22°C , Partly sunny | Kigali-Rwanda

FONERWA imaze gukusanya miriyoni 170.5 z’amadorari

Yanditswe na KAYIRA ETIENNE

Ku ya 07-10-2019 saa 09:27:35
Ibikorwa byo kubungabunga ibidukikije bireba buri wese, kandi no kurwanya icyo ari cyo cyose cyabyangiza bireba buri wese

Ikigega k’Igihugu gishinzwe gutera inkunga imishinga ibungabunga ibidukikije no gufasha guhangana n’ingaruka ziterwa n’imihindagurikire y’ikirere FONERWA (Rwanda Green Fund), kuva gishinzwe mu mwaka wa 2012 kugeza uyu munsi, kimaze gukusanya akayabo ka miriyoni 170.5 z’amadorari.

Mu kiganiro kirambuye kihariye Imvaho Nshya yagiranye na Mugabo Florian, umukozi ushinzwe ishami rirebana n’imishinga muri FONERWA (Division Manager), yatangaje ko mu mishinga ibihumbi bagiye bakira mu myaka irenga itandatu bamaze bakora, imishinga bamaze gutera inkunga ngo ni mirongo itatu n’irindwi (37) y’abiyemeje gukora ibikorwa byo kubungabunga ibidukikije no guhangana n’imihindagurikire y’ikirere.

Mugabo yagize ati “Nyuma y’Itegeko ryashyizeho iki kigega ‘Fonerwa’ mu mwaka wa 2012 kubera ikibazo Leta y’u Rwanda yari imaze kubona cyugarije ibihugu byo ku Isi n’icyacu kirimo, mu nshingano zikomeye Fonerwa ifite harimo gushaka amafaranga yo gufasha guhangana n’ingaruka z’imihindagurikire y’ikirere ‘climat change’.

Akomeza avuga ko ayo mafaranga ngo atagomba gushingira ku Ngengo y’Imari ya Leta y’u Rwanda kubera ko hari ibindi bikorwa byinshi by’iterambere aba yaragenewe. Ubwo bushobozi ngo bushakishwa mu miryango mpuzamahanga itera inkunga ibikorwa bifite aho bihuriye n’ibidukikije, inkunga FONERWA ihabwa ari uko na yo ikoze imishinga ngo ikayitanga ahantu hatandukanye.

Mugabo Florien ati “Nyuma y’uko u Rwanda rushyizeho ingamba z’uburyo bwo guhangana n’ingaruka z’imihindagurikire y’ikirere no gutekereza aho amafaranga azafasha yava, mu mwaka wa 2013 imirimo nyirizina yaratangiye. Ibikorwa bya mbere bya Fonerwa byatangiriye ku nkunga ya miriyoni makumyabiri n’ebyiri z’ama pounds yahawe na Leta y’Abongereza.

Icyo gihe Fonerwa yakoraga mu buryo 2.  Ubwa mbere kwari ugutegereza ko abafite imishinga bayizana, hakabaho n’uburyo bwo guhagamara abafite imishinga kuyizana binyuze mu bitangazamakuru. Kuva muri uriya mwaka wa 2013 kugeza uyu munsi, Ikigega cyakiriye imishinga inshuro 9”.

Ikigo kigitangira gukora, ngo cyakiraga imishinga mu mezi atandatu, ariko muri iki gihe ngo bayakira buri munsi uko ibonetse. Iyo umuntu akoze umushinga ufite agashya mu ikoranabuhanga utangiza ibidukikije ahubwo uje kubirengera, ngo uterwa inkunga y’ibihumbi 300 by’amadorari. Gusa ngo nyiri umushinga agomba kuba afite 20% by’amafaranga yose uzatwara.

Mugabo Florian yakomeje atangariza Imvaho Nshya ko imishinga bakira babanza kuyisuzuma ko ijyanye n’umurongo wa Fonerwa  ujyanye no kubungabunga ibidukikije no guhangana n’ingaruka z’imihindagurikire y’ikirere.

Ati “Umishinga dusuzumye tugasanga ukoze neza, ntiduhita tuwuha amafaranga yose twemereye uwawukoze ku bwo kwirinda ko yakoreshwa nabi. Nyiri mushinga agomba kuba afite 30% by’amafaranga yose uwo mushinga uzatwara. Abakozi ba Fonerwa basura aho umushinga uzakorera ibikorwa byawo, basanga ibyo nyiri umushinga yateganyije ari byo koko, Ikigega kimuha iyo nkunga mu byiciro bitandukanye ari na ko bakomeza basura ibikorwa bareba niba ibyo yiyemeje abikora neza.”

Nyuma ya buri mezi atatu, Fonerwa isuzuma ibikorwa yasanga byarakozwe neza ngo ikabona kumwongera amafaranga y’ikiciro gikurikiraho. Umukozi w’ikigega ushizwe ishami ry’imishinga Bwana Mugabo yamenyesheje ibikorwa by’mishinga 37 bamaze gutera inkunga ngo basanga bifitiye inyungu igihugu, ndetse bikagirira n’inyungu Abanyarwanda bakora ibyo bikorwa byo kubungabunga ibidukikije kuko bitanga akazi ku bantu benshi.

Ku kibazo cy’aho igitekerezo cyo gushyiraho Ikigega “Fonerwa” cyavuye, Mugabo Florian yatangaje ko ngo byavuye ku bibazo bikomeye by’imihindagurikire y’ikirere Ubuyobozi bw’Igihugu cy’u Rwanda bwabonye nyuma y’isuzumwa ryakozwe na MINECOFIN (Minisiteri y’Imari n’Igenamigambi) mu 2013.

Mugabo ati “Mbere y’uko Ikigega Fonerwa gitangira, hari hamaze kugaragara ko ikibazo k’imihundagurikire y’ikirere ari ikibazo gihangayikishije, kandi gifite ingaruka zikomeye ku buzima bw’abantu ndetse no ku bukungu bw’Igihugu”.

Uyu mukozi ushinzwe Ishami ry’imishinga muri Fonerwa yakomeje atangariza Imvaho Nshya ko mu mwaka 2010, Minisiteri y’Imari n’Igenamigambi ngo yakoze isuzuma ryo kureba ingaruka ziterwa n’imihindagurikire y’ikirere (Climate change). Icyaje kugaragara ni uko ngo ibintu byari bikomeye kuruta uko abantu babyibwiraga.

Ati “Iryo suzuma ryagaragaje ko mu Rwanda nitutagira icyo dukora, tugakomeza gukora uko ibintu byari bimeze nk’aho nta kintu twikanga, duhereye ubu ngubu kugeza mu 2030,  Igihugu gishobora gutakaza 1% by’ubukungu mbumbe bwacyo”.

Ayo mafaranga yatakara kubera ko kitafashe ingamba zo guhangana n’izo ngaruka z’imihindagurikire y’ikirere, ngo ni menshi cyane kuko agera kuri miriyoni 300 z’amadorari. Bivuze ko hatagize igikorwa ngo mu myaka iri mbere u Rwanda rwahinduka agasi, abantu bakaba barusohokamo bakagenda kubera ubuzima bwaba ari bubi cyane.

Mugabo Florien ati “Iki kibazo kimaze kugaragara ko gikomeye, ni bwo mu Rwanda hafashwe umwanzuro w’uko hagomba gushakishwa uburyo, abantu bagakora ibindi bintu birenze ibikorwa n’Ingengo y’Imari y’Igihugu”.

Ni muri urwo rwego Fonerwa ngo ifite inshingano zo gushaka ubushobozi bw’amafaranga yo gukora ibikorwa byo guhangana mu buryo burambye n’ingaruka z’imihindagurikire y’ikirere ku buryo hazagera mu 2050 u Rwanda rwarubatse ubushobozi bwo kwitunga mu bijyanye no guhangana n’ibyo bibazo byose.

Muri iyi myaka 6 ishize Fonerwa itangiye ibikorwa byo guhangana n’ingaruka z’imihindagurikire y’ikirere mu Rwanda, Loni yayihaye igihembo k’ishimwe cyo gukora neza.

U Rwanda rukaba rwarahagurukiye kubungabunga ibidukikije nka kimwe mu misingi yo kubakiraho iterambere n’imibereho myiza by’Abanyarwanda.

Umwanditsi:

KAYIRA ETIENNE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.