Ebola: Abanyamakuru bahuguwe ku buryo bakwirinda gukwiza ibihuha

Yanditswe na Mutungirehe Samuel

Ku ya 16-01-2020 saa 18:39:41
Abanyamakuru bo mu Rwanda batangaza inkuru zikora ku buzima bari guhugurwa uko bakwitwara mu gihe habayeho icyorezo cya Ebola

Abanyamakuru bo mu bitangazamakuru bitandukanye bikorera mu Rwanda no mu mahanga bahuguwe uburyo bwiza bwo gutara amakuru no kumenya kwirinda gukwirakwiza ibihuha mu gihe habayeho icyorezo runaka cyane cyane nka Ebola.

Ni amahugurwa y’iminsi 3 yatangiye tariki ya 16 Mutarama 2020, i Kigali, yateguwe n’Ishyirahamwe ry’Abanyamakuru mu Rwanda ARJ, ahuje abanyamakuru bagera kuri 60 kugira ngo bongere ubumenyi n’ubushishozi mu byo bakora mu mwuga wabo wo kumenyesha rubanda.

Umuyobozi w’ishyirahamwe rya ARJ, Havugimana Aldo, yavuze ko intego y’ayo mahugurwa ari ugutangirana buhoro buhoro n’abanyamakuru 60 babaha ubumenyi ku gutara inkuru ku bintu by’icyorezo byihutirwa cyane cyane nka Ebola.

Ati “Ntekereza ko hari umunyamakuru ushobora kuvuga ngo ibi maze igihe mbikoraho ariko uyu munsi nk’umunyamakuru ndi hano kwiga kuko dufite amahirwe yo kuba turi kumwe n’inzobere kandi mu gihe cy’umwaka wose hagiye hakorwa ubukangurambaga ku bantu batandukanye, ntekereza ko na Minisiteri na yo ikomeje ubukangurambaga kandi hari n’abafite ubunararibonye.”

Umuyobozi ushinzwe itumanaho muri UNICEF Rwanda, akaba n’Impuguke mu by’itangazamakuru, akaba kandi yarigeze kuba umunyamakuru mu bitangazamakuru mpuzamahanga, Rajat Madhok, yagaragarije abanyamakuru ko inshingano z’itangazamakuru ari ukugeza amakuru afitiwe ikizere ku babakurikira ariko kandi bakwiye kwita ko ibyo baha abo bantu bibagiraho ingaruka mu buryo bumwe cyangwa ubundi.

Madhok ati “Ikintu cyose wanditse, uvuze cyangwa utangaje gifite ingaruka ku bantu, zishobora kuba mbi cyangwa nziza. Mufite uruhare kuri sosiyete. Abantu baratwizera, bemera ibyo tuvuga.

Twebwe nk’abanyamakuru dufite uruhare rw’ingenzi n’akamaro mu muryango; turi ijwi ry’abaturage bacu, tugomba kubwira abadukurikira ibintu biri kuba n’ibyugarije sosiyete yacu. Turi abatwarabutumwa bw’ingenzi ku baturage. Ako ni akazi mu bunararibonye bwange nakoze mu bihugu bitandukanye ku biza nasanze gafite akamaro gakomeye cyane.”

Umuvugizi wa Minisiteri y’Ubuzima Malick Kayumba, yavuze ko igihe cyose Minisiteri ifite inshingano zo kuvugana n’itangazamakuru mu kumenyesha abaturage amakuru y’ukuri kandi nta nyungu yagira mu kwanga gutanga amakuru y’ibiza nka Ebola ku itangazamakuru kuko byatuma ubuzima bwa benshi bujya mu kaga batazi uko bari bwifate mu bihuha byaba bihari ku cyorezo nka Ebola.

Yagaragaje ko mu rwego rwo kwirinda no kwitegura gutanga ubufasha bwihuse ku wagaragaza ibimenyetso bya Ebola nk’igihugu kiri mu kaga kayo, kugeza ubu u Rwanda rumaze gukingira abafite aho bahurira n’abashobora kugira ikibazo cya Ebola, hamaze gukingirwa 3000 kubera inkingo zari zihari. Ubu hatahiwe abantu 6793 mu masite 4, hakaba hateganywa gukingira abantu ibihumbi 200.

Hamaze kubakwa ahantu 18 mu gihugu umuntu yashyirwa hihariye mu gihe yagaragaje ibimenyetso bya Ebola, bategereje ko ibizamini bigaragaza icyo arwaye.

Abanyamakuru na bo bamwe bifuje ko bakingirwa kuko bari mu byiciro by’abantu bakora imyuga ishobora kubashyira mu kaga ko guhura na Ebola kuko bagera mu byiciro by’abantu bose bashaka amakuru.

Kuva muri Kanama 2018 ubwo Ebola yongeraga kugaragara muri Repubulika Iharanira Demokarasiya Kongo, RDC, abantu 3406 bagaragaje ibimenyetso bya Ebola, muri bo 3288 bayigaragarwaho, muri abo 2 236 irabahitana.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.