20°C , Partly cloudy | Kigali-Rwanda
Ikipe ya Zimbabwe yegukanye igikombe cy'Afurika

Cricket: Ikipe ya Zimbabwe ni yo yegukanye igikombe cy’Afurika

Yanditswe na BUGINGO FIDELE

Ku ya 12-05-2019 saa 19:42:29

Tariki 12  Gicurasi 2019 ni bwo hasojwe imikino y’Afurika  mu kiciro cy’abagore “ICC Africa’s Women Qualifier 2019”  igamije gushaka itike y’igikombe k’Isi “ICC Women’s T20 World Cup 2020” aho ikipe y’igihugu ya Zimbabwe ari yo yegukanye igikombe.

Iyi mikino yabereye i Harare muri Zimbabwe kuva tariki 05 Gicurasi 2019, ikipe ya Zimbabwe yatsinze ku mukino wa nyuma ikipe ya Namibia ku kinyuranyo cy’amanota 50.  Zimbabwe yatsinze amanota 114 mu gihe Namibia yatsinze 64.

Ikipe ya Zimbabwe yegukanye igikombe cy’Afurika

Nyuma yo gutsinda, ikipe ya Zimbabwe ikaba yarahise ibona itike y’igikombe k’Isi  kizabera muri  Australia  tariki 21 Gashyantare kugeza 08 Werurwe 2020.

Ubwo ikipe ya Zimbabwe yakinaga na Nambia ku mukino wa nyuma

Ikipe y’u Rwanda yasoje ari iya 3 mu itsinda

Iyi mikino  yitabiriwe n’amakipe 9 ari yo ikipe y’u Rwanda  yari mu itsinda A  hamwe na  Nigeria, Tanzania, Mozambique na Zimbabwe yakiriye  irushanwa naho itsinda B ririmo  Uganda, Namibia, Kenya na Sierra Leone.

Ikipe y’u Rwanda yasoje ku mwaya wa 3 mu itsinda A n’amanota 4 inyuma ya Zimbabwe yabaye iya mbere n’amanota 8 na Tanzania yasoje  ku mwanya wa 2 n’amanota 6. Ku mwanya wa 4 haje Nigeria n’amanota 2 naho ku mwanya wa 5 hasoza Mozambique  idafite inota na rimwe.

Iyi kipe y’u Rwanda yatewe ingunga na I&M Bank yari yitabiriye ku nshuro ya mbere imikino nk’iyi yatsinze imikino 2 harimo uwa Mozambique na Nigeria  itsindwa indi ibiri irimo uwa Zimbabwe na Tanzania.

Ku rundi ruhande mu itsinda B, Namibia yabaye iya mbere mu itsinda n’amanota 6, ikurikirwa na Uganda n’amanota 4, Kenya 2 naho Siera Leone isoza ari iya 4 nta nota na rimwe.

Ikipe y’u Rwanda yitabiriye imikino y’Afurika bwa mbere ku nkunga ya I&M Bank yabashije gutsinda imikino 2 itsindwa indi 2

Hari amasomo u Rwanda rwakuyemo

Ushinzwe gukurikirana ubuzima bw’ikipe umunsi ku wundi « Team Manager »  akaba yaranakiniye ikipe y’igihugu, Gahonzire Victoire  yatangaje ko   batageze ku ntego bari bihaye yo kugera kure hashoboka ariko kuko bwari ubwa mbere bishimira umusaruro babonye.

Kapiteni w’ikipe y’u Rwanda Uwera Sarah na we yavuze ko bifuzaga byibura kugera ku mukino wa nyuma ariko ntibibakundire. Gusa avuga ko bakoresheje imbaraga nyinshi kandi ko batinyutse dore ko bwari ubwa mbere bakinnye irushanwa nk’iri.

Mwanja Joshua Declan, umutoza w’ikipe y’igihugu  avuga ko ikipe yitwaye neza  n’ubwo hari udukosa twagiye tugaragara.

Umuyobozi ushinzwe ibikorwa mu ishyirahamwe ry’umukino wa Cricket mu Rwanda “RCA”, Byiringiro Emmanuel   yavuze ko ikipe yitwaye neza kandi uko bagenda bakina ari nako ubunararibonye buzamuka.

Akomeza  agira ati : “Ikipe yacu irimo abakinnyi bakiri bato kandi ndizera ko mu myaka iri imbere tuzaba duhangana n’izi kipe zikomeye.”

Mu byo abona bigomba gukosorwa ni uburyo bw’imikinire cyane mu gutera udupira “Batting”   aho bagiye gushakira iyi kipe imikino  myinshi kugira ngo bamenyere.

Gahonzire Victoire na we ashimangira ko ikipe igomba kongera ingufu mu bijyanye no gutera udupira kuko ariho ikipe itakariza amanota.

Kapiteni w’ikipe, Uwera Sarah avuga ko bagomba kongeramo imbaraga batitegura cyane ku buryo mu marushanwa ataha bazitwara neza.

Abari kumwe n’iyi kipe bose bashimiye Abanyarwanda cyane ababa muri Zimbabwe babashyigikiye ubwo bakinaga iyi mikino. Iyi kipe izagaruka mu Rwanda tariki 14 Gicurasi 2019.

 

TANGA IGITEKEREZO

Leave a Reply

Your email address will not be published. Required fields are marked *