bafitanye kandi batarize muri iri shuri mu myaka imwe, bifasha abari ku ntebe y’ishuri kubona ko abashyize hamwe nta kibananira kandi banadufasha mu kuduhera impanuro n’inama nziza abana bakiri mu ishuri babashishikariza kwiga neza no gushyira imbere kwiga amashami ya siyansi kuko afasha uwayize kwibona mu byo yakwifuza gukora byose”.

Frere Akimana avuga ko inshuro 3 abagize ihuriro ry’abize mu Rwunge rw’amashuri rwa Mutagatifu Yozefu rw’i Kabgayi bamaze gusura iri shuri ngo baganirije abanyeshuri ku myigire igezweho, babaha ubuhamya bw’uko bize mu bihe biruhije kandi bakabasha kugera ku ntego yo gutsinda no kugera aho bageze ubu.

Babashishikarije kugira disipline, kwita ku masomo yabo no kwiga cyane bagamije gutsinda no kwesa umuhigo, ngo ibyo uyu muyobozi w’ishuri yabibonyemo umusaruro ukomeye kuko byafashije abatari bake kwisubiraho no gukunda ishuri.

Sindayigaya Charles, umuyobozi w’Ihuriro ry’abize mu Rwunge rw’amashuri rwitiriwe Mutagatifu Yozefu rw’i Kbagayi, yabwiye itangazamakuru ko iri huriro ryatangijwe n’abantu bake bize kuri iryo shuri, baza kugira igitekerezo cyo gukora urubuga rwahuza abahize bose mu bihe bitandukanye, bityo haza no kubaho umunsi bagennye bahurira hamwe basura iryo shuri n’abanyeshuri bakiri ku ntebe y’ishuri.

Yagize ati: “Mu by’ukuri iri huriro rijya gutangira ryatangijwe n’abantu bake ariko baza kwagura ibitekerezo by’uburyo abize muri uru rwunge bose bashyira hamwe mu rwego rwo kumenyana, bikarenga ibiganiro bikajya no mu bikorwa bigamije guteza imbere uburezi bw’aho bize, basura ishuri ndetse bafasha abana bakiri ku ntebe y’ishuri mu kubaha inama n’impanuro zabaherekeza muri uwo murimo utoroshye barimo wo kwiga.”

Sindayigaya avuga ko inshuro zabanje ubwo basuraga iri ishuri muri gahunda ya garuka ushime, bateranyije amafaranga bakagurira abana ikimasa bakarya inyama kuri uwo munsi bahawe n’abakuru babo bageze mu kazi, ngo kandi habayeho kubaganiriza babakundisha kwiga, babagira inama zo kwirinda ingeso mbi n’urugomo, kwirinda ibiyobyabwenge n’ibisindisha, no kugira disipline kugira ngo bazavemo abagabo bahamye bazaba abayobozi b’ejo hazaza.

Avuga ko bafashe umwanya wo kuganira, gukina imwe mu mikino y’amaboko ndetse ngo banasabana babyina kandi bishima Imana, ibi akaba ari bimwe mu byubaka uru rubyiruko iyo rubona abaharangije bari mu mirimo inyuranye bagaruka ku basura no kubagira inama.

Babibukije ko bafite amahirwe akomeye yo kwiga no kubona ibintu byose hafi yabo, uburezi kuri bose kuko nta mwana ugihezwa mu ishuri, banabashishikariza kwiga amashami ya siyansi kuko azabagirira umumaro mu mibereho yabo kandi akazabafasha kwiga ibyo bifuza byose muri kaminuza.

Sindayigaya nk’umuyobozi w’iri huriro avuga ko banasurishijwe ikigo, berekwa ibikorwa bitandukanye ishuri rimaze kugeraho, akaba asanga mu gihe iri huriro ryaba rikomeye ryazanafasha muri byinshi birimo guteza imbere uburezi no gufatanya n’ikigo mu mishinga y’iterambere gifite.

Uyu muyobopzi w’Ihuriro avuga ko hari gahunda yo kongera guhurira i Kabgayi muri iri shuri tariki ya 25 Kanama 2019 ku nshuro ya kane, hakaba hateganywa ibiganiro bibiri bizaba bifite insanganyamatsiko ijyanye n’umuco w’urubyiruko rubeye u Rwanda ndetse n’ikindi kijyanye n’amashami umunyeshuri akwiye guhitamo yamufasha kwihangira umurimo.

Umunyabanga wa Leta muri Minisiteri y’uburezi, Dr. Munyakazi Isaac ku bijyanye na gahunda ya garuka ushime ihuriza abize hamwe gusubira ku mashuri aho bize, avuga ko ari umuco mwiza wo gufasha barumuna babo bakiri ku ntebe y’ishuri mu nama n’impanuro nziza zibafasha kwiga neza, gutsinda no kuzavamo abayobozi beza b’iki gihugu ku bw’indangagaciro bazaba barakuye ku ntebe y’ishuri.

Ati: “Uyu ni umuco mwiza nshishikariza n’abandi bize ahandi gushyira imbere kuko bifasha mu burezi no mu burere bw’abana bakiri ku ntebe y’ishuri. Bahabwa impanuro na bakuru babo bakanabahishurira ubuzima buri hanze n’uburyo bakwiye kuzabwitwaramo basoje amasomo yabo.”

Dr. Munyakazi avuga ko abantu bakwiye kujya basubira aho bize mu rwego rwo kujya inama n’ubuyobozi bw’amshuri, bakubaka inama ngishwanama y’ayo mashuri, bityo bikorohera ubuyobozi bw’ishuri gushyira mu bikorwa inshingano zabo kuko icyo gihe baba bafite abajyanama babahora hafi.

Avuga ko iyo abantu bashyize hamwe bagera kuri byinshi, kandi ngo ni ngombwa kujya bibuka aho bavomye ubumenyi bagatera ingabo mu bitugu barumuna babo n’abana babo babasimbuye muri iryo shuri.

Umunyamabanga wa Leta muri Minisiteri y’Uburezi ahamagarira n’abandi gukora amahuriro y’abize mu mashuri kuko bizafasha gutanga umuganda wabo mu gukomeza kubaka uburezi bw’u Rwanda no gufasha abanyeshuri bari ku ntebe y’ishuri babaha ikerekezo kiza kandi gisobanutse mu buzima buri imbere bwo hanze y’ishuri.

Abanyeshuri biga mu Rwunge rw’amashuri rwa Mutagatifu Yozefu rw’I Kabgayi bagira igihe cyo gusurwa na bakuru babo baharangije bakabaha impanuro

TANGA IGITEKEREZO

Leave a Reply

Your email address will not be published. Required fields are marked *