21°C , Intermittent clouds | Kigali-Rwanda

Expo2019: Urugaga rw’abikorera rwatanze udukingirizo turenga ibihumbi 500

Yanditswe na Kayitare Jean Paul

Ku ya 13-08-2019 saa 19:23:55

Ubuyobozi bwa gahunda yo kurwanya Virusi itera Sida mu rugaga rw’abikorera, PSF, buratangaza ko mu gihe cya Expo bwatanze udukingirizo turenga ibihumbi 500, abagabo 2.110 akaba ari bo bitabiriye gusobanurirwa uko bakwirinda virusi itera Sida, kuboneza urubyaro na gahunda y’iminsi 1.000 y’umwana.

Rusanganwa Léon Pierre, Umuhuzabikorwa wa gahunda yo kurwanya virusi itera SIDA muri PSF, yabwiye Imvaho Nshya ko muri Expo ishize bari bafitemo stand 3 mu izina ry’Urugaga rw’abikorera PSF, ku bufatanye bwa AHF Rwanda bakaba baratangaga serivisi zitandukanye zirimo kwipimisha virusi itera Sida ku bushake, gutanga ubutumwa ku ndwara zitandukanye, kwirinda umwijima wo mu rwego rwa B na C, ndetse n’ubutumwa ku kuboneza urubyaro n’ibindi.

Mu kiganiro yagiranye n’Imvaho Nshya, Rusanganwa yagize ati “Mu gihe cya Expo twatanze ubutumwa ku ndwara ya Ebola, ubutumwa ku minsi 1 000 kuva umwana bamutwite, imirire mibi ndetse no gutanga udukingirizo ku buntu. Navuga ko mu gihe cya Expo twatanze udukingirizo 500,452 dutangwa mu minsi 21 Expo yamaze iba.”

Akomeza avuga ko kuva tariki 22 Nyakanga 2019 kugeza 11 Kanama 2019, batanze serivisi zo gupima abantu ku bushake Virusi itera Sida, bagasanga abantu 12 ari bo bafite ubwandu bushya. Ati “Abantu 698 twarabapimye bizanye ku bushake, tubona ubwandu bushya 12 bivuze ko ari abantu bagize ibyago byo kwandura bakaba bangana na 1.7% muri abo twapimye.”

Rusanganwa avuga ko uwo basanze yaragize ibyago byo kwandura virusi itera sida bamuhuzaga n’ibigo nderabuzima bikazamukurikirana kuko ibyo bikorwa n’abaganga. Abo bantu uko ari 12 bahujwe na serivisi z’ubuzima, bazakomeza kubakurikirana no kubitaho mu buzima bwabo.

Avuga ko imurikagurisha rya 2018 n’irya 2019 harimo itandukaniro. Ati “Navuga ko akato n’ihezwa byagiye bigabanuka kuko mbere wasangaga umuntu kuza gufata agakingirizo kuri stand byari ikibazo gikomeye ndetse n’ushatse kuyitwara akakubwira ko hari uyimutumye. Imurikagurisha rya 2019, umuntu yazaga gutwara agakingirizo kandi ukabona ko nta kibazo abifiteho. Icyabiteye, ni ubukangurambaga bwakurikiye Expo ya 2018 bwari bugamije gushishikariza amabutiki yo mu Rwanda gucuruza udukingirizo, ntidukomeze kujya dushyirwa inyuma y’imyunyu, itabi n’ibindi bicuruzwa.”

Nikuze Sandra, umuyobozi ushinzwe gahunda yo kurwanya Virusi itera Sida mu rugaga rw’abikorera PSF, agaragaza ko abantu babagannye ari benshi kandi mu byiciro bitandukanye by’umwihariko urubyiruko guhera ku myaka 18.

Avuga ko icyatunguranye ari uko abantu bakuru bafite imyaka 40 kuzamura hakiyongeraho n’abasaza, bitabiriye ubutumwa bwo gukoresha agakingirizo kandi bakadutwara.

Nikuze ati “Abatuganaga twabagiraga inama zitandukanye ku byerekeranye na ziriya ndwara zindi, uko bakwirinda Ebola, indwara y’Umwijima, tubashishikariza kujya ku bigo nderabuzima, kujya kwipimisha cyane ko ari indwara abantu bose baba bafitiye ubwoba, kubashishikariza kuboneza urubyaro bakoresheje agakingirizo cyane ko ari ko katagira ingaruka izo ari zo zose ugereranyije n’ubundi buryo bukoreshwa mu kuboneza urubyaro.”

Akomeza avuga ko abasuye aho gahunda yo kurwanya virusi itera Sida mu rugaga rw’abikorera yakoreraga mu imurikagurisha, abagore bari bake kuko ababagannye bari 785 mu gihe abagabo bari 2,110.

Akagaragaza ko hari ikinyuranyo hagati y’abagabo n’abagore bitabiriye gahunda zo kubagana ngo babasobanurire uko bakwirinda virusi itera Sida, kuboneza urubyaro n’ibindi. Ashimangira kandi ko urubyiruko ari rwo rwari rwinshi ariko ko abazaga ari abana batabahaga udukingirizo.

Nikuze akomeza agaragaza impamvu abagabo ari bo bitabiriye gutwara udukingirizo no gusobanurirwa kuri Virusi itera Sida.

Yagize ati “Impamvu abagore batitabiriye gufata udukingirizo ni uko bumva ko ari utw’abagabo kandi ko ari bo bireba ariko ntibamenye yuko na we agafashe, yabasha gushishikariza umugabo we kuko ni na byo byakoroha cyane. Agafashe akagaha umugabo akamubwira ati tuge tuboneza urubyaro muri ubu buryo umugabo yabyumva cyane kurusha uko ari we wabitekerezaho bwa mbere.”

Ubuyobozi bwa gahunda yo kurwanya Virusi itera Sida mu rugaga rw’abikorera PSF, buvuga ko udukingirizo badutangaga mu masaha ya nimugoroba, cyane ko ari bwo abajyaga muri Expo bitabiraga ari benshi.

Ubu buyobozi buvuga kandi ko buzakomeza gukora ubukangurambaga bwo kurwanya virusi itera Sida mu ngeri zose z’amahuriro agize urugaga rw’Abikorera.

Kugeza ubu umubare w’abanduye agakoko gatera Sida mu Rwanda, ubushakashatsi buheruka bwagaragaje ko bangana na 3%. Ubu, umuntu wese ugaragayeho kuba yaranduye aka gakoko, ahita ashyirwa ku miti mu rwego rwo kurinda ubuzima bwe, kugira ngo akomeze yiteze imbere ariko kandi anateze imbere Igihugu.

Ni inshingano za buri wese kugira uruhare mu kurwanya agakoko gatera Sida, binyuze mu buryo bushoboka bwose, cyane cyane kwigisha abakiri bato uko Sida yandura, ndetse n’uburyo bashobora kuyirinda, dore ko kugeza ubu nta muti uyivura burundu, nta n’urukingo.

TANGA IGITEKEREZO

Leave a Reply

Your email address will not be published. Required fields are marked *