18°C , Partly cloudy | Kigali-Rwanda
Dr Habineza Frank, Umuyobozi wa Green Party amaze gutora Abadepite (Foto Mutungirehe S.)

Dr. Habineza wa ‘Green Party’ uko amatora yagenze bimuha ikizere

Yanditswe na MUTUNGIREHE SAMUEL

Ku ya 04-09-2018 saa 07:47:20

Umuyobozi w’Ishyaka riharanira Demokarasi no kurengera Ibidukikije, “Democratic Green Party”, Dr. Frank Habineza yatangaje ko yishimiye imigendekere y’amatora rusange y’abadepite 53, ku buryo ishyaka ahagarariye rifite ikizere cyo kubona imyanya irenga 10 mu Nteko Ishinga Amategeko.

Dr Habineza Frank, Umuyobozi wa Green Party amaze gutora Abadepite (Foto Mutungirehe S.)

Yabitangaje ejo hashize, tariki ya 3 Nzeri 2018, ubwo yari amaze gutora kuri site y’itora ya Kimironko II, yo mu murenge wa Kimironko, Akagari ka Bibare, Umudugudu w’Imena.

Dr. Habineza yavuze ko ashimishijwe nuko kwiyamamaza k’umutwe wa politiki ahagarariye byagenze neza aho byabereye mu gihugu hose, kandi yishimiye ko yatoye mu mucyo no mu bwisanzure, bikaba bimuha ikizere ko bazabona imyanya mu Nteko Ishinga Amategeko.

Ati “Mu kwiyamamaza byagenze neza, twakiriwe neza n’Inzego z’ibanze n’abayobozi b’uturere, n’ahavutsemo utubazo twagiye dukemuka vuba cyane, ku buryo navuga ko byaduhaye ikizere; habayemo ubwitabire bwinshi cyane bw’abaturage, baratwishimiye ndetse mu karere ka Burera baduhaye impano.

Byatwongereye ikizere ku buryo twizeye ko uyu munsi turi butsinde; turumva ko tutabura nibura 20% by’amajwi, ni ukuvuga ngo twizeye kubona imyanya irenze 10 y’abadepite.”

Yakomeje ashimira inzego zitandukanye zababaye hafi mu kwiyamamaza, zirimo iz’umutekano, ashimira muri rusange itangazamakuru ryaba irya Leta n’iryigenga uruhare rwaryo mu gutangaza ibikorwa byo kwiyamamaza bikagera ku banyarwanda bose neza bityo bagatora bazi icyo bategereje ku wo batoye nagera mu Nteko Ishinga Amategeko.

Ati “Nubwo tutaba dufite ubwiganze mu nteko tuzakorana n’indi mitwe ya politiki izaba irimo, kuko hari indi mitwe ya politiki yiyamamaje n’abigenga, nta muntu n’umwe wavuga ngo yatsinda wenyine, twese tugomba gutsinda kandi tukazajya dukorana twese mu biganiro no mu bwumvikane.”

Bamwe mu baturage batoreye kuri Site y’itora ya Kimironko II, babwiye Imvaho Nshya ko amatora yagenze neza kandi buri wese yatoye mu bwisanzure azi n’icyo uwo atoye azamufasha kugeraho.

Murenzi Fabien ati “Abadepite ni abantu batugezaho ibintu byinshi, badutorera amategeko kandi atugirira akamaro nk’Abanyarwanda. Abiyamamaje narabumvise, ariko uburyo buri wese aba afite abo yiyumvamo cyane; nk’ubu imyaka 25 igiye gushira, ibyo tumaze kugeraho ababitugejejeho turabazi n’uburyo badufashije kubigeraho turabuzi, nta cyatubuza gutora uwadufashije kubigeraho.”

Kabagwira Beatha, yagize ati “Uwo natoye, amategeko azashyiraho ni azamura abaturage muri rusange, gukora ubuvugizi ku bizabateza imbere kandi akaba intumwa nk’uko tumutoye akagera ku bantu benshi.

Twitabiriye kwiyamamaza kwabo, ahantu hose nagiye nabonye abantu baritabiriye, abiyamamaza bakavuga ibigwi n’ibyo bazakorera Abanyarwanda. Hari abavuze ko bazasigasira ibyagezweho kandi mu by’ukuri nta n’ikindi ahubwo iyo ntego yo kunganira no gusigasira ibyagezweho numva ari byiza kurenza gukabya.”

Uhagarariye Site y’itora ya Kimironko II, Nduwimana Aline, yavuze ko hari hateganyijwe gutorera abantu 11 742, kandi gutora byatangiriye igihe, saa moya z’igitondo, nk’uko bisanzwe bigenda bakaba nta kibazo na kimwe bahuye nacyo mu gutora kuko ibintu byose byari biteguye neza.

 

TANGA IGITEKEREZO

Leave a Reply

Your email address will not be published. Required fields are marked *