22°C , Mostly sunny | Kigali-Rwanda
Regero Norbert uzwi nka Digi Digi

 Digi Digi yasobanuye uburyo yinjiye mu gukina firimi

Yanditswe na NDAMYIROKOYE FRANÇOIS

Ku ya 26-06-2019 saa 07:05:22

Regero Norbert uzwi muri  sinema nka Digi Digi  mu kiganiro  yagiranye n’Imvaho Nshya yavuze  ko ibyo gukina firimi  byatangiye akuze nyuma y’uko yabonanye n’uzwi nka Papa Sava  ubusanzwe witwa Niyitegeka Gratien akamwinjiza muri uwo mwuga.

Hatari hashira igihe kinini bahuye avuga ko Papa Sava yaje kumuhamagara maze atangira gukina uko.

Akiri muto avuga ko yakundaga gukina imikino myinshi ngo ku buryo atiyumvishaga ko kuba umukinnyi wa firimi  byazabaho akabigira umwuga.

Ati: “Mu bwana umuntu akura afite utuntu twinshi, hari ugukina umupira, gukina udukino dutandukanye ariko ntabwo nabonaga ko gukina firimi bizambera umwuga”.

Ku rundi ruhande ibyo yakundaga ari umwana bimwereka ko  byari  ibimenyetso bito  ko kugira umwuga kugina firimi byari  kubaho.

Mu muryango we avuga harimo n’abandi bakora ubuhanzi butandukanye burimo uburirimbyi no gushushanya.

Uretse gukina firimi avuga ko afite impano yo kuririmba ngo ariko yarabiretse.

Uzwi nka Digi Digi avuga ko yakuranye   n’abahanzi barimo  Patrick Nyamitali, Mani Martin ndetse n’abandi.

Ubwo bagenzi be ngo biyemeza gukomeza ubuhanzi bushingiye ku kuririmba we yafashe umwanzuro wo kugana mu mwuga wo gukina ikinamico ibya firimi biziraho nyuma.

Nubwo ngo atigeze akomeza ibijyanye no kuririmba avuga ko yaririmbye mu ndirimbo z’amakorali arimo iyitwa “Joyful  singers”, “ Sky wings” ngo  kandi bagiye bakora indirimbo zirakundwa.

Akina ikinamico

Regero Norbert uzwi nka Digi Digi avuga ko ubwo yigaga mu mashuri yisumbuye ari bwo yatangiye gukina amakinamico.

Kubitangira avuga ko yahuye n’uwitwa Amani Atali  ngo ariko yari kumwe na bagenzi be atangira  gukina mu ikinimico yitwa “Iyumvire” nyuma y’aho atangira gukina no mu zindi kinamico zirimo iyitwa “Akazi kanoze” , “Umurage”, “Museke weya”, “Na yombi”, “Ipfundo ry’ubukire”, “Impamba” n’izindi.

Muri izo kinamico avuga ko hari zimwe yahuriyemo  na Niyitegeka Gratien batangira kumenyana uko. Gukina mu ikinamico bwa mbere avuga ko byamugoye ngo ariko kuko bari bafite umutoza w’umuhanga ngo yaje kubishobora.

Ikerekezo ke mu gukina ikinamico na firimi avuga ko ari ukurushaho gukura muri uwo mwuga akora ibikorwa bitandukanye.

Kugira ngo ibyo abigereho avuga ko azarushaho kwegera abamurusha ubumenyi muri uyu mwuga bamuha inama banamwungura  ubumenyi.

Avuga ko  gutangira gukina mu mukino uzwi nka Papa Sava na byo byabanje kumugora ngo kuko bwari ubwa mbere agiye imbere ya camera gufatwa amashusho.

Iyo mbogamizi ngo hiyongereyeho kuba yarakinanaga n’abantu babahanga kandi akinira n’abantu muri rusange bamaze gusobanukirwa n’ibijyanye na firimi.

Avuga kandi ko n’ubu nubwo arimo kugenda amenyera ngo ariko arakiga.

Icyamugoye cyane muri uwo mukino yavuze ko ari ukwihanganira guseka mu gihe bakinnye ikintu gisekeje ngo kuko ubusanzwe ari umuntu ukunda guhora aseka.

Nk’umuntu ukinana na Papa Sava avuga ko  amwigiraho kubaho ubuzima busanzwe, kubana n’abantu kuvuga make,  koroherana,  kumva ibitekerezo by’abandi  no kwirinda kuba ikibazo muri sosiyeti.

Uretse ibyo kandi avuga ko  Papa Sava yitanga ngo kandi  bose  bakinana ababanira neza akabanabata kimwe nk’umuyobozi wabo atagize abo atonesha ngo abandi abareke.

Kuba  yarabaye umuntu  uzwi avuga ko mbere byabaye nk’ibimugoye ngo ariko ubu yabaye inshuti ya buri wese ngo dore ko aho anyura asanga abenshi bamuzi.

Kumenyekana kwe avuga ko byamuhaye umutuzo ngo kandi bigenda bimuha amahirwe anyuranye. Ku rwego mpuzamahanga avuga ko buri mukinnyi wa firimi ashobora kumurebaho  ikiza akakimwigiraho.

Utubazo tw’amatsiko kuri we

Uzwi nka Digi Digo avuga ko ubwo yigaga mu mashuri yisumbuye atajyaga yoroherwa n’isomo  ry’ibinyabuzima  “Biology”. Akiri  umwana kandi avuga ko yakubaganaga agakunda no kuzerera ngo ariko ntiyajyaga kure y’iwabo mu rugo.

Mu biribwa avuga ko akunda  kurya ifiriti n’umureti ngo  ariko mu binyobwa akunda ikawa ngo ariko cyane cyane akunda umutobe “Juice”. Umukinnyi wa firimi Digi Digi kandi  ni umugabo ufite umugore n’abana 2.

Regero Norbert uzwi nka Digi Digi

TANGA IGITEKEREZO

One Comment on “ Digi Digi yasobanuye uburyo yinjiye mu gukina firimi”

  1. Ni ukuri unyibukije inzira ndende umuntu yanyuzemo kugira ngo ube ukora igikorwa kikishimirwa. Wibagiwe kutubwira wa mukino waryoheye benshi Agakoresho ka Nyiradisi.
    Imana igukomeze mu mwuka w’iyi mpano
    Yari umukunzi wa Digi digi

Leave a Reply

Your email address will not be published. Required fields are marked *