20°C , Mostly cloudy | Kigali-Rwanda

Dr Iyamuremye yahagarariye Perezida Kagame mu irahira rya Perezida wa Niger

Yanditswe na Imvaho Nshya

Ku ya 02-04-2021 saa 18:12:42

Kuri uyu wa Gatanu taliki ya 2 Mata 2021, Perezida wa Sena Dr Iyamuremye Augustin yahagarariye Perezida wa Repubulika y’u Rwanda Paul Kagame mu muhango w’irahira rya Perezida mushya wa Niger, Mohamed Bazoum.

Ni umuhango wabereye mu Murwa Mukuru w’icyo gihugu Niamey, akaba ari cyo gikorwa cya mbere cyo guhererekanya ubutegetsi mu buryo bushingiye kuri demokarasi kibaye mu mateka ya Niger mu myaka isaga 60 imaze ibonye ubwigenge.

Perezida Mushya wa Niger Mohamed Bazoum yarahiye nyuma y’igihe atsinze amatora mu buryo bugoye bitewe n’amananiza y’imitwe yitwaje intwaro, by’umwihariko hakaba haranageragejwe kudeta mu minsi ibiri ishize, ariko bikarangira ipfubye.

Umuhango wabaye kuri uyu wa Gatanu washimangiye ihererekanyabubasha rya demokarasi rya mbere ribaye hagati y’abaperezida b’icyo Gihugu nyuma y’imyaka 60 ishize cyigobotoye ubukoloni bw’Abafaransa, ikaba ari intambwe yishimiwe cyane haba mu Gihugu no ku rwego mpuzamahanga.

Ariko na none icyo Gihugu cyo haruguru y’Ubutayu bwa Sahara cyakunze kurangwamo umutekano muke kugeza ku minsi ya nyuma y’imyiteguro y’umuhango w’irahira wabaye uyu munsi.

Mu masaha yo mu gitondo cyo ku wa Gatatu, humvikanye urusaku rw’amasasu hafi ya Perezidansi iherereye mu Murwa Mukuru Niamey, Guverinoma itangaza ko habayeho igeragezwa rya Kudeta ariko rikaburizwamo. Ni igikorwa Leta yafashe nk’icy’ubugwari kuko cyari kigamije kwangiza isura y’amategeko n’urugendo rwa demokarasi rwatangiye muri Niger.

Ukekwaho kuyobora iyo kudeta ngo yari umusirikare mukuru mu ngabo zirwanira mu Kirere wari ushinzwe umutekano mu Birindiro bikuru biherereye i Niamey, akaba akurikiranywe n’amategeko kugeza ubu, nk’uko inzego z’umutekano zabitangarije Ibiro Ntaramakuru by’Abafaransa (AFP).

Andi makuru aturuka mu nzego z’umutekano agaragaza ko hari abandi basirkare bari bihishe inyuma y’iyo kudeta, bakaba babujijwe kugera kuri Perezidansi n’umutwe w’Ingabo zishinzwe kurinda Perezida. Nyuma yaho bamwe muri bo bamaze gutabwa muri yombi.

Perezida Bazoum agiye ku buyobozi asimbuye Mahamadou Issoufou wayoboye icyo gihugu guhera mu mwaka wa 2011. Umunyamakuru wa Al Jazerra ukorera i Niamey Ahmed Idris, yavuze ko Perezida Bazoum yarazwe ibibazo byose uwo asimbuye amaze imyaka ahanganye na byo byiyongeraho icy’abashaka guhirika ubutegetsi ku ngufu.

Umunyamabanga Mukuru w’Umuryango w’Abibumbye Antonio Guterres, ari mu bayobozi bahangayikishijwe n’imyitwarire idahwitse y’imitwe yitwaje intwaro, akaba yahamagariye abayiyoboye kureka ibyo barimo bakubahiriza ibyo Itegeko Nshingary’Igihugu cyabo riteganya.

Bazoum w’imyaka 60 watsindiye kuyobora icyo gihugu, yabaye Minisitiri w’Umutekano akaba n’umwe mu bantu ba hafi ba Perezida Mahamadou Issoufou asimbuye yikuye ku buyobozi ku bushake, nyuma ya manda ebyiri z’imyaka 5 amaze ayobora.

Gusa nanone Hama Amadou wabaye Minisitiri w’Intebe bari bahanganye yangiwe kwiyamamaza ashinjwa kugira uruhare mu icuruzwa ry’abana batoya nubwo we avuga ko ari ibirego bishingiye ku mpamvu za Politiki.

Nyuma yo gutsinda amatora kwa Perezida Bazoum ku manota 55 muri Gashyantare, hagiye hagaragara ubwiyongere bw’ibitero by’inyeshyamba ndetse n’ibibazo bya Politiki mu Gihugu .

Mu cyumweru gishize ni bwo Urukiko rw’Ikirenga rwemeje insinzi ya Bazoum, ari na rwo rwemeje ko yagombaga kurahira uyu munsi.

Umwanditsi:

Imvaho Nshya

One Comment on “Dr Iyamuremye yahagarariye Perezida Kagame mu irahira rya Perezida wa Niger”

  1. Ariko ntimukabeshye abantu yikuye kubuyobozi kubushake gute? Ko mandat ze yemererwa nitegekoshinga zari zirangiye.cg wagizengo ni Muri east Africa,Tchad,Congo brazz nabandi ntavuze bahinduritegeko Shinga nkimyenda yo kwambara

Tanga Igitekerezo

Email yanyu ntigaragazwa ku rubuga. Amazina na Email ni ngombwa.