17°C , Partly cloudy | Kigali-Rwanda
Denmark: Abanyarwanda bifatanije na UN Women Copenhagen kwibuka Jenoside

Denmark: Abanyarwanda bifatanije na UN Women Copenhagen kwibuka Jenoside

Yanditswe na Kayitare Jean Paul

Ku ya 23-04-2019 saa 11:18:59

Muri Denmark, kwibuka ku nshuro ya 25 Jenoside yakorewe Abatutsi byitabiriwe na za Ambasade z’ibihugu bitandukanye, n’abahagarariye ibigo bifite ikicaro mu Mujyi wa Copenhagen, abanyarwanda n’inshuti z’u Rwanda.

Igikorwa cyo kwibuka cyabereye ku kicaro gikuru cya UN Nordics i Copenhagen, Ambasade y’u Rwanda mu bihugu by’Amajyaruguru y’u Burayi ku bufatanye na UN Women Copenhagen, Minisiteri y’Ububanyi n’amahanga ya Denmark bagaragarijwe uko ingabo z’Umuryango w’Abibumbye zataye Abatutsi bakicwa n’abasirikare ba Leta yariho bafatanije n’Interahamwe.

Ambasaderi Nkulikiyinka Christine agaragaza ko tariki 11 Mata 1994, ingabo za Loni zasize Abatutsi barenga ibihumbi 2.000 mu ishuri rya Don Bosco Kicukiro, aho bari bazihungiyeho bizeye ubutabazi ariko babasiga aho barigendera, bakigenda ingabo za Leta y’icyo gihe n’interahamwe zirabica.

Mu kiganiro n’Imvaho Nshya, Amb Nkulikiyinka yavuze ko abakuru bakwiye kwigisha amateka abato kugira ngo bamenye ukuri. Yagize ati “Ndihanganisha abarokotse Jenoside yakorewe Abatutsi ariko mbasaba kwibuka biyubaka. Ndasaba abanyarwanda n’inshuti zacu kurwanya ingengabitekerezo n’abapfobya Jenoside yakorewe Abatutsi”.

Akomeza agira ati “Ndabibutsa kwigisha abakiri bato amateka yacu kugira ngo na bo bamenye ukuri kandi birinde ivangura iryari ryo ryose, kubana neza nk’abanyarwanda baba muri Copenhagen no gukomeza kugira uruhare mu kubaka u Rwanda rwiza”.

Avuga kandi ko u Rwanda nubwo rwazahajwe na Jenoside yakorewe abatutsi, abanyarwanda bahisemo kudaheranwa n’amateka bubaka u Rwanda ruzira amacakubiri, kandi rutekanye.

Amb Nkulikiyinka yibukije Abanyarwanda n’inshuti zabo ko urugamba rwo kurwanya abapfobya n’abahakana Jenoside yakorewe Abatutsi ko ari urwa buri wese.

Umuyobozi wa UN Women Nordics Liaison Office, Caroline Rusten, yagaragaje ko Isi yose ikwiye kwigira ku byabaye mu Rwanda bityo Jenoside ntizasubire. Ashimangira ko ibi bikwiye kuba ihame ntakuka.

Lisbet Zilmer-Johns, Umunyamabanga wungirije ushinzwe Politike n’umutekano muri Minisiteri y’ububanyi n’amahanga ya Denmark, yashimiye u Rwanda aho rugeze rwiyubaka nyuma y’imyaka 25 rubayemo Jenoside yakorewe Abatutsi.

Mu kiganiro cyatanzwe na Tom Ndahiro, umushakashatsi akaba n’umusesenguzi kuri Jenoside yakorewe abatutsi, yagaragaje aho u Rwanda rugeze nyuma y’imyaka 25. Ndahiro yagaragaje uko Jenoside yateguwe ikaza gushyirwa mu bikorwa mu 1994.

Yagaragaje kandi ko kwibuka ari kimwe mu byatuma Jenoside itazongera kubaho ukundi. Ati “Kwibuka ni imwe mu ntwaro zikumira ko jenoside yazongera kuba aho ariho hose ku Isi, ikindi kandi kutavuga ibyabaye muri Jenoside, bituma ababikoze badakurikiranwa mu butabera”.

Abanyarwanda n’inshuti zabo muri Denmark bibutse Jenoside yakorewe Abatutsi (Foto Tom N.)

TANGA IGITEKEREZO

Leave a Reply

Your email address will not be published. Required fields are marked *