20°C , Partly cloudy | Kigali-Rwanda
Ikipe y'u Rwanda ubwo yitabiraga imikino ya gicuti muri Nigeria mu rwego rwo kwitegura imikino y'Afurika

Cricket: Ikipe y’u Rwanda izakina imikino 3 ya gicuti mbere y’igikombe cy’Afurika

Yanditswe na BUGINGO FIDELE

Ku ya 25-04-2019 saa 17:50:32

Kuva tariki 23 Mata 2019,  ikipe y’igihugu  mu mukino wa Cricket mu kiciro cy’abagore  yatangiye umwiherero yitegura imikino y’Afurika igamije gushaka itike y’igikombe k’Isi “ICC Women’s T20 World Cup 2020” izabera muri  Australia  tariki 21 Gashyantare kugeza 08 Werurwe 2020.

Iyi mikino y’Afurika yo gushaka itike “ICC Africa’s Women Qualifier 2019” izabera muri Zimbabwe tariki 05 kugeza 12 Gicurasi 2019.  Ikipe y’u Rwanda bikaba biteganyijwe ko izerekeza muri Zimbabwe tariki 30 Mata 2019 kuko   izakina imikino 3 ya gicuti mbere y’iri rushanwa.

Iyi mikino ya gicuti, u Rwanda ruzakina na Zimbabwe aho tariki 02 Gicurasi 2019 bazakina imikino ibiri naho undi umwe ukinwe tariki 03 Gicurasi 2019 mu gitondo.

Iri rushanwa rizitabirwa n’amakipe 9 ari yo ikipe y’u Rwanda iri mu itsinda rimwe na Nigeria, Tanzania, Mozambique na Zimbabwe izakira irushanwa naho irindi tsinda rikabamo Uganda, Namibia, Kenya na Sierra Leone. Amakipe abiri ni ukuvuga ikipe ya mbere muri buri tsinda ni zo zizabona itike  y’igikombe k’Isi.

Kapiteni w’ikipe y’u Rwanda, Uwera Sarah atangaza ko imyiteguro irimo kugenda neza kandi bafite ikizere ko bazitwara neza kuko amakipe bazakina nayo  basanzwe bakina kandi n’izo batakinnye nazo bagiye bareba imikino yabo kugira ngo bitegure bakurikije uko babonye bakina.

Yakomeje avuga ko bashimira ubuyobozi bwabafashije kwitegura uko bikwiye kuko batangiye kwitegura mu Kuboza 2018. Ati: “Twatangiye kwitegura kare, muri Mutarama 2019 twagiye gukina imikino ya gicuti  muri Nigeria  kandi byatumye urwego ruzamuka. Urebye nta kintu kini baturusha twiteguye gukina kandi Abayarwanda turabizeza ko tuzabona itike y’igikombe k’Isi.”

Ikipe y’u Rwanda yakinnye na Nigeria imikino 5 ya gicuti, itsinda imikino ibiri itsindwa imikino 3.

Uko imikino izagenda

Tariki 05 Gicurasi 2019, ikipe y’u Rwanda izatangira ikina na Nigeria. Tariki 08 Gicurasi 2019 ikine na Mozambique, tariki 09 Gicurasi 2019 ikine na Zimbabwe naho tariki 11 Gicurasi 2019 isoze ikina na Tanzania.

Abakinnyi bari mu myiteguro y’igikombe cy’Afurika

Iriho Veronique, Ishimwe Dusabemungu Diane, Uwimbabazi Antoinette, Bimenyimana Marie Diane, Vumiliya Marguerite, Ishimwe Giselle, Ingabire Sifa, Uwamahoro Cathia, Uwera Sarah, Nyirankudineza Josiane, Ikuzwe Alice, Ishimwe Henriette, Muhawenimana Immaculée na Mukaruragwa Delphine.  Kuri aba bakinnyi 14 hiyongeraho abandi babiri bashobora gusimbura ugize ikibazo ari bo Irakoze Flora na Mugisha Raissa.

Umutoza mukuru ni  Mwanja Joshua Declan naho ushinzwe gukurikirana ubuzima bw’ikipe umunsi ku wundi «Team Manager» ni Gahonzire Victoire.

Ikipe y’u Rwanda ubwo yitabiraga imikino ya gicuti muri Nigeria mu rwego rwo kwitegura imikino y’Afurika

TANGA IGITEKEREZO

Leave a Reply

Your email address will not be published. Required fields are marked *