23°C , Mostly cloudy | Kigali-Rwanda
Umwami Mohammed VI wa Maroc (ibumoso) ubwo yasuraga Perezida Ali Bongo wa Gabon mu bitaro by'i Rabat aho avurirwa

Gabon: Mohammed VI yasuye Ali Bongo mu bitaro

Yanditswe na Kayira Etienne

Ku ya 06-12-2018 saa 09:53:25

Muri Gabon, abakunzi ba Perezida Ali Bongo Ondimba biruhukije babonye ifoto ye bwa mbere kuva yajya kwivuriza mu bitaro by’i Riyad muri Arabie Saoudite ku wa 24 Ukwakira 2018.

Umukuru w’Igihugu cya Gabon yimuriwe muri Maroc ku wa 29 Ugushyingo aho yagiye gukomeza kwivuriza no kuharuhukira nk’uko byasabwe n’umwami Mohammed VI, bikemezwa n’ubutegetsi bwa Libreville hamwe n’abo mu muryango wa bugufi wa Bongo.

Iyo foto yafashwe ku itariki 3 Ukuboza 2018, ari na wo munsi Mohammed VI wa Maroc yamusuye mu bitaro bya gisirikare by’i Rabat.

Ikinyamakuru Jeune Afrique (J.A) gitangaza ko amakuru gikesha umwe mu banyapolitiki wo muri Maroc utarashatse ko izina rye rivugwa, ngo yamenyesheje ko Perezida Ali Bongo wa Gabon ameze neza kuko uburwayi bugenda bugabanyuka uko bukeye n’uko bwije.

J.A iti «Umwami wa Maroc Mohammed VI, na we ubwe ubwo yamusuye ku wa Mbere w’iki cyumweru, nk’uko umukozi wo mu biro bye yabitangarije AFP, Ibiro ntaramakuru by’Abafaransa, ngo yavuze ko yishimiye cyane ko ubuzima bwa mugenzi we Perezida Ali Bongo Ondimba buhagaze neza, nyuma y’iminsi myinshi yamaze amerewe nabi.»

AFP iti «Aho umwami wa Maroc agiye gusura Ali Bongo aho arwariye mu bitaro bya gisirikare i Rabat, hari ikizere gikomeye cy’uko Perezida wa Gabon akira umunsi ku munsi. Biranagaragarira ku ifoto abo banyacyubahiro bombi bifatishije bicaye mu ntebe nziza, hagati yabo hari akameza gato gateretseho ibirahuri bibiri hagaragara n’ibendera z’ibihugu byombi.»

Umwami Mohammed VI wa Maroc (ibumoso) ubwo yasuraga Perezida Ali Bongo wa Gabon mu bitaro by’i Rabat aho avurirwa

Ibiro Ntaramakuru Agence France-Presse kemeza ko biteganyijwe ko nyuma y’iriya foto hagaragazwa ka video. Ibi ngo bishobora kuba bigamije gucecekesha ibihuha byakomeje kwiyongera ko Umukuru w’Igihugu cya Gabon yaba atakirimo umwuka.

Icyakora, ngo nta buryo ibihuha ku buzima bwa Perezida Ali Bongo bitari kubaho nk’uko Jeune Afrique ibishimangira. Iti «Mu gihe cy’ukwezi kurenga, umuvugizi wa Perezidansi ya Libreville Ike Ngouani Aila Oyouomi, yavuze ku buzima bw’Umukuru w’Igihugu inshuro ebyiri zonyine.»

Ibindi bihe byose abaturage ba Gabon birumvikana ko inkuru yose babonaga ku mbuga nkoranyambaga ivuga kuri Perezida, ngo bayifataga nk’ukuri kuko nta yandi makuru bari bazi.

J.A yemeza ko mbere y’uko Perezida Ali Bongo Ondimba avanwa muri Arabie Saoudite akajyanwa muri Maroc, ngo habaye impaka zikomeye hagati y’impande ebyiri. Abari ku kuruhande rw’umugore we Sylvia Bongo Ondimba bashakaga ko ajyanwa i Londres mu Bwongereza ahari abaganga b’ibihangange, abandi biganjemo abashinzwe umutekano wa Perezida bashakaga ko ajya muri Maroc, kubera ko bumvaga bitumvikana uburyo Umukuru w’Igihugu cyabo yajya ahantu batazaba bafite uburenganzira bwo kumuba hafi usibye umugore we wenyine.

Byarangiye ajyanywe i Rabat ku wa 29 Ugushyingo, aho abashinzwe umutekano we bari hamwe na we nta kibazo.

TANGA IGITEKEREZO

Leave a Reply

Your email address will not be published. Required fields are marked *