22°C , Partly cloudy | Kigali-Rwanda

COVID19: Ubuzima bw’abaganga bakumbuye Kigali bayibamo

Yanditswe na Imvaho Nshya

Ku ya 18-05-2020 saa 06:17:26

Icyorezo cya Koronavirusi COVID-19 cyahinduye byinshi mu buzima bumaze ibinyejana by’imyaka bumenyerewe, aho bisaba gutekereza mu bundi buryo hagamijwe kwirinda ndetse no kurinda abandi. Ku baganga nyarwanda bimwe mu bibabaho babikoraga mu myitozo igamije guhangana n’ibyorezo, batarabibona bibageraho mu buzima busanzwe. 

Abaganga bari mu batabiratekerejeho kabiri ubwo bagombaga kwitangira kujya bahura n’abakekwaho icyo cyorezo nk’uko biri mu nshingano biyemeje gukora ntawe basiganya. Gusa icyo basaba rubanda ni ukwirinda kuko na bo bibaha agahenge mu gihe batagomba kwita ku bantu benshi bananiwe kwirinda.

Muri iyi minsi, imibare itangazwa mu Rwanda ikomeje gutanga ikizere cy’uko gashya icyorezo cya COVID-19 bishoboka.

Kugeza ubu mu Rwanda hamaze gutahurwa abantu 292 banduye bamaze gukiramo 197, aho nta n’umwe urahitanwa n’iki cyorezo mu Rwanda.

Ikigo k’Igihugu cy’Ubuzima (RBC) kerekana uburyo mu minsi ibiri, ikurikira indi ibiri yakurikiranye nta murwayi wa COVID-19 ubonetse, yatahuwemo abarwayi 5 bashya barimo 4 bayikuye mu mahanga n’umwe wahuye na bo.

Uwo ni umusaruro wo kubahiriza ingamba zashyiriweho kwirinda mu Banyarwanda, ubwitange bw’inzego z’umutekano mu kugenzura no gukurikirana ko ayo mawiriza yubahirizwa, by’umwihariko bwitange bw’abaganga n’inzego z’ubuzima.

Urugamba rwo guhangana n’iki cyorezo rugitangira, abenshi bibazaga ku mibereho y’abaganga n’abandi bari ku ruhembe rw’imbere mu guhashya COVID-19 n’imiryango yabo, cyane ko kwinjira mu bigo bivurirwamo abakekwaho cyangwa abatahuweho icyo cyorezo ari umurimo usaba umutima ukomeye.

Dr.  Turatsinze David na Dr.  Nkeshimana Menelas ni bamwe mu baganga baganiriye na The New Times aho bapimira abarwayi muri santeri ya “Camp Kigali”, bahishura byinshi ku mibereho yabo, uko birinda n’ikemezo bafashe cyo kudahura n’imiryango yabo mu rwego rwo kwirinda ikwirakwizwa rya COVID-19.

Dr. Turatsinze ni umuganga ufite uburambe bw’imyaka 15 mu rwego rw’ubuzima. Yibera muri hoteri kuva tariki 14 Werurwe 2020 ubwo iki cyorezo cyatahurwaga bwa mbere mu Rwanda, nubwo bitamusaba urugendo runini kugira ngo agere mu muryango we.

Yagize ati: “Birumvikana ko nkumbuye umuryango wa nge. Nkumbuye gusohokana na wo.”

Ubwo yabazwaga niba adaterwa ubwoba n’uko ashobora kwanduzwa iyo virusi n’abarwayi batari munsi ya 10 ahura na bo ku munsi, yagize ati: “Yego, rimwe na rimwe ndabugira. Mbere y’ibindi byose ndi umuntu ariko nkaba n’umuganga. Nzi uburyo mbasha kwirindamo nkarinda n’abandi.”

Yakomeje avuga ko mu bihugu bimwe na bimwe hari abaganga bagiye bumvikana ko bandujwe n’abarwayi, bityo bibasaba kurushaho kwirinda mu bikorwa byose by’ubuvuzi bakora.

Ati:”Tugomba kwambara imyambaro yagenewe kurinda abaganga mbere yo guhura n’abarwayi. Nge ubwange mbanza no gukuramo imyenda mbere yo kwinjira mu icumbi mbamo mu rwego rwo kugabanya ibyago byo gukwirakwiza iyo virusi.”

Dr. Turatsinze ni umuganga ufite uburambe bw’imyaka 15 mu rwego rw’ubuzima

Yishyize mu kato ku buryo adashobora guhura n’inshuti n’abagize umuryango we, ndetse anirinda kujya ahari abantu benshi ngo abe yabanduza cyangwa na bo bakamwanduza, cyane ko inzego z’ubuzima zigaragaza ko hari abafite virusi batagaragaza ibimenyetsoariko ariko bafite ubushobozi bwo kuyikwirakwiza.

“[…] Akazi kacu kadusaba ubwitange burenze ndetse no kugira bimwe umuntu yigomwa, ariko hajuru y’ibyo byose kurokora ubuzima no kurinda Igihugu nta gisa na byo.”

Kuba muri Kigali uyikumbuye

Dr. Nkeshimana na we yagarutse ku buryo ubuzima bwe bwose bwahindutse kwiha akato. aba muri Kigali ariko ngo akumbuye urujya n’uruza rw’abantu muri Kigali.

Ati: “Inshuti n’abavandimwe barabizi ko ndi ku ruhembe rw’imbere, kandi bazi neza impamvu bagomba kwirinda guhura na nge. Uretse ubuzima bwange muri rusange, nkumbuye Kigali yuzuye abantu, ibitaramo n’uruvunganzoka rwaharangwaga.”

Yongeyeho ko COVID-19 yatunguranye igakwira Isi yose mu gihe gito bitandukanye n’ibindi byorezo nka Ebola byagiye bivugwa ahantu hamwe ariko bikaba bishobora kwirindwa ahandi.

Ati: “Ikintu kidasanzwe kuri Koronavirusi ni uko yatunguranye, yandura vuba cyane n’ingamba zo kuyirinda ziragoye kuzubahiriza buri gihe…”

Abo baganga bombi bashimangira ko ubufatanye mu kwirinda no guhashya iki cyorezo bugikenewe kuko bigoye kwemeza igihe kizarangirira.

Bashimangiye ko Leta y’u Rwanda iri maso mu gukurikirana iki cyorezo no kurinda ko cyakwizwa muri rubanda.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.