21°C , Partly cloudy | Kigali-Rwanda

COVID19: Mu barwayi 6 batahuwe i Kigali harimo n’abamotari

Yanditswe na Imvaho Nshya

Ku ya 22-06-2020 saa 06:56:14

Mu gitondo cyo kuri uyu wa Mbere, inzego z’ubuzima zemeje ko mu barwayi bashya 6 b’icyorezo cya Koronavirusi (COVID-19) baraye bagaragaye mu Mujyi wa Kigali harimo n’abamotari babiri, agaragaza ko ari ikibazo gikomeye mu gihe abo bamotari baba baranduje abo bagiye batwara.

Umuyobozi Mukuru w’Ikigo k’Igihugu cy’Ubuzima, (RBC) Dr Nsanzimana SabinDr Nsanzimana yavuze ko abarwayi batandatu batahuwe mu Mujyi wa Kigali ari abo mu Karere ka Kicukiro n’aka Nyarugenge.

Ati: “Muri abo barwayi batandatu, harimo babiri bakora umurimo wo gutwara abagenzi kuri za moto, ari na bo navuga ko bahangayikishije cyane kuko ni ikiciro cyafunguriwe imirimo nyuma y’ibindi byiciro byose, ku buryo rero biduhangayikishije mu buryo bwo kuvuga ngo za moto turi kugendaho tugomba kwitwararika cyane, kugira ngo bitaba ikiraro cyo gukwirakwiza Koronavirusi.”

Abo bamotari babiri bagaragaye mu gikorwa cyo gupima mu buryobwa rusange kimaze gikorwa mu minsi igera kuri itanu ishize, aho hapimwe abamotari mu buryo bwo gutomboza.

Yakomeje avuga ko abandi bane batahuwe bafite aho bahuriye n’umuntu wari waragaragaye mu minsi yashize, bakaba n’ubundi bari basanzwe bari gukurikiranwa, bari mu kato.

Dr Nsanzimana yavuze ko hari abandi barwayi baheruka kugaragara muri Kigali bafitanye isano n’uburwayi bwagaragaye mu Karere ka Rusizi, ku buryo abashya babonetse batatunguranye.

Kugeza ubu mu Rwanda hamaze gutahurwa abarwayi 728 b’icyorezo cya COVID-19, barimo 359  bamaze gukira ndetse na 2 bahitanywe n’ib=cyo cyorezo. Kugeza ubu abakirimo kwitabwaho n’abaganga bageze ku 367 mu barwayi bamaze kuboneka  mu bipimo 111,257 byafashwe kuva umurwayi wa mbere yatahurwa muri Werurwe kugeza ubu.

Abenshi mu batahurwa nta n’ibimenyetso bari kugaragaza

Mu gihe  COVID-19 yadukaga mu mezi atatu, abantu benshi mu batahurwaga babaga bagaragaje bimwe mu bimenyetso. Kuri ubu siko bikimeze kuko ngo hari abantu benshi bashobora kuba bagendana na yo batabizi.

Dr. Nsanzimana yavuze ko iyo mpamvu ikwiye gutuma Abaturarwanda barushaho kwitwararika, kuko bigoye kumenya aho umuntu yanduriye.

Yashimangiye ko nk’abamotari babiri batahuwe bitaramenyekana uko banduye, ariko byatangiye gukurikiranwa, amakuru arambuye akaba agenda amenyekana, ndetse uko gupima byiyongera bakaba biteguye ko hashobora kuboneka n’abandi barwayi bataramenyekana.

Ati: “Imibare y’abanduye iki cyorezo  ishobora kwiyongera kuko uko urujya n’uruza rw’abantu rwiyongera aha mu Muyi wa Kigali n’ahandi mu Rwanda, birumvikana ko uwaba afite uburwayi ashobora kubuvana hamwe akabujyana ahandi. Gusa buriya dufite uburyo dushobora no kwirinda ubwo burwayi n’ubwo bwaba buhari, ntibukwirakwire.”

Abagenda kuri za moto barasabwa kwitwaza agatambaro bashyira mu ngofero, kwambara neza agapfukamunwa ndetse bakagenzura ko n’umuti bahabwa ngo bakarabe intoki wujuje ubuziranenge.

 

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.