17°C , Partly cloudy with thunderstorms | Kigali-Rwanda
Perezida wa FERWACY, Bayingana Aimable wemeza ko bafite gahunda yo gutegura Tour du Rwanda mu bagore

FERWACY iratekereza uburyo hazabaho Tour du Rwanda mu bagore

Yanditswe na admin

Ku ya 21-11-2017 saa 14:19:51

Ishyirahamwe ry’umukino w’amagare mu Rwanda “FERWACY” riravuga ko mu myaka iri imbere hagomba gutangira isiganwa ryo kuzenguruka igihugu (Tour du Rwanda) mu bari  n’abategarugori.

Ni umushinga ukiri mu bitekerezo ariko uramutse ushyizwe mu bikorwa watuma u Rwanda rwesa agahigo muri Afurika ko kuba igihugu cya mbere giteguye irushanwa nkiri. Ibi kandi byakwereka isi ko u Rwanda ruha agaciro umugore  nk’uko binagaraga mu nzego z’ubuyobozi bw’igihugu.

Perezida wa FERWACY, Bayingana Aimable wemeza ko bafite gahunda yo gutegura Tour du Rwanda mu bagore

Perezida wa FERWACY, Bayingana Aimable yemeza ko iki ari igitekerezo bafite n’ubwo ikibazo kigihari ari umubare muto w’abakobwa bitabira uyu mukino.  Ati ”Birashoboka. Bisaba gusa kubiteganya mu hazaza ndetse tukazavugana n’andi mashyirahamwe y’umukino wo gusiganwa ku magare muri Afurika kugira ngo tumenye niba bafite ubushake n’ubushobozi bwo kwitabira”.

Ku rundi ruhande, Bayingana agaragaza ko u Rwanda rushyira imbaraga mu bagore ariko bagahura n’imbogamizi z’amarushanwa atabaho ku rwego rw’Afurika. Ati “Muri Afurika haracyari ikibazo cy’amarushanwa y’abagore. Yewe nta na yayandi amara igihe gito.  Amarushanwa ahari gusa ni yayandi ya shampiyona y’Afurika, twe dutegura make y’imbere mu gihugu ariko hari ikibazo cy’amarushanwa  y’Afurika mu bagore”.

N’ubwo umukino w’amagare mu bagore ugifite ibibazo ku rwego rw’Afurika, ntibyabujije ko mu 2016, umunyarwandakazi Jeanne D’arc Girubuntu w’imyaka 22 yegukana umudali wa Bronze muri shampiyona y’Afurika anandikisha amateka yo kuba umunyarwandakazi wa kabiri witabiriye shampiyona y’isi.

Usibye Girubuntu, hari abandi bakobwa batanga icyizere muri uyu mukino. Abo ni Muhabwampundu Esther w’imyaka 17, Ingabire Beatha w’imyaka 21 na Nirere Xaverine w’imyaka 15 bigaragaje muri shampiyona y’igihugu y’u Rwanda.

Kuri gahunda mu mwaka utaha, ikipe y’igihugu y’abagore izitabira imikino y’ibihugu bivuga ururimi rw’icyongereza na shampiyona y’Afurika izabera mu Rwanda muri Gashyantare 2018.

BIZIMANA ERIC

TANGA IGITEKEREZO

Leave a Reply

Be the First to Comment!

avatar