Cricket: Ikipe y’u Rwanda mu bagore yabonye umutoza mushya

Yanditswe na BUGINGO FIDELE

Ku ya 16-01-2021 saa 21:29:15
Leornad Nhamburo , umutoza mukuru mushya w’ikipe y’igihugu y'u Rwanda mu cyiciro cy'abagore

Ishyirahamwe ry’umukino wa Cricket mu Rwanda “RCA” ryamaze gushyiraho umutoza mukuru mushya w’ikipe y’igihugu y’abagore, Leornad Nhamburo ukomoka muri Zimbabwe akaba yari umutoza mukuru w’ikipe ya Namibia.

Uyu mutoza wageze mu Rwanda kuri uyu wa Gatandatu taliki 16 Mutarama 2021 yasinye amasezerano y’imyaka 2 akaba  asimbuye kuri uyu mwanya, Mwanja Josua wari usanzwe ari umutoza mukuru w’ikipe y’igihugu y’abagore ubu ni we ushinzwe gahunda y’iterambere ry’umukino wa Cricket bihereye mu bakiri bato.

Leornad Nhamburo ni umutoza ufite ubunararibonye dore ko amaze imyaka 20 ari umutoza w’umukino wa Cricket muri Zimbabwe akaba  yarafashije cyane mu kuzamura uyu mukino mu kiciro cy’abagore  aho amakipe yiyongereye ndetse n’umukino ukagera mu mashuri no mu biturage.

Ubuyobozi bwa RCA butangaza ko kuzana uyu mutoza ari ukugira ngo azafashe ikipe y’u Rwanda kuzamura urwego ku ruhando mpuzamahanga.

Mu myaka ibiri ishize,  ikipe y’u Rwanda mu cyiciro cy’abagore yashoboye gukina imikino ya gicuti na Nigeria ndetse initabira ku nshuro ya mbere imikino y’amajonjora yo gushaka itike yo kuzakina igikombe cy’Isi mu bagore, imikino yabereye muri Zimbabwe taliki 05 kugeza 12 Gicurasi 2019 aho iyi kipe yatsinze imikino ibiri itsindwa indi  ibiri, kuri ubu iyi kipe y’u Rwanda  iri ku mwanya wa 7 muri Afurika  na 32 ku Isi.

Umutoza Leornad Nhamburo akazi ka mbere kamutegereje ni ugutegura kipe  izakina irushanwa mpuzamahanga ryo kwibuka rizaba muri Kamena 2021 ndetse n’imikino yo gushaka itike y’igikombe cy’Isi “ICC Women World Cup Qualifiers” izabera muri Botswana mu Gushyingo 2021.

Inshamake y’amateka y’umutoza Leornad Nhamburo

Amazina ye ni Leornad Nhamburo, yavukiye muri Zimbabwe muri Nyakanga 1980.  Yatoje ikipe ya Mashonaland Eagles yo  muri Zimbabwe (2011). Yatoje ikipe y’igihugu ya Zimbabwe nk’umutoza mukuru muri 2013 nyuma kuva 2014 kugeza 2018 agirwa umutoza wungirije. Kuva 2019 kugeza 2020, Leornad Nhamburo yari umutoza mukuru w’ikipe y’igihugu ya Nambia.

Leornad Nhamburo ari kumwe n’ikipe ya Zimbabwe yegukanye irushanwa ryo gushaka itike y’igikombe cy’Isi muri 2016, yahesheje iyi kipe kandi itike yo gukina ry’igikombe cy’Isi muri 2017 cyabereye muri  Sri Lanka.

Uyu mutoza yafashije ikipe y’igihugu y’abatarengeje imyaka 19 kwegukana irushanwa “4 Nations Under 19 Girls Tournament” ryabereye muri  Botswana muri 2014. Muri 2011 yafashije ikipe y’abatarengeje imyaka 14 kwegukana irushanwa “The Girls Under 14 Inter-franchise Tournament 2011”. Yanegukanye kandi “The Women’s Inaugural Inter-Franchise Tournament 2010”.

Leornad Nhamburo   atoza ikipe y’igihugu ya Namibia yegukanye umwanya wa kabiri mu mikino yo gushaka itike y’igikombe cy’Isi muri 2019 anahesha iyi kipe itike y’imikino y’igikombe cy’Isi yabereye muri Scotland aho iyi kipe yasoreje ku mwanya wa nyuma wa 8.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.