25°C , Partly sunny | Kigali-Rwanda
Indege zitagira abapilote zifashishwa mu kugeza amaraso ku bitaro mu Rwanda

Drone zigiye kugeza amaraso ku bitaro 21 zivuye kuri 12

Yanditswe na MUTUNGIREHE SAMUEL

Ku ya 09-01-2018 saa 07:58:50

Umunyamabanga Uhoraho muri Minisiteri y’Ubuzima, Dr Nyemazi Jean Pierre yatangaje ko indege nto zitagira abapilote zifashishwa mu kugeza amaraso ku bitaro bitandukanye, zizwi nka “drones”, zigiye kwagura serivisi zikagera ku bitaro bigera kuri 21 nk’uko byateganywaga mbere, mu gihe ubusanzwe zageraga ku bitaro 12 mu gihugu.

Indege zitagira abapilote zifashishwa mu kugeza amaraso ku bitaro mu Rwanda

Yabitangaje mu kiganiro n’abanyamakuru ejo hashize tariki ya 8 Mutarama 2018, ubwo Minisiteri y’Ubuzima mu Rwanda yakiraga itsinda ry’abantu 19 baturutse muri Minisiteri y’Ubuzima yo muri Leta Zunze Ubumwe bwa Tanzania no mu Ishyirahamwe nyafurika ry’ibigo bitanga amaraso (AfSBT), baje kureba uko izo serivisi zikorwa mu Rwanda.

Dr Nyemazi yavuze ko umwaka ushize izo “drones” zitwara amaraso ku bitaro no ku bigo nderabuzima bitandukanye zivuye ku kibuga cyazo giherereye mu karere ka Muhanga, zikaba zimaze gutanga amapaki arenga 5 000 y’amaraso.

Yakomeje avuga ko mu gihe bizaba bishoboka izo ndege nto zizajya zigeza amaraso ku bitaro byose muri gahunda iteganywa.

Ati “Turateganya ko iyo gahunda yakura ikaba yarenga ibitaro 12 ikagera hafi ku bitaro 20 no kuri 21 ndetse uko tugenda twiga uwo mushinga tureba n’uburyo ugenda udufasha n’aho bishoboka ko wakora, tukaba twazigeza no kubitaro hafi ya byose igihe byaba bishoboka”.

Yongeyeho ko kuva izo ndege zatangira gukoreshwa hari icyo zagabanyije mu byagenderaga muri serivisi zo kugeza amaraso ku bitaro biba biyakeneye no ku murwayi hashingiwe cyane ku gihe bitwara.

Ati “Ubona ko hari ikintu kigaragara byagiye bimara, cyane cyane mu kugabanya igihe cyabaga gisabwa kugira ngo amaraso agere ku muntu uyakeneye cyangwa ku bitaro biyakeneye, aho byagabanutse bikava ku masaha atatu bikagera ku minota iri munsi y’isaha amaraso akaba yageze ku bitaro aho bayahamagaje.

Ibyo birafasha cyane kuko bigabanya amafaranga yakoreshwaga mu bijyanye no gufata imodoka ikajya kuzana amaraso haba ku rwego rw’igihugu cyangwa ku rwego rw’intara, ariko bikanagabanya n’amafaranga yashoboraga kuba yajya mu bijyanye no kubika amaraso menshi kugira ngo igihe uzayakenera uzabe uyafite hafi.”

Umuyobozi w’iryo tsinda ryaje kureba uko serivisi z’amaraso zitangwa mu Rwanda, akaba n’ukuriye ubuvuzi muri Minisiteri y’Ubuzima, Iterambere ry’abaturage, uburinganire hagati y’abagore n’abagabo, abakuze n’abato yo muri Leta Zunze Ubumwe bwa Tanzania, Prof. Muhammad Bakari Kambi, yavuze ko na bo bamaze kuganira na sosiyete ya Zipline yazanye izo ndege mu Rwanda bakaba hagiye gutangira kuzifashisha iwabo.

Mu bitaro izi ndege zitagira abapilote zigezamo amaraso birimo ibitaro bya Kabgayi, Ruhango, Nyanza, Muhororo, Gitwe, Kirinda, Gakoma, Gikonko, Kaduha n’ibindi.

 

TANGA IGITEKEREZO

Leave a Reply

Be the First to Comment!

avatar