20°C , Mostly clear | Kigali-Rwanda
Kenya ubwo yegukanaga igikombe k'irushanwa ryo kwibuka muri 2018

Cricket: Ikipe y’igihugu ya Mali mu zizitabira irushanwa ryo kwibuka

Yanditswe na BUGINGO FIDELE

Ku ya 10-06-2019 saa 08:14:28

Muri Kamena buri mwaka Minisiteri y’Umuco na Siporo “MINISPOC”, Komite Olempike y’u Rwanda ndetse n’amashyirahamwe yose y’imikino mu Rwanda bategura amarushanwa agamije kwibuka abari  mu muryango mugari wa siporo bishwe muri Jenoside yakorewe Abatutsi mu 1994.

Mu ishyirahamwe ry’umukino wa Criket mu Rwanda “RCA” batangaza ko irushanwa ryo kwibuka  “Kwibuka Cricke for Peace Women’s Tournament 2019” rizatangira tariki 16  risozwe 23 Kamena 2019.

Perezida  wa RCA, Mugarura Eddy Baraba yatangarije Imvaho Nshya ko imyiteguro bayitangiye kandi bizeye ko iri rushanwa rizagenda neza. Yakomeze avuga ko muri uyu mwaka wa 2019 iri rushanwa rizitabirwa n’amakipe 5 ari yo u Rwanda, Uganda, Kenya, Tanzania ndetse Mali akaba ari n’ubwa mbere izaba yitabiriye.

Iri rushanwa ryo kwibuka rikinwa mu kiciro cy’abagore gusa, Perezida wa RCA yasobanuye impamvu bahisemo ikiciro cy’abagore. Yagize ati: “Twaricaye duhitamo  ikiciro cy’abagore  kuko twifuza guteza imbere amahoro mu karere dutuyemo  dushingira ku miryango kandi burya iyobowe n’abagore, twabonye  dushyizeho irushanwa ry’abagore kuko ari bo babyeyi b’ejo hazaza bazaba bakuriye imiryango bizatuma tugira amahoro  mu karere.”

Kuba hazashyirwaho n’ikiciro cy’abagabo, Mugarura Eddy Baraba yavuze ko babitekereza ariko ikibazo kigihari ari amikoro. Ati: “Gahunda irahari ariko ikibazo ni ubushobozi, nituramuka tubonye amaterankunga ubushobozi bukiyongera tuzareba uko twazashyiraho n’irushanwa  mu kiciro cy’abagabo.”

Uko irushanwa rya 2019 rizagenda

Aya makipe uko ari 5 azakina hagati yayo umukino ubanza n’uwo kwishyura hanyuma izasoza ifite amanota menshi abe ari yo yegukana igikombe. Irushanwa nk’ibisanzwe rizabera kuri Sitade Mpuzamahanga ya Gahanga. Mu mwaka ushize wa 2018, ikipe y’igihugu ya Kenya ni yo yegukanye irushanwa.

Uyu mukino wa Cricket nta bwo uramara igihe kinini cyane kuko watangiye gukinwa mu Rwanda mu 1999, nyuma mu mwaka wa 2000 hashyirwaho ishyirahamwe ry’uyu mukino mu Rwanda, muri 2003 ryemerwa mu ishyirahamwe mpuzamahanga ry’umukino wa Cricket “ICC”.

Mu myaka 20 uyu mukino umaze ukinwa hari  ibikorwa byinshi byagiye bigaragara by’iterambere birimo ibikorwa remezo nka Sitade  Mpuzamahanga ya Gahanga iri mu nziza muri Afurika.

Kenya ubwo yegukanaga igikombe k’irushanwa ryo kwibuka muri 2018

TANGA IGITEKEREZO

Leave a Reply

Your email address will not be published. Required fields are marked *