22°C , Partly sunny | Kigali-Rwanda

COVID-19 yishe 2 mu Rwanda, hakira 210 n’abarwayi bashya 59

Yanditswe na Imvaho Nshya

Ku ya 20-02-2021 saa 21:25:45

Kuri uyu wa Gatandatu tariki ya 20 Gashyantare 2021, Minisiteri y’Ubuzima yatangaje urupfu rw’abantu 2 bazize icyorezo cya COVID-19, bituma abamaze guhitanwa n’icyo cyorezo bagera kuri 247 bangana na 1.3% by’abacyanduye kuva muri Werurwe 2020.

Ababuze ubuzima mu masaha 24 ashize ni abagabo babiri barimo uw’imyaka 71 wo mu Karere ka Nyamagabe n’undi w’imyaka 47  wo mu Karere ka Muhanga.

Uyu munsi kandi hatangajwe abantu 210 bakize COVID-19 mu Rwanda,  bituma umubare w’abamaze gukira muri rusange ugera ku 16,597 bangana na 92.2%. Kugeza ubu abakiwaye ni 1,144  mu bantu  17,988 batahuweho icyo cyorezo guhera muri Werurwe 2020.

Abarwayi bashya bo barimo abo mu Mujyi wa Kigali 22, Kamonyi 6, Nyamagabe  5, Rubavu 4, Ngoma 4, Gicumbi 3,  Gisagara 3,  Nyaruguru 2, Huye 2, Rusizi 2, Kayonza 2, Rutsiro 2, Bugesera 1, na Muhanga 1.

Abarwayi bashya babonetse ni 59 mu gihe abakirwaye barimo 14 barembye. Imibare y’abamaze gutahurwaho icyo cyorezo yabonetse mu bipimo 973,922 birimo 4,668 byafashwe mu masaha 24 ashize.

Abaturarwanda barasabwa kutirara kuko icyorezo kigihari ndetse hashize igihe hafashwe ingamba nshya zigamije gukumira ikwirakwizwa ryacyo, harimo no kwirinda ingendo zitari ngombwa by’umwihariko mu Mujyi wa Kigali aho ubukana bw’icyorezo bukomeje kugabanyuka.

Minisiteri y’Ubuzima yatangaje ko yatangiye gukingira abari mu byiciro byibasiwe kurusha ibindi ihereye ku bakora mu bigo bivurirwamo COVID-19 n’abaganga bita ku barwayi umunsi ku wundi.

Ibindi byiciro bizakomerezaho ubwo u Rwanda ruzatangira kwakira inkingo rwemerewe muri gahunda ya COVAX n’iy’Ikigo cy’Umuryango w’Ubumwe bw’Afurika gishinzwe gukwirakwiza imiti.

Guhera ku ya 23 Gashyantare  mu Rwanda ingendo zizaba zibujijwe guhera saambiri kugeza saa kumi za mugitondo mu Gihugu hose, ingendo zihuza Uturere dutandukanye zikaba zibujijwe ndetse n’izihuza Uturere n’Umujyi wa Kigali zirabujijwe keretse gusa ku mpamvu za serivisi z’ubuzima cyangwa izindi z’ingenzi.

Amashuri yakomeje gufungwa mu Mujyi wa Kigali, insengero zemerewe gukora bizasubukura guhera ku wa Kabiri.

Imyitozo ngororamubiri ikorerwa mu nyubako z’imyidagaduro (gyms) no kogera muri pisine (swimming pool)  byo birasubitswe  mu rwego rwo kwirinda ko byaba inzira yo gukwirakwiza ubwandu bushya bukomeje kwiyongera, uretse ku bantu bacumbitse muri za Hoteli na bo bamaze kwisuzumisha icyo cyorezo.

Mu gihe u Rwanda rutaragera ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Abamaze kwandura ku Isi barasaga miliyoni 111 barimo abasaga  miliyoni 86 bakize n’abapfuye barenga miliyoni ebyiri n’ibihumbi 468.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.