23°C , Mostly cloudy | Kigali-Rwanda

Dr. Mukeshimana agaragaza igikorwa ku kwihaza mu biribwa kw’Afurika

Yanditswe na MUTUNGIREHE SAMUEL

Ku ya 17-04-2018 saa 07:20:58

Mu byo Umuryango w’Afurika Yunze Ubumwe (AU) ushyize imbere mu ntego za 2063 birimo no kwihaza mu biribwa (Food Security), aho uteganya ko hagomba gushyirwaho politiki n’inzego zikomeye zita ku ntego z’iterambere rirambye (SDGs), hakongerwa umusaruro mu buhinzi, kwihaza mu biribwa no mu mirire, kongerera agaciro ibikomoka ku buhinzi, kubibonera amasoko n’ibindi.

Minisitiri w’Ubuhinzi n’Ubworozi mu Rwanda, Dr. Mukeshimana Geraldine, mu kiganiro kihariye n’Imvaho Nshya, yagaragaje ko intego Umuryango w’Afurika Yunze Ubumwe ufite n’u Rwanda ruzishyize imbere zirimo na gahunda yo kwihaza mu biribwa, aho u Rwanda rufite intego yo kurandura inzara mu 2025.

Minisitiri w’Ubuhinzi n’Ubworozi, Dr. Mukeshimana Gerardine (Foto James R.)

Yavuze ko muri gahunda y’ubuhinzi bugamije kwihaza mu biribwa ku mugabane w’Afurika, ubuhinzi buzaba buteye imbere, bufite umusaruro uri hejuru, bukorwa kinyamwuga, gukoresha ubumenyi no guhanga udushya, no gukoresha ubumenyi nyafurika “Indigenous knowledge”. Ubuhinzi bukaba ububyara inyungu ku buryo urubyiruko n’abagore bazaba bishimira kubukoramo no gokoresha ku buryo burambye impano y’ubutaka n’amazi no kurinda ibidukikije kugira ngo ubuhinzi bw’Afurika buzarambe.

Dr Mukeshimana akomeza avuga ko iyo ku rwego rw’umugabane bavuze ikintu nk’icyo, ku bihugu na byo biba bigomba kureba uko icyo kintu cyakwinjiramo.

Ati “Igenamigambi ryacu, ryo guteza imbere ubuhinzi rijyanye n’iki kerekezo cya ‘African Agenda 2063’; twashyizeho ingamba zo guteza imbere ubuhinzi, tugeze ku rwego rwa kane (PSTA 4); ariko turebye aho Isi igana ndetse n’ibibazo bitwugarije, nk’igihugu twarebye uko twateza imbere ubuhinzi bwacu buganisha ku masoko kugira ngo abantu babone amafaranga ariko tureba ngo ese kugira ngo ibyo abantu babigereho hakorwa iki.

Twarebye ibintu bine, nk’uko n’Intego z’Afurika zibivuga, gukoresha ubumenyi n’ikorabuhanga natwe icyo ni ikintu kirimo. Icya mbere tureba ni ugukoresha ubwo buhanga ndetse n’iyamamazabuhinzi n’iyamamazabworozi kuko amakuru y’ibiba byavuye muri uko guhanga udushya aba akwiye kugera ku bahinzi akagira icyo abamarira mu kongera umusaruro.

Ikerekezo cyo kwihaza mu biribwa, icyo kurandura inzara muri Afurika natwe nk’u Rwanda twarasinye, bigomba kurangira mu 2025; nta bwo tuzategereza mu 2063 nk’uko bimeze muri Agenda 2063. Dukunda kuvuga ko turi mu kiciro cyo kurandura inzara, niba ari uko rero bimeze hagomba gushyirwamo imbaraga nyinshi, mu bumenyi, kubukoresha, ababukoresha, n’uburyo bukoreshwa kugira ngo tubashe kugera kuri izi ntego z’Isi zaba n’Afurika ndetse n’iz’igihugu.”

Chairman w’Ihuriro ry’Urubyiruko rukora mu by’ubuhinzi n’ubworozi mu Rwanda, RYAF, Hategekimana Jean Baptiste, yahamirije Imvaho Nshya ko kwihaza mu biribwa byagerwaho ku mugabane w’Afurika kuko uburyo n’imikorere y’Umuryango w’Afurika Yunze Ubumwe urimo kuyoborwa na Perezida Paul Kagame bitanga ikizere kandi uyu mugabane w’Afurika ukaba ari wo wihariye abarenga 60% by’abaturage bakiri bato mu yindi migabane.

Ati “Kwihaza mu biribwa birashoboka, icya mbere ni uko ubutaka bwo muri Afurika ari bushya ugereranyije n’ubundi bw’ahandi kuko ni ubutaka butarakoreshwa n’ikoranabuhanga riteye imbere kandi burya n’ikirere cyo muri Afurika ugereranyije n’ikirere cy’ahandi kimeze neza, ni yo mpamvu usanga Abaholandi n’Abongereza bageze kure ku butaka bwo muri Afurika y’Epfo ni uko bafite icyo bahakora.

Kwiyongera kw’abaturage kujyana no gukenera ibiribwa byinshi, kandi gukenera byinshi bijyana no kubaka ubushobozi bwa muntu kugira ngo biboneke; Afurika hari urubyiruko rwinshi rwafasha kubona ibyo bikenewe; ibyo kubyubakiraho nk’Afurika ni ibintu byoroshye ko twagera ku kwihaza mu biribwa.

Kuba ibihugu by’Afurika byicara bikavuga biti reka dushyire imbaraga hamwe hanyuma turebe uko twakemura ikibazo k’ibiribwa, ni uko bazi neza ko bafite ibyabafasha kubigeraho, ibyo ubwabyo biradufasha, hari ikizere kinini buri wese arashaka kuzamura ubukungu bijyanye n’umusaruro”.

Raporo z’Ishami ry’Umuryango w’Abibumbye ryita ku iterambere, UND, zigaragaza ko kimwe cya kane cy’abakennye ku Isi, bagera kuri miliyoni 456, bari ku mugabane w’Afurika.

Kugira ngo Afurika ibashe kwigobotora inzara n’amapfa byagerwaho mu gihe hashyizweho ingamba nyazo mu kwihaza mu biribwa bihereye mu miryango, ingamba zifatika ku kuboneza imirire, harebwa cyane cyane abana bato, kongerera ubushobozi abagore, urubyiruko n’abantu bafite ubumuga, no gushyira imbaraga mu kugeza ibikorwa remezo mu byaro no koNgerera agaciro ibikomoka ku buhinzi n’ubworozi.

TANGA IGITEKEREZO

Leave a Reply

Your email address will not be published. Required fields are marked *