21°C , Partly cloudy | Kigali-Rwanda
Amb. Nduhungirehe Olivier, Umunyamabanga wa Leta muri Minisiteri y'Ububanyi n'Amahanga

Francophonie mu mboni za Ambasaderi Nduhungirehe

Yanditswe na KAYITARE JEAN PAUL

Ku ya 15-10-2018 saa 16:13:59

Umunyamabanga wa Leta muri Minisiteri y’Ububanyi n’Amahanga, n’Ibikorwa by’Umuryango w’ibihugu by’Afurika y’Iburasirazuba, Amb. Nduhungire Olivier, atangaza ko umuryango w’ibihugu bikoresha ururimi rw’igifaransa (Francophonie, OIF), ufitiye inyungu Abanyafurika.

Agaragaza ko Igifaransa ari ururimi rwaturutse mu Bufaransa rugasakara ku Isi hose, akavuga ko ari n’ibintu u Bufaransa bufitemo inyungu kandi ko uretse n’ibyo, ikicaro cya OIF kiri i Paris muri icyo gihugu.

Yongeraho ko u Bufaransa ari bwo butanga amafaranga menshi mu muryango w’ibihugu bikoresha ururimi rw’igifaransa ari naho ahera avuga ko n’u Bufaransa bufite inyungu muri OIF.

Yagize ati “Uyu muryango rero ni umuryango wita ku muco w’ururimi ku burezi, ariko iyo urebye abawugize usanga ari ibihugu by’Afurika akenshi bigize OIF, rero bidufitiye inyungu kuko nk’Abanyafurika ni twe tugomba kurukoresha kuko rutuma dusabana, tugenderana ugasanga umuryango w’Afurika yo hagati ECCAS n’uwa CEDEAO y’Afurika y’Iburengerazuba, na bo bakoresha urwo rurimi rw’igifaransa.”

Amb. Nduhungirehe Olivier, Umunyamabanga wa Leta muri Minisiteri y’Ububanyi n’Amahanga

Amb. Nduhungirehe avuga ko nubwo ibihugu 88 biri muri uyu muryango wa OIF, u Bufaransa bubifitemo inyungu kimwe no mu bundi buryo bukoresha kuko ngo u Bufaransa ni igihugu kinini gikize, kiri mu bihugu bitanu bihoraho mu kanama k’umutekano ku isi, akongeraho ko ari igihugu gikomeye mu bukungu mu bihugu by’i Burayi.

Amb. Nduhungirehe ashimangira ko igifaransa ari ururimi rwabaye urw’Afurika, ruhuza Abanyafurika. Ati “Ahubwo mbona twe tugomba kurubonamo inyungu kuko ni rwo rurimi hongeweho n’Icyongereza zihuza abanyafurika.”

Umuryango w’ibihugu bikoresha ururimi rw’igifaransa OIF, kugeza ubu Umunyamanga Mukuru wawe ni Louise Mushikiwabo, umunyarwandakazi watorewe uyu mwanya mu cyumweru gishize, umuhango ukaba warabereye mu gihugu cya Armenia i Erevan.

Uyu mwanya ukomeye muri uyu muryango wa OIF, Mushikiwabo yawutorewe mu gihe cya manda y’imyaka ine, izageza mu 2022.

TANGA IGITEKEREZO

Leave a Reply

Your email address will not be published. Required fields are marked *