Gaby Kamanzi yashyize hanze indirimbo nshya

Yanditswe na KAYITARE JEAN PAUL

Ku ya 05-12-2020 saa 23:12:03
Gabby Kamnzi yashyize hanze indirimbo nshya yise "Emmanuel"

Umuramyi Gaby Irene Kamanzi mu mpera z’iki cyumweru yasohoye indirimbo  “Emanuel” izaba iri kuri alubumu ateganya gusohora umwaka utaha  wa 2021.

Indirimbo “Emmanuel” Gaby yashyize hanze avuga ko amajwi yayo yakozwe na Producer Sam igakorerwa muri River Studio  naho amashusho yakozwe na Producer Raheem Bob Chris.

Gaby avuga ko indirimbo ikubiyemo ubutumwa bushishikariza abantu gusabana n’Imana bazirikana ko ibari hafi mu buzima bwose banyuramo kandi ko badakwiye kwiheba.

Yagize ati : “Muri iyi ndirimbo ndashaka kwibutsa abantu ko Imana iri kumwe na bo, ibyo banyuramo byose n’Imana ibaba hafi kandi ntihinduka. Yiteguye kumva amasengesho kandi ni Imana izakomeza kubana na bo. Icyo nabwira abantu ni uko buri muntu wese yakwizera Yesu, tumuture ibituremereye n’ibitubabaza, ari hafi yacu’’.

Gaby yaherukaga gukora indirimbo  “Mu mutima” yakoranye n’umuhanzi w’umugande witwa Holy Keane Amooti. Indirimbo  “Mu mutima” na “Emmanuel” ziri kuri alubumu ye ya kabiri biteganyijwe ko azazishyira hanze umwaka 2020.

Uyu muhanzi yamenyekanye cyane mu Rwanda no mu karere k’ibiyaga bigari biturutse ku buhanga bwo kuririmba afite ndetse no kuyobora abandi mu kuramya no guhimbaza Imana.

Azwi cyane kandi mu ndirimbo nyinshi zagiye zikundwa nka  “Amahoro” “Wowe”, “Arankunda” n’izindi.

Gaby aherutse gutangira gahunda yo kugira inama abantu bakunda kuririmba kandi bafite impano, aho asigaye agaragara ku rubuga rwe rwa youtube “Gaby Kamanzi’’.

Abigisha ndetse abagira inama mu byerekeranye n’imiririmbire ni uburyo bwiza abantu benshi bakomeje gukunda.

Gaby Kamanzi avuka mu muryango w’abana batandatu akaba ari umwana wa gatanu mu muryango we. Yakuriye mu muryango w’abahanzi harimo Se umubyara, mama we, na murumuna we, Pastor Lysette Karasira.

Abahanzi bo hanze y’u Rwanda, Gaby avuga ko akunda cyane umunya Australia Darlene Zschech ndetse n’umunye Congo, Amanda Malela umwe mu bahanzikazi bagezweho muri Congo batuye ku mugabane w’i Burayi.

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.