25°C , Partly sunny | Kigali-Rwanda
Felix Tshisekedi wegukanye intsinzi, ayoboye ishyaka rya UDPS: Union for Democracy and Social Progress.

DRC: Hagiye kubaho ihererekanya ry’ubutegetsi bwa mbere mu myaka 59

Yanditswe na Nshimyumukiza Janvier Popote

Ku ya 10-01-2019 saa 09:26:39

Felix Tshisekedi uyobora ishyaka ritavuga rumwe n’ubutegetsi rya UDPS, ni we watorewe kuyobora Repubulika Iharanira Demokarasi ya Congo.

Ni bwo bwa mbere hagiye kubaho ihererekanya ry’ubutegetsi mu myaka 59 ishize, kuva iki gihugu cyabona ubwigenge mu mwaka wa 1960.

Abasesenguzi b’ibya politiki bavugaga ko Leta izakora ibishoboka byose ngo insinzi yegukanwe na Emmanuel Ramazani Shadar wari ushyigikiwe na Perezida Kabila Joseph.

Mbere y’amatora yabaye kuwa 30 Ukuboza 2018, ibitekerezo by’abaturage benshi (pre-election polls) byahurizaga ku kuba Martin Fayulu na we utavuga rumwe n’ubutegetsi, ari we uzatsinda amatora.

Tshisekedi yatangajwe nk’uwatsinze by’agateganyo n’amajwi 38.57%, nk’uko byatangajwe na Perezida wa Komisiyo y’Amatora, Corneille Nangaa, ahagana 02:00 GMT mu kiganiro n’abanyamakuru.

Perezida wa Komisiyo y’ASmatora Corneille Nangaa atangaza ibyayavuyemo mu ijoro ryakeye

Ubwitabire bw’amatora bwari kuri 48%, nk’uko byatangajwe na Komisiyo y’Amatora, aho benshi batoye Tshisekedi (miliyoni 7), Martin Fayulu atorwa na miliyoni 6,4 mu gihe Emmanuel Shadary yatowe na miliyoni 4,4.

Barnabe Kikaya Bin Karubi, umwe mu bajyanama ba Perezida Kabila, yavuze ko bemeye ibyavuye mu matora byatangajwe kuri uyu wa Kane.

Yabwiye Reuters ati, “Birumvikana ko tutishimye kuko umukandida wacu (Shadary) yatsinzwe, ariko abaturage ba Congo bahisemo demokarasi kandi demokarasi yatsinze.”

Mu magambo  yabwiye ibihumbi n’ibihumbi by’abaturage  yishimira insinzi mu Murwa Mukuru Kinshasa, Tshisekedi yavuze ko azaba “Perezida w’abanyecongo bose.”

Felix Tshisekedi wegukanye insinzi, ayoboye ishyaka rya UDPS asuhuza abamushyigikiye i Kinshasa bishimira insinzi

Kiliziya Gatulika yari yatangaje ko imibare ifite yerekana ko Martin Fayulu ari we watsinze amatora, bikurura umwuka w’imyigaragambyo mu bamushyigikiye.

Abashyigikiye Fayulu bakekaga ko Perezida Kabila azakora igituma uwo yari ashyigikiye Emmanuel Shadary atsinda amatora, cyangwa agatera ingabo mu bitugu Tshisekedi uyobora ishyaka rikomeye kurusha andi ritavuga rumwe n’ubutegetsi.

Nyuma y’aho Komisiyo y’Amatora itangaje ibyavuye mu matora, Fayulu yahise atangaza ko we atabyemeye, avuga ko amajwi ye yibwe.

Ati, “Izo miliyoni zirindwi zindi z’amajwi zavuye he (za Tshisekedi)? Muri 2019 twamagane ko insinzi y’abaturage yibwa.”

Abapolisi bahosha imyigaragambyo bakwirakwijwe iruhande rwa Komisiyo y’Amatora no mu bindi bice bya Kinshasa.

Umunyamabanga Mukuru w’Umuryango w’Abibumbye, Antonio Guterres yasabye impande zose kwirinda icyatuma Congo isubira mu bihe bibi, asaba ko ibibazo byavuka bishingiye ku matora byakemurwa mu nzira zigenwa n’Itegeko Nshinga.

Abatavuga rumwe n’ubutegetsi baciwe intege no kutumvikana hagati muri bo, ndetse no kuba komisiyo y’amatora yarateye utwatsi ubusabe bwo kwiyamamaza bw’abanyepolitiki bakomeye barimo Jean Pierre Bemba na Moïse Katumbi.

Felix Tshisekedi watowe, ni mwene Etienne Tshisekedi warwanyaga ubutegetsi bwa Mobutu n’ubwa Kabila. Yapfuye umwaka ushize, ishyaka risigara mu maboko y’umwaka we.

Amatora yari yarakerejwe imyaka ibiri, aho abereye na bwo itangazwa ry’ibyayavuyemo rirakerezwa, ryigizwaho ikindi cyumweru kubera ibibazo by’ibikoresho muri iki gihugu gituwe n’abaturage miliyoni 80.

Manda ya kabiri ya Perezida Kabila Joseph yarangiye muri 2016, Itegeko Nshinga rikaba ritaramwemereraga kwiyamamariza manda ya gatatu. Amatora yigijweyo imyaka 2, aba mu mpera za 2018.

Kabila yashyigikiye Emmanuel Shadary ariko biba iby’ubusa, kuko Shadary atabonwamo ubushobozi bwinshi mu bya politiki ku giti cye.

Kiliziya Gatulika ifatanyije n’andi matorero y’abaporoso, yasabye Komisiyo y’Amatora gutangaza ibyo abaturage batoye, ikareka gutangaza ibyo yishakiye.

Indorerezi z’amatora z’imbere mu gihugu zavuze ko amatora atagenze neza mu gihe cyo gutora ndetse no kubara amajwi, ariko indorerezi zo mu karere zo zivuga ko zibona yaragenze neza nubwo atari cyane.

Kabila Joseph yayoboye iki gihugu kuva muri 2001 ubwo se Kabila Laurent wahiritse Mobutu mu 1997, yicwaga.

Mobutu yari yarafashe ubutegetsi mu 1965 ahiritse Joseph Kasa-Vubu.

Mbere yaho, mu 1960, Mobutu wari Umugaba w’Ingabo yanahiritse Minisitiri w’Intebe Patrice Lumumba, amusimbuza Joseph Iléo.

Lumumba yahiritswe mu gihe atajyaga imbizi na Perezida Kassa-Vubu, aho yahiritswe ashinjwa gukorana n’Abarusiya mu gihe Mobutu na Kassa-Vubu batabikozwaga.

Mobutu yaje guhirika na Kassa-Vubu, abanza kumufungira iwe mu rugo, hanyuma aramurekura, aza gupfa mu 1969 azize uburwayi.

Ni bwo bwa mbere mu mateka y’iki gihugu hagiye kubaho ihererekanya ry’ubutegetsi kuko ubuyobozi uko bwasimburanye, utaravuyeho ahiritswe yavuyeho yishwe.

Ni na bwo bwa mbere kandi umuntu wo ku ruhande rutavuga rumwe na Leta atsinze amatora muri iki gihugu.

Gutsinda kwa Tshisekedi, na we bisa n’ibyamutunguye. Yabwiye abishimiraga insinzi ye ati, “Nta muntu watekerezaga ko umukandida wa opozisiyo yakwegukana insinzi,” nk’uko tubikesha BBC.

Yashimiye Perezida Kabila, asaba abantu kudakomeza kumufata nk’uhanganye na Kabila kuko ubu ari abafatanyabikorwa, ati, “Uyu munsi ntimumufate nk’uwo duhanganye, ahubwo ni umufatanyabikorwa mu rugendo rwa demokarasi mu gihugu cyacu.”

 

 

Abashyiikiye Tshisekedi bishimira insinzi ye i Kinshasa

TANGA IGITEKEREZO

One Comment on “DRC: Hagiye kubaho ihererekanya ry’ubutegetsi bwa mbere mu myaka 59”

  1. ImvahoNshya mutangiye kuduha amakuru aryoshye
    Ariko mwongere amafoto munkuru muduha make cyane

    Kdi muri abambere rwose

Leave a Reply

Your email address will not be published. Required fields are marked *