22°C , Partly cloudy | Kigali-Rwanda

COVID19: Abasura ingagi z’u Rwanda barasiga intera ya metero 10

Yanditswe na Imvaho Nshya

Ku ya 22-06-2020 saa 10:47:56

Guhera tariki ya 16 Kamena 2020, Guverinoma y’u Rwanda yanzuye ko ibikorwa by’ubukerarugendo bisubukurwa hubahirizwa amabwiriza yo kwirinda icyorezo cya Koronavirusi (COVID-19).

Hanzuwe ko ubukerarugendo bwo mu gihugu n’ubukerarugendo mpuzamahanga ku bashyitsi baje mu ndege zihariye (charter flights)bwemewe, baba abantu ku giti cyabo cyangwa abaje mu matsinda.

Bukeye bwaho, Urwego rushinzwe Iterambere mu Rwanda (RDB) rwasohoye amabwiriza agenga uburyo ubwo bukerarugendo bugomba gukorwamo ndetse n’ibiciro bishya bikwiye gukurikizwa cyane cyane mu gusura ibice bitandukanye.

Ayo mabwiriza areba ibyiciro bitandukanye by’ibikorwa by’ubukerarugendo, ibikorwa by’ ubukerarugendo muri pariki, abatembera mu bwato (boat riding) cyangwa ubwato buto (kayaking, canoeing), kuzamuka imisozi (hiking), kureba inyoni (birding), gusura ingoro ndangamurage ndetse n’ahantu ndangamuco n’amateka.

RDB ivuga ko ayo mabwiriza azagenda avugururwa uko u Rwanda rugenda ruhangana n’icyorezo cya COVID-19 no ku mabwiriza ya Minisiteri y’Ubuzima.

Uretse amabwiriza rusange yo kwirinda COVID-19, RDB yashyizeho amabwiriza yihariye ku basura Pariki z’Igihugu zibarizwamo ingagi n’ibindi bisanguge (primates), mu rwego rwo kwirinda ikwirakwizwa ry’icyo cyorezo haba mu bantu no mu nyamaswa.

Ba mukerarugendo barasabwa gusiga byibura intera ya metero 10 hagati yabo n’inyamaswa zo mu bwoko bw’ibisanguge mu gihe bazisura muri Pariki ya Nyungwe n’iy’Ibirunga.

Ku basura ingagi, hemerewe itsinda rya ba mukerarugendo batarenze 6, bakamarana nazo igihe kitarenze isaha.

Ku basura inkima (golden monkeys), hemerewe gusura itsinda ry’abantu batarenze 12, bakamarana na zo igihe kitarenze isaha.

Ku basura impundu (chimpanzees), hemerewe gusura itsinda ry’abantu batarenze 8 bakamarana nazo igihe kitarenze isaha.

Impundu ni kimwe mu bisanguge bibooneka mu Rwanda

Kuri Pariki y’Igihugu y’Akagera, amapine y’imodoka zitwaye ba mukerarugendo ndetse n’inkweto bambaye bigomba guterwa umuti wabigenewe bakigera kuri pariki.

Ba mukerarugendo kandi bagomba kwitwaza umuti w’isuku wabugenewe mu modoka mu gihe basura pariki.

Ibi bikorwa bikurikira by’ubukerarugendo muri Pariki y’Igihugu y’Akagera bigomba gusurwa hitabwa ku mabwiriza yo guhana intera:

Ku batembera mu bwato, ubwato bugomba kugendamo abantu batarenze 6 hamwe n’uyobora ba mukerarugendo.

Kubasura inyamaswa nijoro, hemerewe gusa itsinda rimwe rya ba mukerarugendo batarenze abantu 6 hamwe n’uyobora ba mukerarugendo bari mu modoka yabugenewe.

Gusura inyamaswa ku manywa ( ba mukerarugendo bari kumwe n’ubayoboye): Hemerewe gusura abantu batarenze 6 hamwe n’uyobora ba mukerarugendo bari mu modoka yabugenewe.

Mu gushyira hamwe ibikubiye mu mabwiriza RDB yifashishije ibyatangajwe n’Ishami ry’Umuryango w’Abibumbye Rishinzwe Ubukerarugendo (UNWTO), Umuryango Mpuzamahanga Ushinzwe ibikorwa b’imyidagaduro na za pariki (IAAPA), Umuryango mpuzamahanga w’ibikorwa bikurura ba mukerarugendo (Global Association for Attractions Industry), Ishami ry’Umuryango w’Abibumbye ryita ku Buzima (WHO) ndetse n’amabwiriza ya Ministeri y’Ubuzima ajyanye no kwirinda COVID-19.

Aya mabwiriza agamije gutanga umurongo ngenderwaho ku gusubukura ibikorwa by’ubukerarugendo mu gihe tucyugarijwe n’icyorezo cya COVID-19.

Nubwo ibigo bikora ibirebana n’ubukerarugendo bigomba gukurikiza amabwiriza rusange, hashyizweho amabwiriza yihariye ajyanye na buri cyiciro cy’ibikorwa cyangwa ibigo by’ubukerarugendo kugira ngo ibyo bikorwa bisubukurwe hibandwa mu kurinda ubuzima bw’abantu.

Ibitera (baboons) na byo biri mu bisanguge biboneka mu Rwanda

Inkende (Monkeys) na zo ziboneka mu Rwanda ku bwinshi

Reba amabwiriza yose: 

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.