19°C , Partly cloudy | Kigali-Rwanda

Dutemberane Pariki y’Ibirunga, inzira ikugeza ku Rugano (Amafoto)

Yanditswe na KAYITARE JEAN PAUL

Ku ya 22-07-2020 saa 08:57:54

Mu gihe kitarambiranye kiri imbere, ba mukerarugendo bazaba baryoherwa no gusura ibice bitandukanye by’Igihugu bibumbatiye amateka y’Urugamba rwo Kubohora u Rwanda.

Urugano ni kimwe mu bice bigize Pariki y’Ibirunga gikonja ndetse gitatswe n’urusobe rw’ibinyabuzima rugizwe n’ibimera, udukoko n’inyamaswa zitandukanye.

Ni agace gaherereye mu Karere ka Musanze mu Majyaruguru y’u Rwanda, gafite umwihariko w’amateka atangaje ajyanye n’urugamba rwo kubohora u Rwanda, aho Ingabo za RPA-Inkotanyi zamaze amezi n’amezi mu gihe byari bigoye ingabo zari iza FAR (Ex-FAR) kwiyumvisha ko hari n’uwahamara amasaha atanu ataraba ubutita kubera ubukonje bukabije buharangwa.

Urugendo rwerekeza muri ako gace ruhera ku murambi wagereranya n’Ikirenge cya Pariki y’Ibirunga, ahagaragara amabuye y’Amakoro n’ubutaka bwera cyane buhinzwemo ibireti, ibirayi, ibigori, ibitunguru n’ibindi bihingwa.

Mbere yo kwinjira muri Pariki y’Ibirunga, abahasura bose babanza guhabwa amabwiriza aranga umushyitsi muri ako gace kuje ibyiza bitangaje bigoye gusanga mu bindi bice by’Igihugu abantu babamo buri munsi.

Aha ni murugano aho Inkotanyi zabaye mu gihe cy’urugamba rwo kubohora igihugu (Foto Kayitare J.P)

Kugera kuri site y’amateka y’urugamba rwo kwibohora bitwara amasaha agera kuri atanu wurira Ibirunga. Muri icyo gihe, uwasuye pariki agenda abona urusobe rw’ibinyabuzima rutandukanye ndetse akanafashwa  kurusobanukirwa.

Urugano ni ishyamba ry’inzitane rigizwe n’imigano yakuze, riherereye rwagati mu Kirunga cya Muhabura n’icya Gahinga  aho Perezida Kagame yashinze Ibirindiro bya mbere mu rugamba rwo kubohora Amajyaruguru y’Igihugu.

Itangishatse Ignace waherekeje itsinda ry’abanyamakuru riheruka gusura ako gace, yagize ati: “Urugano ni agace kari ku butumburuke bwo hejuru, kabaye ak’ingenzi cyane mu rugamba kuko kabaye ubwihisho bw’ingenzi Ingabo za RPA-Inkotanyi zari zikeneye icyo gihe ngo zongere kwisuganya. Ntawashoboraga kwemeza ko hari abantu bahamara kabiri.”

Ingabo za RPA-Inkotanyi zinjiye mu rugano mu Gushyingo 1990 zihaba kugeza muri Nyakanga 1991 ubwo zasubiraga i Gikoba, mu Murenge wa Tabagwe, Akarere ka Nyagatare.

Amateka arambuye ahishiwe abazasura ingoro ndangamateka z’urugamba rwo Kwibohora, reka tugaruke ku byiza nyaburanga biri mu rugendo rwerekeza ku Rugano.

Mu ri urwo rugendo ni ho uva mu magambo wajyaga wumva ko Igihugu cy’u Rwanda gifite ibyiza nyaburanga birimo Ibirunga, Pariki, imisozi, amazi, ingoro z’abami n’ibimenyetso by’aho batuye, inka z’inyambo n’ibindi, ahasigaye ukemezwa n’ibikorwa.

Imvaho Nshya yabateguriye inkuru y’amafoto, igaragaza ibimera n’ibihingwa usanga ku ntangiriro za Pariki y’Ibirunga by’umwihariko mu nzira ikugeza mu rugano.

Buri wese waterwa n’urukumbuzi kubera ibyo abona mu mafoto, akwiye gusura ibi byiza nyaburanga bikurura abanyamahanga bigatuma bakunda urw’imisozi igihumbi.

Ugitangira Pariki y’Ibirunga uhabona ibihingwa birimo n’ibigori (Foto Kayitare J.P)

Hari aho ibigori biba bivanzwe n’ibishyimbo bita “Ruvuninkingi” bigira uruyange rutukura

Itangishatse Ignace uyobora akanasobanura ibigize Pariki n’ibiyirimo (Foto Kayitare J.P)

Ba mukerarugendo bashimishwa no kwifotoreza mu bireti kubera indabo zabyo (Foto Kayitare J.P)

Ibireti nk’ibihingwa ngengabukungu urabibona ugitangira kuzamuka Pariki (Foto Kayitare J.P)

Indabo z’ibireti ni zo zisarurwa zigakorwamo imiti yica udukoko (Foto Kayitare J.P)

Ubona ibiruri abarinda imyaka bubaka kugira ngo imbogo n’ingagi zitabonera; abahinzi bashobora no kugamishamo abana igihe havuye izuba ryinshi (Foto Kayitare J.P)

Muri Pariki y’Ibirunga habamo ibimera bibereye ijisho (Foto Kayitare J.P)

Kubera imbeho yo mu rugano ituma ibimera bihindura ibara (Foto Kayitare J.P)

Ubu ni ubwoko bw’inzoka ariko itaryana iboneka mu Birunga (Foto Kayitare J.P)

Muri Pariki y’Ibirunga uhabona ibiti bisohora ibimeze nk’amariragege (Foto Kayitare J.P)

Kubera imbeho yo mu rugano usanga rwaratoye urubobi (Foto Kayitare J.P)

Iki kimera keraho intobo (Foto Kayitare J.P)

Ni gake ushobora kubona izuba riva muri Pariki y’Ibirunga by’umwihariko mu Rugano (Foto Kayitare J.P)

 

Ubukonje bwo mu Rugano bugira ingaruka no ku bimera (Foto Kayitare J.P)

     

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.