Dr. Ngirente yagaragaje uko u Rwanda ruhagaze mu ikoranabuhanga

Yanditswe na Mutungirehe Samuel

Ku ya 02-12-2019 saa 19:15:02
Minisitiri w'Intebe, Dr Ngirente Edouard ubwo yari mu Nteko Ishinga Amategeko

Minisitiri w’Intebe Dr. Ngirente Edouard, yagaragaje ibikorwa bya Guverinoma bijyanye n’Ikoranabuhanga (ICT) mu bukungu bushingiye ku bumenyi n’ibigiye gukorwa mu kurushaho kwihutisha gahunda yo kubaka ubukungu bushingiye ku bumenyi.

Yabitangarije mu Nteko Ishinga Amategeko imitwe yombi, kuri uyu wa 2 Ukuboza 2019. Dr. Ngirente yavuze ko ibyo u Rwanda rukora bijyanye na gahunda ruhuriyeho n’ibindi bihugu mu kerekezo k’Isi n’Umugabane w’Afurika, ariko u Rwanda rukagira n’ingamba rwihariyeho zirimo ikerekezo 2020 kiri kugera ku musozo.

Dr. Ngirente yavuze ko umurongo mugari wo kwihutisha interineti ubu wagejejwe mu gihugu hose, kuri kirometero zirenga ibihumbi birindwi (km 7000), mu rwego rwo kurushaho guteza imbere ibikorwa remezo by’ikoranabuhanga, kuva mu 2012 kugeza mu 2018 hashowe miriyoni zirenga 80 z’amadorari y’Amerika.

Yakomeje avuga ko mu mwaka wa 2013 u Rwanda rutangiye gukoresha uburyo bwa digital buvuye mu buryo bwa Analogue, byatumye umubare wa tereviziyo, radiyo n’ibinyamakuru bikorera kuri interineti wiyongera, aho kuri ubu hari radiyo 34, tereviziyo 21 n’ibinyamakuru birenga 100 byandika amakuru.

Ati “Ubu buryo bwa digital bwatumye aho amajwi n’amashusho bigera hiyongera kandi bikagerayo binoze.”

Mu rwego rwo kubika neza amakuru y’ibigo bya Leta n’abikorera, mu 2010 hashyizweho ububiko bw’amakuru bwizewe “National Data Center”. Mu rwego rwo guhindura u Rwanda igicumbi k’ikoranabuhanga mu mwaka wa 2016 hatangijwe umushinga wa ‘Kigali Innovation City’ ugamije kurerera u Rwanda n’Isi abahanga mu bumenyi n’ikoranabuhanga, aho kugeza ubu abafatanyabikorwa batandukanye bemeye kuza gufatanya n’u Rwanda.

Minisitiri w’Intebe ati “Biteganyijwe ko mu gihe cya vuba n’ibigo bikomeye mu ikoranabuhanga ku Isi na byo bizitabira bikaba byaza na byo gufatanya gukorera mu Rwanda. Ibigo bizaza bizahabwa ibibanza byo gukoreramo mu gace uyu mushinga ukoreramo, hafi y’icyanya cyahariwe inganda ‘Kigali Special economic Zone’.”

Mu 2013 hashyizweho urwego rushinzwe gukumira ibyaha rukora amasaha yose kugira ngo imikoreshereze y’ikoranabuhanga idateza ibibazo mu banyarwanda hibwa amakuru yabo.

Hagamijwe kugeza ku banyarwanda interineti yihuse ya 4G, mu mwaka wa 2013 hashyizweho uburyo wo gukoresha uwo murongo, ukaba umaze kugezwa mu gihugu hose kandi ukora neza  ku kigero cya 73%.

Mu bindi birimo ibyakozwe mu rwego rw’ubuzima, aho abantu bashobora kubona ibigo byigenga bibahuza na muganga mu kwisuzumisha no kwivuza, ibitaro bigera kuri 6 bifite ubushobozi bwo gusuzuma umurwayi akavurwa n’abandi baganga bari ku bitaro bya CUHK batiriwe bagera aho arwariye, bifashishije amakuru atangwa binyuze mu ikoranabuhanga.

Mu rwego rw’ubukungu, abantu bashobora kugura ibintu bifashishije uburyo bw’ikoranabuhanga, ibintu bikabageraho batavuye aho bari, bakabasha no kwishyura serivise batavuye aho bari.

Mu burezi naho, amashuri ya kaminuza afite interineti yose, amashuri yisumbuye amenshi agerwaho nayo n’amashuri abanza amwe n’amwe afite ibyumba by’ikoranabuhanga kandi abanyeshuri bafite mudasobwa zibafasha kwiga ikoranabuhanga.

Mu rwego rw’ubutabera naho, Abanyarwanda batanga ibirego bifashishije ikoranabuhanga, bakabasha no kugezwaho amakuru yose y’uko urubanza rugenda n’imyanzuro yose ku gihe.

Ikoranabuhanga kandi ryafashije Leta y’u Rwanda kugabanya amafaranga abayobozi mu nzego za Leta mu turere bari kuzakoresha baza mu nama i  Kigali, aho uburyo bwa ‘Video Conference’ kuva bwatangizwa mu 2015 bwakoreweho inama 300 zituma Leta izigama miriyari 3 z’amafaranga y’u Rwanda.

Abadepite batandukanye bagaragaje ko bakiri aho imbaraga zikenewe kongerwa mu ikoranabuhanga, nk’aho bagiye basanga ihuzanzira rifasha terefone gutumanaho rizamo ibibazo cyane cyane mu bice byegereye imipaka u Rwanda ruhana imbibi n’ibindi bihugu basanze hari ibibazo byo kwiganza kw’iminara yo hanze kubera ari yo ibari hafi.

Depite Mukabunani Christine yagaragaje kandi ko abarimu na bo bakeneye kubanza bakagerwaho n’ikoranabuhanga mu mashuri, ntiribe iry’abigisha amasomo y’ikoranabuhanga gusa, kugira ngo badasigara inyuma.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.