20°C , Partly cloudy | Kigali-Rwanda

EAC: Abashinzwe iperereza barigira hamwe kurwanya iterabwoba

Yanditswe na Mugisha Benigne

Ku ya 06-02-2019 saa 08:11:34
Umugaba Mukuru w'Ingabo z'u Rwanda Gen. Nyamvumba Patrick (ufite mikoro) afungura inama (Foto Mugisha B.)

Ingabo zikuriye serivisi y’iperereza mu Karere k’Afurika y’Uburasirazuba  (EAC) bahuriye i Kigali mu nama y’iminsi ibiri igamije kwigira hamwe ibibazo by’umutekano n’iterabwoba muri aka karere n’uburyo bwo kurikumira no  kurirwanya.

Nk’uko byasobanuwe n’Umugaba mukuru w’Ingabo z’u Rwanda, Gen Patrick Nyamvumba, iyi nama iteganywa mu ngingo ya 2 igaragara mu masezerano y’imikoranire mu bya gisirikare mu muryango w’Afurika y’Iburasirazuba, ikazanashyiraho  ingengabihe y’ibikorwa bya Gisirikare muri uyu mwaka wa 2019 .

Gen Nyamvumba yavuze ko nyuma ya Uganda yari iri ku mwanya w’ubuyobozi bw’ingabo zikuriye iperereza mu Karere, u Rwanda ari rwo rufata uyu mwanya guhera muri uyu mwaka wa 2019, ari na yo mpamvu inama yabereye i Kigali.

Avuga ko imikoranire myiza y’inzego za gisirikare  zishinzwe iperereza mu Karere izafasha kurwanya iterabwoba n’imitwe yitwaje intwaro aho yagaragara hose muri aka karere k’Afurika y’Uburasirazuba.

Ati “Gukorana bya hafi no guhanahana amakuru bizafasha gukemura ikibazo cy’umutekano muke mu Karere k’Afurika y’uburasirazuba no kugira amakuru hakiri kare tugakumira nta kiraba.”

Col. Andrew Nyamvumba ukuriye iperereza mu Ngabo z’u Rwanda, avuga ko iyi nama ari imwe mu zisanzwe mu zikorwa n’ibihugu bigize umuryango w’Afurika y’Uburasizuba, bakaba bagamije guhana amakuru ku mutekano w’abaturage.

Ati “Iyi nama irasanzwe, ibibazo bikomeye ni ibijyanye n’umutekano mu baturage cyane cyane  iterabwoba n’imitwe yitwaje intwaro, turabiganira tugire amakuru amwe ibivamo tubigeze ku bayobozi bakuru ari na bo bazafata ibyemezo.”

Avuga ko imikoranire ari myiza kuko babasha guhana amakuru, ariko ngo hari n’ubwo bigorana bitewe n’uko hari ibyo bamwe baba bagamije bitandukanye ku bihugu, ariko ngo ibyo bumvikanyeho bikorwa neza.

Ati “Imbogamizi duhura nazo ni ukubona amakuru ku gihe n’uburyo bwo kuyakoresha, tuyabonye mbere tukayahana mbere twafatanya tukagira icyo tugeraho, gusa ntitwari twabigeraho, iyo atabonetse kare biba bigoye gukumira igishobora kuba kindi.”

Yatanze urugero ku bitero by’iterabwoba biherutse kubera muri Kenya ngo byaba n’ahandi hose mu gihe nta makuru yabonetse ngo bikumirwe, agasanga rero inzego z’iperereza za gisirikare zikwiye kujya zihanahana amakuru ku gihe ngo ibitero nk’ibyo bikumirwe hakiri kare.

Brig. Gen. Gatsigazi Tumusiime, umuyobozi muri serivisi y’iperereza muri Uganda, avuga ko iyi nama yateraniye i Kigali mu Rwanda yahuje abayobozi b’iperereza muri Afurika y’Uburasirazuba, ikaba igamije kureba hamwe uko umutekano uhagaze mu karere.

Na we yagarutse ku bitero by’iterabwoba byabaye ku gihugu cya Kenya bikozwe na Alshabab, avuga ko ibyihebe byateye hoteri yo muri Kenya, byose bikaba byaratewe no kutabona amakuru hakiri kare, ngo iyo bimenyekana mbere, ibitero biba byarakumiriwe ndetse ngo bikanaburizwamo.

Ati “Gushakira umutekano akarere, bisaba gufatira ingamba hamwe tugakumira mbere y’uko umutekano muke uba, byazafasha kubonera umutekano abaturage bacu.”

Ku bijyanye n’u Rwanda rugiye guhabwa kuyobora uyu muryango rusimbuye igihugu cya Uganda, yavuze ko muri iyi nama y’iminsi ibiri u Rwanda ari rwo ruzaba ruyoboye izi nama.

Yavuze ko ubuyobozi bw’uyu muryango bwari bufitwe n’igihugu cya Uganda kimwe n’uko n’Umuryango w’Afurika y’Uburasirazuba wari uyobowe na Uganda, kuri ubu ubuyobozi bwawo bukaba bufitwe n’u Rwanda, bivuze ko n’inama y’ubuyobozi bw’iperereza mu ngabo igomba guhita ifatwa n’u Rwanda mu gihe cy’umwaka umwe.

Abayobozi b’iperereza mu ngabo z’ibihugu by’Afurika y’Uburasirazuba bitabiriye iyi nama yabereye i Kigali uretse igihugu cy’u Burundi kidahagarariwe.

Umugaba Mukuru w’Ingabo z’u Rwanda Gen. Nyamvumba Patrick (ufite mikoro) afungura inama (Foto Mugisha B.)

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.