21°C , Partly cloudy | Kigali-Rwanda
Abagize Koperative EJOHEZA mu gikorwa cyo kuyobora amazi mu mirima (Foto Sezibera)

FONERWA na RWARRI birutira abaturage umuvandimwe wa kure

Yanditswe na SEZIBERA ANSELME

Ku ya 15-10-2018 saa 07:27:04

Imihindagurikire y’ibihe ni ikibazo cyugarije Isi muri rusange. Kuba ikibazo cyabaho ariko ubwabyo si ikibazo kuko Isi si paradizo, ikibazo ni ukudakemura ikibazo gihari.

Mu Rwanda, ingufu zishyirwa mu kurengera ibidukikije no guhangana n’imihindagurikire y’ikirere ni nyinshi. Leta yashyizeho ikigega gitera inkunga imishinga ishinzwe bene ibyo.

Ikigega k’Igihugu k’Ibidukikije n’Imihindagurikire y’Ibihe (FONERWA), gitanga amafaranga menshi akoreshwa n’imishinga itandukanye hirya no hino mu gihugu, harimo uwa RWARRI.

RWARRI (Rwanda Rural Rehabilitation Initiative) ni umushinga abaturage bo mu Karere ka Kamonyi bafata nk’inshuti yabo kuko ngo mbere y’uko uyu mushinga uza bari babayeho nabi.

Nyuma yo kubona inyungu n’akamaro k’ibyo wabagejejeho, abaturage bawufata nk’inshuti idatenguha ibarutira umuvandimwe  wa kure nk’uko babitangarije Imvaho Nshya ubwo yabasuraga.

Mukakaremera Bernadette ni umuhinzi umworozi utuye mu Murenge wa Gacurabwenge mu Karere ka Kamonyi yatewe inkunga ubwo yari mu bihe bibi umugabo we yatakaje akazi.

Ubwo yibazaga uko azabaho umugabo we adakora ndetse abana bari mu mashuri bakeneye amafaranga, ni bwo ngo yamenye uyu mushinga, arawugana, amahirwe aramusekera.

Mukakaremera Bernadette watewe inkunga y’ibinyomoro n’imyembe (Foto Sezibera A)

Aragira ati “Twatangiranye na RWARRI muri 2017 impa ibinyomoro 300 n’ibiti by’imyembe 70, kugeza ubu maze gutera ibiti by’ibinyomoro 800 n’iby’imyembe 100. Bampaye kandi imashini zuhira, imipira yo kuhira n’ibindi kandi bananyubakira damu ifata amazi kugira ngo bamfashe kuhira izo mbuto. Nkurikije uko umushinga wange watangiye naho ugeze RWARRI nyifata nk’umuvandimwe udatenguha”.

Akomeza agira ati: “RWARRI yandutiye umuvandimwe inandutira inshuti ya kure. Reba guterura umushinga bakawumpa nta n’igiceri cya 10 ntanze ubu ukaba umaze kubyara amafaranga 500.000 nyamara umuvandimwe atabiguha. Mbere umugabo wange akiri mu kazi yazanaga amafaranga menshi ariko aho akaviriyemo twinjira mu buhinzi nanirwa kubyakira kuko n’amashuri y’abana yaturebaga. Nyuma narabyitabiriye abana bakomeza kwiga neza mu byiciro byose kandi barangije bajya no mu kazi, RWARRI yamvanye habi. Urugo narwo rusaba byinshi kugaburira umuryango w’abantu 8 n’ibindi ukenera ntibyoroshye ariko ibikorwa nagejejweho na RWARRI ku nkunga ya FONERWA byatumye nkemura ibibazo byose. Nabashije no kwishyura uwo nari mfitiye ideni kubera kweza izo mbuto natewemo inkunga”.

Damu zagiye zubakirwa abaturage muri ubu buryo (Foto Sezibera)

RWARRI yegereje abahinzi amazi yo kwifashisha

Mukeshinema Papias ni Perezida wa Koperative y’abahinzi EJOHEZA ikorera mu Murenge wa Kayenzi muri Kamonyi, ifite abanyamuryango 24. Bishimira umushinga w’umuyoboro bahawe.

Mukeshinema ashima ko RWARRI yabakoreye uwo muyoboro w’amazi ikanabahamo akazi by’umwihariko.

Mukeshinema ati: “Nabonyemo akazi nishyura mituweli, mbona agafaranga ko kwikenura kuko nakuyemo ibihumbi 60 mu minsi 10 kandi no mu rugo bameze neza konti irabyibuha.”

Perezida wa koperative EJOHEZA, Mukeshinema Papias, yerekana uko amazi anyura mu miyoboro agera mu mirima yabo (Foto Sezibera A)

Uwimana Liberata, Umunyamuryango wa EJOHEZA atangaza ko bahuraga n’imvune nyinshi zo kuhirisha utudomoro imboga zikabumana ariko amazi yageze mu mirima hagati.

Uwimana yishimira ko batazongera guhagarika ibikorwa by’ubuhinzi mu mpeshyi nk’uko byari bisanzwe, agahamya ko umuryango we ubayeho neza kubera akazi yahawe kandi atunze mituweli yahavanye.

Uwimana Liberata yishimira ikiciro yavuyemo akajya mu kindi kubera ibikorwa bya RWARRI (Foto Sezibera A)

Bizimana Bertrand wo mu Kagali ka Cubi muri Kayenzi aho iyi koperative ikorera, we aragira ati “RWARRI idutunganyirije igishanga neza ku buryo tuzajya tugikoreramo mu mpeshyi no mu itumba. Twahingaga mu mpeshyi umusaruro ntuboneke neza none ubwo amazi atembera akagera mu mirima bizanye indi nyungu”.

Mushimiyimana Saverine wo mu Murenge wa Karama muri Kamonyi na we ni umwe mu bubakiwe ikigega gifata amazi na RWARRI. Yatoranyijwe kubera ibibazo by’ubumuga yari afite akagira inka n’akarima k’igikoni byakeneraga amazi bikayabura kandi nta mbaraga afite zo kujya mu gishanga.

Asaba umushinga RWARRI kwagura ibyo bikorwa bikagera no ku bandi kuko we ibyo yagejejweho yiteguye kubibungabunga ngo atavaho atenguha umuterankunga.

Mushimiyimana Saverine yishimira ikigega yubakiwe (Foto Sezibera A)

RWARRI mu guhangana n’ikibazo cy’ubutaka bwakoreshwaga nabi

Kamanzi Gabriel ni umukozi wa RWARRI, ubundi RWARRI ikaba ari umuryango nyarwanda utegamiye kuri Leta ufite imishinga itandukanye mu turere 10 tw’u Rwanda, by’umwihariko muri Kamonyi ikaba yibanda ku gufata amazi y’imvura no gufasha amakoperative gufata neza umusaruro.

Avuga ko RWARRI yatangiye gukorera mu Karere ka Kamonyi mu Kwakira 2015 igamije gukura abaturage mu bukene binyuze mu buhinzi no mu bikorwa remezo birimo gufata amazi y’imvura no kuyabyaza umusaruro.

Kamanzi avuga ko mu bikorwa by’ibanze RWARRI yakoze harimo gucukura ibyobo bifata amazi, kubaka ibigega no kubaka ingomero.

Avuga ko gutekereza Akarere ka Kamonyi byatewe n’uko kahuraga n’ibibazo by’isuri ikangiza ibikorwa by’abaturage.

Yabwiye Imvaho Nshya ko ibyo bikorwa byagize akamaro ku baturage kuko mbere hari abaturage bari bafite ubutaka ariko batabubyaza umusaruro.

Ashimangira ko aho bihagereye byatumye benshi babasha kubona umusaruro, bakishyurira abana amashuri ndetse bakanishyura mituweli.

Kamanzi asobanura ko mu guhanga ibyo bikorwa remezo abaturage banagize amahirwe yo kubonamo akazi kandi bakabivanamo amafaranga menshi.

Kamanzi Gabriel, umukozi wa RWARRI mu Karere ka Kamonyi ukurikirana ibikorwa biterwa inkunga na FONERWA (Foto Sezibera A)

Avuga ko ibigega byubatswe byagabanyije imvune abaturage bagiraga bashaka amazi kure kandi mu bishanga ariko ubu babasha kuyafata mu gihe k’itumba bagakomeza no kuyakoresha mu mpeshyi.

Akomeza atangaza ko ibyobo bifata amazi bibafasha kugira ngo bazashobore no kujya bayifashisha bahingira ibihembwe byose bafite amazi ahagije.

Agaruka ku nzitizi, atangaza ko hari abaturage bagejejweho ibyo bikorwa ariko ntibabashe kubyitaho ngo bibungabungwe, ntibitange umusaruro wifuzwa.

Mu byo agaragaza biteganywa na RWARRI, harimo ingendoshuri zizafasha abatarabifashe neza kwigira ku bo bigaragara ko babifashe neza kugira ngo babigireho.

Abo baturage kandi bazakomeza gufashwa ku buryo bwo kubisana no kubibungabunga kandi bigishwa uko bikora.

Asobanura isano iri hagati ya RWARRI, FONERWA n’Akarere ka Kamonyi, Kamanzi yagize ati: “Akarere ni ko nyiri amafaranga, twe nka RWARRI dushyira mu bikorwa umuterankunga akaba FONERWA. Ni ukuvuga ngo FONERWA ishyira amafaranga mu karere nako kakayaha RWARRI natwe tukayashyira mu bikorwa bifasha abaturage. Akarere rero kadufasha mu miyoborere natwe tugashyira mu bikorwa tugatanga raporo ku karere nako kakayiha FONERWA nk’umuterankunga.”

Kamanzi avuga ko inkunga ya FONERWA isaga amafaranga miliyari imwe na miliyoni 200 mu bikorwa bigomba gufasha abaturage kandi muri ayo yose agera kuri 80% amaze gutangwa.

Akarere ka Kamonyi gashima impinduka zatewe n’inkunga ya FONERWA

Umuyobozi w’Ishami ry’Ubuhinzi, Ubworozi n’Umutungo Kamere mu Karere ka Kamonyi Mukiza Justin, avuga ko FONERWA mu myaka 3 imaze yateye akarere inkunga yo gufata amazi y’imvura no kuyabyaza umusaruro.

Avuga ko mu byakozwe ku nkunga ya FONERWA harimo kubaka ibyobo bifata amazi 100, ibigega bifata amazi y’imvura avuye ku mazu 59 hakaba n’igishanga cyatunganyijwe gifite hegitare 5 mu Murenge wa Kayenzi giteganyirijwe guhingwamo imboga mu bihembwe 3 byose.

Umuyobozi w’ishami ry’ubuhinzi n’ubworozi n’umutungo kamere muri Kamonyi Mukiza Justin (Foto Sezibera A)

Mukiza avuga kandi ko hari kubakwa damu mu Murenge wa Gacurabwenge izafata amazi angana na meterokibe ibihumbi 60 ku buso bwa hegitare 43 zishobora no kwiyongera kandi ibyo bikorwa byose byahaye akazi abaturage ba Kamonyi.

Mukiza asobanura ko ibikorwa byagiye bishyirwa ahantu basanzwe hanyura amazi y’imvura akajya kwangiza imyaka mu gishanga, akagaragaza ko intego y’iyo damu ari ugufasha abaturage gukoresha amazi mu buhinzi no gufata amazi muri rusange.

Ku bijyanye n’ibigega, avuga ko byatanzwe hibandwa ku baturage bo mu kiciro cya mbere n’icya kabiri by’Ubudehe badafite ubushobozi kugira ngo bashobore kubona amazi mu rugo no mu turima tw’igikoni.

Ashimangira ko ibikorwa byakozwe muri iyo mishinga bizafasha guhingira igihe ibihembwe byose, kandi abaturage bakabasha kubona amazi mu rugo abegereye.

Mukiza atangaza ko muri rusange inkunga ya FONERWA yatanze umusanzu ukomeye mu gufata amazi y’imvura no kurengera ibidukikije.

Umuyobozi w’Akarere ka Kamonyi, Kayitesi Alice, ashima FONERWA na RWARRI mu kwegera abaturage kuko hari impinduka zigaragara byazanye mu kurengera ibidukikije.

Imiyoboro y’amazi igenda ihabwa ahagomba kugabanya umuvuduko (Foto Sezibera A)

TANGA IGITEKEREZO

Leave a Reply

Your email address will not be published. Required fields are marked *