21°C , Partly cloudy | Kigali-Rwanda

Davido yishyize mu kato kubera koronavirusi

Yanditswe na Ndamyirokoye François

Ku ya 29-03-2020 saa 13:03:49
Davido n'umukunzi we Chioma

David Adeleke, umuhanzi uzwi ku izina rya Davido yatangaje ko yishyize mu kato k’iminsi 14 nyuma y’uko umugore we Chioma Rowland yanduye icyorezo cya COVID-19 gihangayikishije Isi.

Uyu muhanzi yanditse kuri konti ya Instagram, avuga ko hashize iminsi mike agarutse muri Nigeria nyuma yo guhagarika ibitaramo by’uruhererekane yagombaga gukorera muri Leta Zunze Ubumwe za Amerika.

Avuga ko umugore we n’umwana we nabo bamaze iminsi mike bavuye mu Mujyi wa London. Nta bimenyetso bya COVID-19 bombi bagaragazaga, gusa ngo bitewe n’ingendo bari baherutse kugirira mu bihugu bitandukanye biyemeje kujya kwipimisha.

Davido avuga ko bapimwe ku wa 25 Werurwe 2020, ibizamini bigaragaza ko umugore we yanduye COVID-19, abandi 31 basuzumwe bigaragara ko ari bazima barimo n’umwana we.

Yavuze ko umugore we yahise ajya mu kato ndetse na we yiyemeza kujya mu kato k’iminsi 14. Uyu muhanzi yashimye buri wese ukomeje kubazirikana mu masengesho, asaba ko abantu baguma mu ngo mu rwego rwo kwirinda ikwirakwira ry’icyo  cyorezo Yagize, ati “Twese hamwe, tuzatsinda iki cyorezo.”

Muri Nzeri 2019 ni bwo Davido yambitse  impeta umukunzi we Chioma mu birori  byabereye muri resitora  iherereye mu Mujyi wa London mu Bwongereza.

Uyu muhanzi yatangiye urugendo rushya n’umukunzi we hashize iminsi icumi amwerekanye mu muryango we mu birori byabereye ahitwa Rowland mu Mujyi wa Lagos muri Nigeria.

Urukundo rwa Davido kuri Chioma  rwagaragaye  ubwo Chioma yizihizaga isabukuru y’amavuko y’imyaka 23 mu mwaka wa 2018. Ibi byatumye Davido anashyira hanze indirimbo yise “Assurance” yahimbiye umukunzi we ndetse yanamuhaye impano y’imodoka yo mu bwoko bwa Porsche.

Icyamamare David azwi ku ndirimbo zirimo iyitwa “Risky”, “1 Milli”, “Fall”, “If” n’izindi.

Umwanditsi:

Ndamyirokoye François

Tanga Igitekerezo

Email yanyu ntigaragazwa ku rubuga. Amazina na Email ni ngombwa.