19°C , Mostly cloudy | Kigali-Rwanda

Dukundimana yasohoye indirimbo ‘Himbazwa’, iki ngo ni cyo gihe cye cyo gukora

Yanditswe na Gisubizo Gentil M.

Ku ya 07-01-2020 saa 16:50:25
Laetitia Dukundimana Mulumba umuhanzi uririmba indirimbo zo kuramya no guhimbaza Imana

Umuhanzi Laetitia Dukundimana Mulumba umugore wa Producer Mulumba John (Bill Gates) yakoze mu nganzo ahimbaza Imana mu ndirimbo ‘Himbazwa’ yashyize hanze, avuga ko iki ari cyo gihe cye cyo gukora nyuma y’igihe kitarigito yari amaze atumvikana mu muziki.

Mu kiganiro n’itangazamakuru, Laetitia Dukundimana Mulumba yabanje gushima Imana imushoboje gushyira itafari rye mu murimo wayo.

Dukundimana yagize ati, “Mbere y’ibintu byose ndashima Imana, ni ukuri ishimwe ryanjye imbabarire riyigereho irifate kandi iryishimire, icyo nyishimira cya mbere ni uko ari yo ibashisha umuntu mu byo akora nanjye ikaba imbashishije  mu gihe nk’iki guhaguruka ngo nshireho itafari ryanjye mu murimo wayo.”

Yavuze ko iyi ndirimbo ye ‘Himbazwa’ ariyo yahereyeho yandika ubwo yatangiraga umuziki, kuba ayishyize hanze bikaba bimushimishije cyane.

Ni indirimbo yanditse ari mu bihe byiza by’ubusabane n’Imana, Dushimimana yakomeje agira ati, “Nayanditse kera ndi mu bihe byiza niyo ndirimbo ya mbere nanditse, sinshobora kubyibagirwa, ibanziriza izindi nyinshi nahawe nyuma yaho. Umwihariko navuga ifite ni uko nayanditse maze gusobanukirwa neza ibyo Kristo yakoze ku musaraba ku bwanjye.

Nari maze gushyikira neza imigisha yose duhererwa muri Kristo Yesu iyo duhindutse icyaremwe gishya.

Mu bifatika by’umubiri nta byinshi nari mfite icyo gihe naheraho mvuga ariko mu buryo bw’Umwuka nabashaga gushyikira byinshi byakoretse muri njye mbere.

Iyi ndirimbo nayanditse ndi mu rusengero ahantu mu materaniro hari mu mwaka wa 2007 urumva ko hashize igihe.”

Ku bijyanye n’ingamba azanye nyuma y’igihe kitari gito yari amaze atumvikana mu muziki, yahamije ko iki ari cyo gihe cye cyo gukora.

Yunzemo ko Imana izamushoboza kuko ntacyo yakora ubwe itamushyigikiye, yagize ati, “Urumva buri kintu cyose kigira igihe cyategekewe niko Umwami Imana yahamije, Maze igihe ncecetse nibyo atari amahitamo yanjye cyangwa atari uko nahagaritse umurimo nahamagariwe.

Ahubwo ni cyo gihe naringezemo buriya kuko nari mfite byinshi mpugiyemo, ariko ubu numva Uwiteka akinguye igihe cyo gukora nanone kuritwe ni we uzadushoboza ndabizi neza nta na kimwe twashobora atabibayemo.”

Mu gusoza iki kiganiro yatangaje ko mu minsi micye amashusho y’iyi ndirimbo azaba yageze hanze, twabibutsa ko uyu muhanzikazi ari kubarizwa mu Bufaransa hamwe n’umuryango we ndetse iyi ndirimbo ye nshya ‘Himbazwa’ ikaba yarakozwe ikanatunganywa n’umugabo we Producer Bill Gates.

Uyu muhanzi asanzwe ari umufasha wa Producer Bill Gates

Umwanditsi:

Gisubizo Gentil M.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.