22°C , Partly sunny | Kigali-Rwanda

David Luiz ukinira Arsenal  aje gusura u Rwanda

Yanditswe na BUGINGO FIDELE

Ku ya 09-10-2019 saa 15:05:52
David Luiz ukinira ikipe ya Arsenal uje gusura u Rwanda

Myugariro w’ikipe ya Arsenal mu Bwongereza, David Luiz  aragera mu Rwanda kuri uyu wa Kane tariki 10 Ukwakira 2019 muri gahunda yo gusura u Rwanda.

Uyu mukinnyi ukomoka muri Brazil akaba yaraciye mu makipe atandukanye i Burayi arimo PSG  na Chelsea aje mu Rwanda mu gihe ikipe ya Arsenal  ifitanye amasezerano n’u Rwanda yo kwamamaza  no gukangurira  abatuye Isi kuza gusura u Rwanda “Visit Rwanda”.

David Luiz   biteganyijwe ko azakora ibikorwa bitandukanye bijyanye n’umupira w’amaguru aho azahura ikipe y’igihugu  “Amavubi” izaba yitegura gukina na Tanzania umukino wa gicuti  ndetse  ahure n’abafana.

Azasura kandi Pariki y’ibirunga mu Karere ka Musanze ahaba ingagi  anasure n’urwibutso rwa Jenoside yakorewe Abatutsi rwa Kigali  ku Gisozi.

David Luiz biteganyijwe ko azasoza uruzinduko rwe mu Rwanda  ku cyumweru tariki 13 Ukwakira 2019.

Uyu mukinnyi aje mu Rwanda mu gihe ubu i Burayi shampiyona zahagaze kubera amakipe y’ibihugu agiye  gukina imikino yo gushaka itike y’igikombe cy’u Burayi “Euro 2020”.

David Luiz Moreira Marinho ufite imyaka 32 y’amavuko uyu ni umwaka wa mbere arimo gukinira ikipe ya Arsenal aho yayigezemo muri Kanama 2019 avuye mu ikipe ya Chelsea.

Muri Gicurasi 2018 ni bwo  igihugu cy’u Rwanda binyuze mu Rwego rw’Igihugu rw’Iterambere “RDB” hasinywe amasezerano  y’ubufatanye n’ikipe ya Arsenal FC y’imyaka 3 yo gukangurira abatuye Isi kuza gusura u Rwanda “Visit Rwanda”.

Pariki y’Iburunga ni hamwe mu hantu nyaburanga David Luiz azasura

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.